រាជធានីភ្នំពេញ ៖ ចង់រកស៊ីរកលុយដើម្បីផ្គត់ផ្គង់គ្រួសារ មិនមែនទាល់តែមានដើមទុនរាប់ម៉ឺនដុល្លារនោះឡើយ ។ អាជីវកម្មលក់ទឹកអំពៅល័ត (ម៉ូតូរ៉ឺម៉ក) ឬអចល័ត្រ គឺជាមុខរបរមួយកំពុងពេញនិយមខ្លាំងជាពេលបច្ចុប្បន្ននេះ ខណៈបងប្អូនក៏ពេញនិយមទទួលទានទឹកអំពៅផងដែរ ជាពិសេសនៅក្នុងរដូវប្រាំងទៀតសោត ទឹកអំពៅកាន់តែមានរសជាតិផ្អែមខ្លាំងផងដែរ ។
យ៉ាងណាមិញការលក់ទឹកអំពៅនៅទីតាំងផ្សេងៗគ្នា ក៏មានស្ថានភាពភាពខុសគ្នាទៅតាមកន្លែងនានា ក្នុងរាជធានីភ្នំពេញ។ តួយ៉ាងអ្នកលក់ទឹកអំពៅម្នាក់ លក់នៅជុំវិញម្តុំស្ពានក្បាលថ្នល់ឈ្មោះ ពូ អូន បានប្រាប់កោះសន្តិភាពថា »ខ្ញុំលក់ក្នុងមួយថ្ងៃបានគួរសម្យដែរ ដោយលក់ក្នុងមួយកែវ ២០០០៛ ពីមុនលក់តែ ១៥០០៛ទេ តែតាំងពីខែមិថុនា (ខែមុន) មក អំពៅឡើងថ្ងៃ ចឹងទៅខ្ញុំ ក៏ត្រូវលក់ឡើងដែរ។ ឥឡូវអំពៅមួយបាច់ ១២០០០៛ ទៅ២០០០០៛» »។
ពូ អូន បានបន្តថា «មុនចូលឆ្នាំខ្មែរ ក្នុងមួយថ្ងៃគាត់លក់បាន ១០០,០០០៛ (ដប់ម៉ឺន) ដល់ក្រោយចូលឆ្នាំគាត់លក់បានជិត ២០០,០០០៛ (ម្ភៃម៉ឺន) ហើយបើផាត់ដើមចេញ ចំណេញបាន បួនដប់ម៉ឺនរៀលដែរក្នុងមួយថ្ងៃ» ។ ដោយការចល័តលក់ តាំងពីព្រឹករហូតយប់ ចាប់តាំងពីម៉ោង ៧កន្លះព្រឹក ដល់ម៉ោង ៨យប់ ពូអូនលក់តែពី ទីតាំងត្រឹមស្ពានក្បាលថ្នល់ដល់ផ្សារទួលទំពូងប៉ុណ្ណោះ។ ប៉ុន្តែ វាស្រ័យលើការលក់ដែល បើលក់អស់ម៉ោង៥ឬ៦ អីគាត់ឈប់លក់ហើយ។ ពូអូនបានរៀបរាប់ថា គាត់លក់ទឹកអំពៅនេះជិត១០ឆ្នាំហើយ ដោយសារពីមុនគាត់រត់ម៉ូតូឌុប តែមិនអាចចញ្ចឹមជីវិតនិងក្រុមគ្រួសារគាត់បាន ទើបគាត់ប្តូរមុខរបរនេះវិញ ហើយគាត់មករស់នៅភ្នំពេញតែម្នាក់ឯងទេ នៅផ្ទះជួល(មួយខែ៦០ដុល្លារ) ឯប្រពន្ធកូននៅស្រុក។
អ្នកលក់ទឹកអំពៅចល័តម្នាក់ទៀត ដែលលក់ពីផ្សារកណ្តាលមកឈរលក់នៅម្តុំផ្សារសូរិយា បានប្រាប់កោះសន្តិភាពនៅថ្ងៃទី ២៥ ឧសភានេះថា មួយរយៈនេះរាងស្ងាត់ បើកាលពីអំឡុងចូលឆ្នាំវិញ នៅម្តុំនេះស្ងាត់ គាត់លក់មិនសូវបានទេ។
