ប្រទេសអេស្ប៉ាញ ៖ ក្របខណ្ឌកំពូល La Liga ទទួលបានភ្លើងខៀវពីនាយករដ្ឋមន្ត្រីអេស្ប៉ាញលោក Pedro Sanchez ដោយអាចបន្តសកម្មភាពប្រកួតប្រជែងឡើងវិញចាប់ពីថ្ងៃទី៨ ខែមិថុនា…
ប្រទេសអេស្ប៉ាញ ៖ ក្របខណ្ឌកំពូល La Liga ទទួលបានភ្លើងខៀវពីនាយករដ្ឋមន្ត្រីអេស្ប៉ាញលោក Pedro Sanchez ដោយអាចបន្តសកម្មភាពប្រកួតប្រជែងឡើងវិញចាប់ពីថ្ងៃទី៨ ខែមិថុនា ឆ្នាំ២០២០ ដោយបិទទ្វារកីឡដ្ឋាន ។
បច្ចុប្បន្នកីឡាករទាំងអស់នៃក្របខណ្ឌមួយនេះ ទទួលបានការអនុញ្ញាតក្នុងសប្តាហ៍នេះ ឲ្យចាប់ផ្តើមការហ្វឹកហាត់លក្ខណៈជាក្រុម ដែលមិនលើសពី១០នាក់ ។
គួរបញ្ជាក់ថា លោក Pedro Sanchez បានថ្លែងថា «វាជាពេលវេលាសម្រាប់ប្រទេសអេស្ប៉ាញ គួរធ្វើអ្វីដែលត្រូវធ្វើ។ ហើយឥឡូវនេះ ការបន្ធូរបន្ថយថ្មីកំពុងបើកសម្រាប់មនុស្សគ្រប់គ្នា ។ ហើយពេលវេលា បានកំពុងនាំមកនូវសកម្មភាពប្រចាំថ្ងៃជាច្រើនត្រឡប់មកវិញ»។
«ចាប់ពីថ្ងៃទី៨ ខែមិថុនានេះ ក្របខណ្ឌ La Liga នឹងត្រឡប់មកវិញ។ បាល់ទាត់ប្រទេសអេស្ប៉ាញមានចំនួនអ្នកតាមដានច្រើនលើសលុប ប៉ុន្តែវាមិនមែនជាសកម្មភាពតែមួយ ដែលនឹងវិលត្រឡប់មកវិញនោះទេ» ។
ក្នុងនោះលីគលំដាប់ទី២ (Segunda División) ក៏ត្រូវបានកំណត់ឲ្យចាប់ផ្តើមឡើងវិញនៅពេលដំណាលគ្នាផងដែរ។ បើយោងតាមរបាយការណ៍ពីសារព័ត៌មានក្នុងប្រទេសអេស្បាញបានលើកឡើងថា ជំនួបរវាងក្រុម Sevilla និងក្រុម Real Betis នឹងក្លាយជាការប្រកួតបើកឆាកក្របខណ្ឌ La Liga ដំបូងបង្អស់ក្នុងសម័យកាលវីរុសកូវីដ-១៩ ។
សូមរំលឹកថា សកម្មភាពបាល់ទាត់ រួមកីឡាទាំងអស់ក្នុងប្រទេសអេស្ប៉ាញ ត្រូវបានផ្អាកទាំងស្រុងនៅថ្ងៃទី១២ ខែមីនា ដោយសារតែការផ្ទុះឡើងនៃវីរុសកូវីដ-១៩ ។
បើទោះជាត្រូវបានអនុញ្ញាតឲ្យចាប់ផ្តើមការប្រកួតឡើងវិញ នៅដើមខែក្រោយក៏ពិតមែន ប៉ុន្តែវិធានការរឹតបន្តឹងជាច្រើនត្រូវបានអនុវត្តទាំងមុនពេលប្រកួត និងអំឡុងពេលមានការប្រកួត។
សូមបញ្ជាក់ថាក្របខណ្ឌ La Liga នៅមាន ១១ ប្រកួតទៀតត្រូវលេង ដើម្បីបញ្ចប់រដូវកាលនេះ ដោយបច្ចុប្បន្នក្រុម Barcelona កំពុងឈរនៅកំពូលតារាងបណ្តោះអាសន្ននាំមុខ ២ពិន្ទុលើក្រុម Real Madrid មុនពេលលីគត្រូវបានផ្អាក ៕ (ដកស្រង់ចេញពី BBC)
ចែករំលែកព័តមាននេះ