ខេត្តពោធិ៍សាត់៖ នៅពេលនិយាយថា ផ្លូវជាតិលេខ៥៦ ប្រាកដជាប្រជាពលរដ្ឋមួយចំនួនធំ ជាពិសេសបងប្អូនទាហាន និងមន្ត្រីរាជការ មេភូមិ មេឃុំ ក្នុងទសវត្សឆ្នាំ៨០ ៩០…
ខេត្តពោធិ៍សាត់៖ នៅពេលនិយាយថា ផ្លូវជាតិលេខ៥៦ ប្រាកដជាប្រជាពលរដ្ឋមួយចំនួនធំ ជាពិសេសបងប្អូនទាហាន និងមន្ត្រីរាជការ មេភូមិ មេឃុំ ក្នុងទសវត្សឆ្នាំ៨០ ៩០ ធ្លាប់ឮ និងធ្លាប់ស្គាល់ជាក់ជាមិនខាន តាមរយៈការដឹកជញ្ជូនគ្រឿងបរិក្ខាយោធា និងសម័យ ក៥ ក្នុងកាលៈទេសៈដែលស្រុកទេសមានសង្គ្រាម។ ផ្លូវជាតិលេខ៥៦ តភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្លងកាត់ស្រុកភ្នំក្រវាញ ឆ្ពោះទៅកាន់ឃុំថ្មដា ស្រុកវាលវែង ជាប់ព្រំដែនកម្ពុជា-ថៃ។
ក្នុងទសវត្សឆ្នាំ៨០ ៩០ ផ្លូវនេះ លំបាកធ្វើដំណើរខ្លាំងណាស់ ហើយក៏ប្រឈមនឹងគ្រោះថ្នាក់ជាទីបំផុត ដោយសារទាហានខ្មែរក្រហមឆ្មក់បាញ់ គ្រាប់មីនកប់ក្នុងដី និងជំងឺគ្រុនចាញ់។ កាលនោះធ្វើដំណើរ២ ៣ថ្ងៃ ទើបទៅដល់គោលដៅ តាមរថយន្ដធុនហ្សីល ដែលអ្នកខ្លះគេហៅថា អាយក្ស ឬអាដំរីទឹក ហើយបើរដូវវស្សាមានភ្លៀងធ្លាក់វិញមួយសប្ដាហ៍ ឬកន្លះខែទើបទៅដល់។
ក្រោយការធ្វើសមាហរណកម្មបានប្រមាណ៥ឆ្នាំ គឺអំឡុងឆ្នាំ២០០៣ ២០០៤ កងវិស្វកម្មបានស្ថាបនាផ្លូវក្រួសក្រហម ចាប់ពីដំណាក់ឈើក្រំស្រុកភ្នំក្រវាញ រហូតដល់ឃុំថ្មដាស្រុកវាលវែង ដែលពេលនោះគេបានដូរឈ្មោះពីផ្លូវជាតិលេខ៥៦ មកផ្លូវជាតិលេខ៥៥វិញ។
នៅឆ្នាំ២០១៤ ផ្លូវជាតិលេខ៥៥ បានចាប់ផ្ដើមកសាងជាផ្លូវកៅស៊ូ រហូតដល់ចុងឆ្នាំ២០១៩ ទើបរួចរាល់ជាស្ថាពរ និងធ្វើពិធីសម្ភោធដាក់ឲ្យប្រើប្រាស់ជាផ្លូវការ កាលពីថ្ងៃទី៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលក្នុងឱកាសនោះសម្ដេចបានហៅផ្លូវលេខ៥៥ថា (ផ្លូវបុប្ផាលាក់ខ្លួន)។ ផ្លូវជាតិលេខ៥៥ ឬផ្លូវបុប្ផាលាក់ខ្លួន ឬក៏ផ្លូវអន្ទង់អាំង ក្នុងខេត្តពោធិ៍សាត់នេះ ជាផ្លូវដែលលំបាកកសាងជាងគេក្នុងស្រុកខ្មែរ មានប្រវែង ១៨២,១៦ គម និងចំណាយថវិការសរុបប្រមាណ ១៣២,៨០ លានដុល្លាសហរដ្ឋអាមេរិកឯណោះ។
ក្រោយពេលស្ថាបនារួច ភ្ញៀវទេសចរណ៍ជាតិ អន្តរជាតិ បាននាំគ្នាធ្វើដំណើរទៅលេងកំសាន្តតាមដងផ្លូវជាហូរហែ ហើយបានគយគន់មិនជិនណាយជាមួយនឹងសម្រស់ធម្មជាតិពិតៗ ពិសេសត្រង់ចំណុចភ្នំ១៥០០ម៉ែត្រ ដែលមានទេសភាពស្រស់ត្រកាល មានជ្រោះជ្រងជ្រលងដងអូរ ផ្លូវឡើងចុះភ្នំបត់បែនដូចអន្ទង់អាំង គួរឲ្យគាប់ចិត្តដិតអារម្មណ៍ជាទីបំផុត។