រីឯនៅម្តុំផ្សារសូរិយាឯនោះវិញ ពូ ដឿន ចាន់ដន លក់ទឹកអំពៅជិត ៤ទៅ៥ឆ្នាំហើយ តែមួយរយៈនេះមិនសូវលក់ដាច់ទេ។ ហើយគាត់លក់ពីម៉ោង៧ ព្រឹកដល់ម៉ោង៦ល្ងាច។
ពូចាន់ដន ដែលមកប្រកបមុខរបរ ក្នុងទីក្រុងភ្នំពេញបាននិយាយថា «បើផាត់ទាំងដើមនិងការចំណាយថ្ងៃសាំងអី នៅសល់ប្រហែល ៤ទៅ៥ម៉ឺន ក្នុងមួយថ្ងៃ។ មួយរយៈនេះ ខ្ញុំមិនហ៊ានលើកយកមកលក់ច្រើនដូចមុនៗទេ ខ្លាចលក់សល់ច្រើន។ ប៉ុន្តែអំពៅអាចទុកបានមួយថ្ងៃ ឬពីរថ្ងៃ លើសពីនឹង បើសល់ដឹងតែខាតហើយ។»គាត់លក់ក្នុងមួយកែវ ១០០០៛ ទៅ២០០០៛ ហើយអំពៅលើកយក មួយចាច់តូច (១២ដើម) ៤ទៅ៥ពាន់រៀល។
ពូចាន់ដន មកលក់នៅម្តុំនេះ គាត់លក់ដាច់ដោយសារម៉ូយទិញដែរទេ។ បើតាមលក់ធម្មតាប្រហែលមិនដាច់ទេ។
គួរបញ្ជាក់ផងដែរថា អាជីវកម្មខ្នាតតូចមួយចំនួននៅតែបន្តបាន ដោយមិនបានទទួលរងផលប៉ះពាល់អ្វីនោះទេ ក្នុងអំឡុងពេលនេះ នេះបើតាមការលើកឡើងរបស់អ្នកជំនាញខាងផ្នែកសេដ្ឋកិច្ច។
លោក ង៉ែត ជូ អ្នកវិភាគសេដ្ឋកិច្ច មួយរូបបាននិយាយអាជីកម្មខ្នាតតូចដូចជា ការលក់ទឹកអំពៅ ឬការលក់ដូងក្រអូបឬត្រជាក់ មិនជាសូវប៉ះពាល់ដល់ការលក់ដូររបស់ពួកគាត់ទេ។លោក ជូ បាននិយាយថា «ឧទាហរណ៍ទៅលើអ្នកលក់ទឹកអំពៅ ក្នុងមួយថ្ងៃគេលក់បាន ៤ទៅ១០ម៉ីនឯនោះ ហើយមិនចាំបាច់ប្រើដើមទន់ច្រើនទៀត។ ប៉ុន្តែគ្រាន់តែថា វាត្រូវការពេលវេលា ភាពអត់ធ្មត់ឧស្សារហ៍ព្យយាម និងកម្លាំងច្រើនតែប៉ុណ្ណោះ» ។
បើតាមការឲ្យដឹងពីអ្នកលក់ទឹកអំពៅបានឲ្យដឹងថាដើមទុនសម្រាប់ការទិញធុងអំពៅក៏ដូចជាថ្លៃម៉ូតូគឺក្នុងរង្វង់ ៨០០ ទៅ ១០០០ ដុល្លារនេះសម្រាប់អ្នកលក់ចល័ត តែសម្រាប់អ្នកលក់អចល័ត (លក់នៅផ្ទះ ឬទីតាំងណាមួយជាក់លាក់) គឺចំណាយទុនរង្វង់ ៣០០ទៅ ៤០០ ដុល្លារទិញធុងទឹកអំពៅ ៕
ចែករំលែកព័តមាននេះ