ប្រទេសគុយវ៉ែត ៖ តាមប្រភពព័ត៌មាន Oddity Central បានឱ្យដឹងថា ដោយសារតែការកំណត់បំរាមគោចរលើប្រជាជននៅក្នុងប្រទេសគុយវ៉ែត ក្នុងកំឡុងពេលកូវីដ១៩ បានធ្វើឱ្យជីវិតរបស់បុរសមានប្រពន្ធច្រើនកាន់តែមានភាពស្មុគស្មាញ។ គេកំណត់ឱ្យប្រជាជននៅតែក្នុងផ្ទះដោយមិនឱ្យចេញក្រៅ…
ប្រទេសគុយវ៉ែត ៖ តាមប្រភពព័ត៌មាន Oddity Central បានឱ្យដឹងថា ដោយសារតែការកំណត់បំរាមគោចរលើប្រជាជននៅក្នុងប្រទេសគុយវ៉ែត ក្នុងកំឡុងពេលកូវីដ១៩ បានធ្វើឱ្យជីវិតរបស់បុរសមានប្រពន្ធច្រើនកាន់តែមានភាពស្មុគស្មាញ។ គេកំណត់ឱ្យប្រជាជននៅតែក្នុងផ្ទះដោយមិនឱ្យចេញក្រៅ បើគ្មានការចាំបាច់។ ដូចនេះហើយបុរសមានប្រពន្ធច្រើន មានបញ្ហាត្រង់ថា មិនអាចសម្រេចចិត្តថា នឹងទៅនៅផ្ទះជាមួយនឹងប្រពន្ធមួយណា ហើយក៏មិនអាចទៅលេងប្រពន្ធផ្សេងទៀតបានដូចកាលពីមុន។
អ្នកមានប្រពន្ធចាប់ពី២ឡើងទៅ នៅប្រទេសគុយវ៉ែត ដែលមានប្រហែល ៨% នៃប្រជាជន កំពុងតែជួបទុក្ខលំបាក។ ប្រទេសគុយវ៉ែត បានដាក់ចេញនូវវិធានដ៏តឹងរឹងបំផុតមួយចំនួន ដើម្បីបញ្ឈប់ការរីករាលដាលនៃវីរុសកូរ៉ូណាថ្មី នៅមជ្ឈឹមបូព៌ា រួមទាំងការចាក់សោរទូទាំងប្រទេស រហូតដល់ថ្ងៃទី៣០ ខែឧសភា ដោយព្យួររាល់សកម្មភាពក្រៅតែពីវិស័យឯកជន និងសាធារណៈ និងវិស័យចាំបាច់ផ្សេងទៀត ហើយបង្ខំឱ្យមានបំរាម គោចរដែលអនុញ្ញាតឱ្យមនុស្សចេញក្រៅទិញរបស់របរប្រើប្រាស់ និងម្ហូបរៀងរាល់៦ថ្ងៃម្តង។
លោក Abu Othman អាយុ៤៥ឆ្នាំ ដែលជាបុរសមានប្រពន្ធច្រើន និងមានកូនសរុបដល់ទៅ១០នាក់ បានត្អូញត្អែរប្រាប់សារព័ត៌មាន AFP ថា ៖ «ជីវិតរបស់ខ្ញុំកាន់តែមានភាពស្មុគស្មាញហើយ។ ខ្ញុំត្រូវចល័តពីប្រពន្ធមួយទៅប្រពន្ធមួយ។ ពេលនេះ ខ្ញុំត្រូវកុហកប៉ូលិសថា គ្រួសារមានរឿងធំ ហើយត្រូវដោះស្រាយជាបន្ទាន់ ដើម្បីអាចទៅជួបប្រពន្ធមួយទៀតបាន»។
សមាជិកនៃគណៈកម្មាធិការម្នាក់ បានឆ្លើយតបទៅនឹងការរិះគន់ថា ៖ «អ្នកដែលមានប្រពន្ធច្រើន គឺត្រូវតែគោរពតាមបំរាមគោចរ ដោយពួកគេអាចនឹងត្រូវសម្រេចចិត្តនៅជាមួយប្រពន្ធមួយណាជាក់លាក់មួយរយៈសិន ឬត្រូវលែងលះប្រពន្ធមួយណាចោលសិន»។
ដោយសារតែឃើញមានការពិបាកសម្រេចចិត្ត មានអ្នកខ្លះបានធ្វើការសរសេរជាឆ្នោតចាប់វិញម្តង ដោយមានដាក់ឈ្មោះប្រពន្ធសរុបទាំងអស់របស់ខ្លួន ហើយធ្វើការចាប់ដូចជាឆ្នោតផ្សងសំណាងអ៊ីចឹង។ ការធ្វើបែបនេះ គឺប្រពន្ធមិនគិតថា មានភាពលម្អៀងនោះទេ៕ ដកស្រង់ចេញពីវេបសាយ ៖ odditycentral (កែសម្រួលដោយ ៖ បុប្ផា)
ចែករំលែកព័តមាននេះ