រាជធានីភ្នំពេញ ៖ ការផ្អាកដំណើរការប្រកួតពានរង្វាន់លីគកំពូលកម្ពុជា ដោយសារការរាតត្បាត នៃជំងឺកូវីដ-១៩ ប្រមាណជាង១ខែមកហើយនេះធ្វើឱ្យក្លិបបាល់ទាត់នីមួយៗជួបបញ្ហាហិរញ្ញវត្ថុបង្ខំឱ្យក្លិបមួយចំនួនធំកាត់ប្រាក់ខែបុគ្គលិក កីឡាករ និងគ្រូបង្វឹកពី៣០ទៅ៥០ភាគរយប៉ុន្តមិនប៉ះពាល់ដល់កិច្ចសន្យារវាងកីឡាករ និងក្លិបនោះទេ ។
លោក ទេព ឡុងរចនា គ្រូបង្គោលក្លិបបាល់ទាត់កងយោធពលខេមរភូមិន្ទ បានប្រាប់ឱ្យដឹងថា សព្វថ្ងៃទាំងប្រាក់ខែគ្រូនិងប្រាក់ខែកីឡាករគឺបានការជួយឧបត្ថម្ភពីស្ថានីយទូរទស្សន៍និងវិទ្យុនៃកងយោធពលខេមរភូមិន្ទមួយមុខគត់ ។ ចាប់តាំងពីកើតមានជំងឺកូវីដ-១៩ ក្លិបរបស់លោកត្រូវបានរំសាយការហ្វឹកហាត់ជាលក្ខណៈប្រមូលផ្ដុំ ។
ប៉ុន្តែមិនមែនមានន័យផ្អាកហ្វឹកហាត់ទាំងស្រុងនោះទេ គឺហាត់មួយថ្ងៃខានមួយថ្ងៃ ទោះបីជាក្នុងថ្ងៃហ្វឹកហាត់ក៏ដោយក៏ត្រូវបំបែកគ្នាជាក្រុមតូចៗដែលមានគ្នាចាប់ពី៥នាក់ទៅ១០នាក់ និងត្រូវរក្សាគម្លាតគ្នាតាមការណែនាំរបស់ក្រសួងសុខាភិបាល ។ លោកបញ្ជាក់បន្ថែមថា ចំពោះប្រាក់ខែកីឡាករ គ្រូបង្វឹកនិងគ្រូជំនួយទាំងអស់សុទ្ធតែត្រូវបានកាត់បន្ថយពាក់កណ្ដាលដូចគ្នា។
លោក មាស ចាន់ណា គ្រូបង្គោលក្លិបបាល់ទាត់ណាហ្គាវើល ក៏បានលើកឡើងស្រដៀងគ្នាថា សព្វថ្ងៃការហ្វឹកហាត់របស់កីឡាករមានខ្លះហ្វឹកហាត់ដោយខ្លួនឯងតាមផ្ទះឬទីតាំងណាមួយដែលមានលក្ខណៈអំណោយផល ។ ការហ្វឹកហាត់នេះទៀតសោតគឺអនុវត្តតាមកម្មវិធីរបស់ក្លិបដាក់ឱ្យទាំងអស់ ទាំងការហ្វឹកហាត់ផ្នែកកម្លាំងនិងបច្ចេកទេសឡើងទៅ ។
លោកថា កន្លងមកទោះបីជារាជរដ្ឋាភិបាលប្រកាសមិនឱ្យមានការជួបជុំហ្វឹកហាត់ដើម្បីបង្ការការពារពីការឆ្លងជំងឺកូវីដ-១៩ក៏ដោយក៏ក្លិបរបស់លោកនៅព្យាយាមរិះរកពេលវេលា និងដាក់កម្មវិធីហ្វឹកហាត់ក្នុងលក្ខណៈប្រុងប្រយ័ត្នខ្ពស់ ។ ប៉ុន្តែចំពោះប្រាក់ខែគ្រូបង្វឹក គ្រូជំនួយ និងកីឡាករលោកមិនអាចប្រាប់បាននោះទេ គ្រាន់តែអាចជម្រាបជូនថា ក្រោយពីកើតឡើងនូវជំងឺឆ្លងកូវីដ-១៩ ក្រុមហ៊ុនណាហ្គាលវើលទាំងមូលត្រូវបានបិទទាំងស្រុងធ្វើឱ្យមានការបាត់បង់ចំណូល ដូច្នេះប្រាក់ខែបុគ្គលិកក៏ត្រូវបានកាត់បន្ថយ៥០ភាគរយដែរ។
លោក បែ មករា អ្នកចាត់ការទូទៅរបស់ក្លិបបឹងកេតអង្គរ បានប្រាប់ឱ្យដឹងថា ចាប់តាំងពីកើតមានឡើងនូវជំងឺកូវីដ-១៩រហូតមកទល់ពេលនេះ ការហ្វឹកហាត់ជាលក្ខណៈប្រមូលផ្ដុំរបស់ក្លិបលោកក៏ត្រូវបានរំសាយដែរ។
ក្លិបតម្រូវឱ្យកីឡាករហ្វឹកហាត់តាមផ្ទះនិងតាមកម្មវិធីហ្វឹកហាត់ដែលបានបង្ហាញតាមអនឡាញ
តែប៉ុណ្ណោះ ទោះជាមានការប្រមូលផ្ដុំក៏ស្ថិតក្នុងលក្ខណៈទ្រង់ទ្រាយតូចដែរ ។ លោកក៏បានលើក
ឡើងពីប្រាក់ខែគ្រូបង្វឹក បុគ្គលិក និងកីឡាករថា សុទ្ធតែត្រូវបានកាត់បន្ថយពាក់កណ្ដាល ។
លោកបញ្ជាក់ថា ប្រាក់ខែទាំងអស់នៅក្នុងក្លិបទាំងមូលគឺបានមកពីការជួយឧបត្ថម្ភពីសំណាក់ក្រុមហ៊ុនជាដៃគូផ្សេងៗ និងមួយចំនួនទៀតជាប្រាក់របស់ក្លិបតែម្ដង ។ ប៉ុន្តែបច្ចប្បន្នក្រុមហ៊ុនជាដៃគូមួយចំនួនក៏គេកាត់បន្ថយខ្លះៗដែរដូច្នេះការចាយវាយលើការចំណាយស្ទើរតែទាំង
ស្រុងជាបន្ទុករបស់ក្លិប ។
ជាមួយគ្នានេះលោករំពឹងថា អ្វីៗនឹងដំណើរការល្អប្រសើរឡើងវិញ ក្រោយពីមានការប្រកាសរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីពេលថ្មីៗនេះថា អនុញ្ញាតឱ្យមានការប្រកួតកីឡាឡើងវិញ ប៉ុន្តែជាលក្ខណៈបិទទ្វារមិនឱ្យមានអ្នកមើលនោះទេ ។ មកដល់ពេលនេះ យើងកំពុងតែរង់ចាំមើលការប្រជុំសម្រេចរបស់គណៈកម្មការប្រកួតកីឡាបាល់ទាត់កម្ពុជាសិន ថាតើត្រូវធ្វើនៅថ្ងៃណា ។
ប៉ុន្តែបើតាមព័ត៌មានមិនទាន់ផ្លូវការថា អាចនឹងដំណើរការប្រកួតបាល់ទាត់ទាំងក្របខ័ណ្ឌពានរង្វាន់សម្ដេចហ៊ុន សែន និងពានរង្វាន់ក្របខ័ណ្ឌលីគកំពូលឡើងវិញនៅក្នុងខែមិថុនាខាងមុខនេះហើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