ប្រជាពលរដ្ឋស្រុកវាលវែងបានអរគុណរកអ្វីប្រៀបផ្ទឹមពុំបានចំពោះប្រមុខរាជរដ្ឋាភិបាល ដែលបានកែប្រែតំបន់សមរភូមិគ្រាប់រំសេវ ឲ្យក្លាយទៅជាតំបន់អភិវឌ្ឍន៍ និងទេសចរណ៍ធម្មជាតិ។ ភ្ញៀវទេសចរណ៍ដែលធ្វើដំណើរទៅកាន់ច្រកថ្មដា នឹងត្រូវឆ្លងកាត់ភ្នំ១៥០០ម៉ែត្រជាមុនសិន ដើម្បីផ្ដិតយករូបភាព ស្រូបខ្យល់បរិសុទ្ធ ឬក្រាលកន្ទេលទទួលទានអាហារលើកំពូលភ្នំ បើមិនដូច្នេះទេអាចបន្តដំណើរទៅមុខបន្តិចទៀត នឹងមានកន្លែងកំសាន្ដមួយឈ្មោះថា (អូរដាតូច) ។ នៅទីនោះមានលក់បាយម្ហូបកុម្មង់ ខ្យូសអង្គុយ មានទឹកហូរតិចៗ អាចលុបលាងមុខបានសម្រាប់ខែប្រាំង ប៉ុន្តែបើខែវស្សាវិញ ទឹកត្រជាក់ថ្លាយង់ហូរលើផ្ទាំងថ្មតូចធំ អាចងូតលេងកំសាន្តយ៉ាងសប្បាយរីករាយ។
ចេញពីអូរដាតូច ប្រហែល០៩គម នឹងដល់ច្រកថ្មដា (ព្រំដែនកម្ពុជា ថៃ) ដែលរាជរដ្ឋាភិបាលនៃប្រទេសទាំងពីរ ក៏ដូចអភិបាលខេត្តពោធិ៍សាត់ និងអភិបាលខេត្តត្រាត បានព្រមព្រៀងគ្នាបើកជាច្រកសេដ្ឋកិច្ចពិសេស ដើម្បីដោះដូរទំនិញគ្នាទៅវិញទៅមក។
នៅពេលដឹងថា បើកច្រកសេដ្ឋកិច្ចពិសេសភ្លាម បងប្អូនប្រជាពលរដ្ឋដែលរស់នៅឃុំថ្មដា ឃុំអន្លង់រាប ឃុំអូរសោម និងឃុំដទៃទៀត ក្នុងស្រុកវាលវែង បាននាំគ្នាដាំដំណាំកសិឧស្សាហកម្មជាច្រើនពិសេស កៅស៊ូ ម្រេច ដំឡូងមី… និងដំណាំឈើហូបផ្លែដូចជា ទុរ៉េន ប៊័រ ស្វាយ តាង៉ែន ក្រូចពោធិ៍សាត់ ខ្នុរ ម្នាស់ ចេក ល្ហុង ស្រកានាគ ពោត សណ្ដែក…។ល។ ដើម្បីលក់ឲ្យឈ្មួញកណ្ដាល ឬភ្ញៀវទេសចរណ៍ដែលទៅលេងទីនោះ។
កាលសម្ដេចតេជោសម្ភោធផ្លូវជាតិលេខ៥៥ គឺបានបន្ដបើកការដ្ឋាសាងសង់ផ្លូវជាតិលេខ១០ មួយខ្សែទៀតប្រវែង ១៩៨,៧១គម តភ្ជាប់ពីស្រុកសំឡូត ខេត្តបាត់ដំបង ឆ្លងកាត់ឃុំក្រពើពីរ ឃុំប្រមោយ ឃុំអូរសោម ស្រុកវាលវែង ខេត្តពោធិ៍សាត់ ទៅដល់ក្រុងខេមរៈភូមិន្ទខេត្តកោះកុង។
ផ្លូវជាតិលេខ៥៥ ឬផ្លូវអន្ទង់អាំង ឬក៏ផ្លូវបុប្ផាលាក់ខ្លួន និងផ្លូវជាតិលេខ១០នេះ ជាសរសៃឈាមសេដ្ឋកិច្ចដ៏មានសក្ដានុពលរបស់កម្ពុជា នឹងក្លាយជាផ្លូវបង្កើនបរិយាកាស វិនិយោគ ពាណិជ្ជកម្ម ទេសចរណ៍ កិច្ចសហប្រតិបត្តិការល្អនៅតាមព្រំដែន បង្កើតមុខរបរ បង្កើនប្រាក់ចំណូលគ្រួសារ លើកកម្ពស់សុខមាលភាពសង្គម និងការអប់រំជូនប្រជាពលរដ្ឋ ដើម្បីឈានទៅដល់ការកាត់បន្ថយភាពក្រីក្របានយ៉ាងឆាប់រហ័ស៕ (កែសម្រួលដោយ ៖ បុប្ផា)
ចែករំលែកព័តមាននេះ