រាជធានីភ្នំពេញ ៖ ដើមក្ងោកមួយដើម បានដួលរលំរលើងទាំងឫសសង្កត់រថយន្ត១គ្រឿងខណៈមានភ្លៀងធ្លាក់និងខ្យល់កន្ត្រាក់បោកបក់យ៉ាងខ្លាំង នៅកណ្តាលរាជធានីភ្នំពេញ ។ ហេតុការណ៍នេះ បង្កឲ្យមានការកកស្ទះចរាចរណ៍កាលពីវេលាម៉ោងប្រមាណ៥និង៣០នាទីល្ងាច ថ្ងៃទី១៩ ខែឧសភា ឆ្នាំ២០២០ នៅចំណុចស្តុបសន្ធរម៉ុក តាមមហាវិថីកម្ពុជាក្រោម ក្នុងសង្កាត់ផ្សារដេប៉ូទី៣ ខណ្ឌទួលគោក ។
ទោះបីជាយ៉ាងណា គ្រោះថ្នាក់នេះពុំបណ្តាលឲ្យមានមនុស្សរងរបូសឡើយ ។ រថយន្តដែល ត្រូវដើមឈើរលំសង្កត់នេះម៉ាកម៉ាស្តា ពណ៌សពាក់ផ្លាកលេខភ្នំពេញ ២AC-៥៧៧៦ បើកបរ ដោយបុរសម្នាក់មិនស្គាល់អត្តសញ្ញាណ ។ តាមព័ត៌មានឲ្យដឹងថា ខណៈកំពុងមានភ្លៀងធ្លាក់លាយឡំដោយខ្យល់កន្ត្រាក់នោះ រថយន្តម៉ាស្តានេះធ្វើដំណើរតាមមហាវិថីកម្ពុជាក្រោមពីខាងកើតទៅខាងលិច ។ លុះទៅដល់ចំណុចខាងលើ ស្រាប់តែដើមក្ងោកមួយដើមធំបានរលើងទាំងឫសដួលរំលំសង្កត់រថយន្តផ្នែកខាងក្រោយតែម្តង ។
ទោះជាយ៉ាងណា នៅក្នុងគ្រោះថ្នាក់នេះពុំបណ្តាលឲ្យអ្នកបើកបររងរបួស គីគ្រាន់តែបណ្តាលឲ្យរថយន្តរងការខូចខាតប៉ុណ្ណោះ ព្រមទាំងព្រលឹងនៅចុងសក់ ។ បន្ទាប់មក គេឃើញនគរបាលព្រមទាំងអាជ្ញាធរសង្កាត់ និងខណ្ឌទួលគោកបានទៅសម្រួលចរាចរណ៍ ហើយកាត់ដើមក្ងោកនោះភ្លាមៗយកចេញដើម្បីកុំឲ្យស្ទះផ្លូវ ។
ជុំវិញគ្រោះថ្នាក់ខាងលើនេះ គេពុំដឹងថា តើខាងណាជាអ្នកទទួលខុសត្រូវឡើយ ។
គួរបញ្ជាក់ថា នាវេលាម៉ោងប្រមាណ៥ល្ងាចថ្ងៃទី១៩ ខែឧសភានោះ ភ្លៀងបានបង្អុរចុះយ៉ាងខ្លាំងនៅកណ្តាលរាជធានីភ្នំពេញ រួមទាំងមានខ្យល់បោកបកយ៉ាងខ្លាំងផងដែរ ។ ចំណែកដើមក្ងោក១ដើមនោះ ដោយសារឫសមានសភាពពុកផុយទៅហើយ ទើបរលើងទាំងជំហរតែម្តង ។
នាល្ងាចថ្ងៃនោះ នៅតាមដងផ្លូវនានាក៏ត្រូវទឹកភ្លៀងជន់លិច ដោយឡែកដងផ្លូវនានានៅ ផ្សារព្រៃទា និងផ្សារឯករាជ្យ២ ក៏ត្រូវទឹកជន់លិចរយៈពេលជាច្រើនម៉ោងដែរ ព្រោះទឹកហូមមិនទាន់ ។មានការកត់សម្គាល់ថា នេះជាករណីដើមក្ងោកទី២ហើយដែលដួលរលំសង្កត់លើរថយន្ត បណ្តាលឲ្យខូចខាត ។ ករណីទី១ ដើមក្ងោកនៅរមណីយដ្ឋានវត្តភ្នំ បានរលំសង្កត់រថយន្ត១គ្រឿងដែលចតនៅក្រោមដើមក្ងោកនោះ ។
ឯនៅលើកទី២នេះជារឿងចៃដន្យ ដែលរថយន្តកំពុងបើកបរពេលកំពុងមានភ្លៀងធ្លាក់និងខ្យល់កន្ត្រាក់ ស្រាប់តែដើមក្ងោករលើងឫសដួលសង្កត់តែម្តង ។ ចាត់ទុកថា ជាគ្រោះល្អដែរដែលសង្កត់ចំតួរថយន្តខាងក្រោយ បើចំខាងមុខវិញច្បាស់ជាមានអ្នករងគ្រោះមិនខាន ៕
ចែករំលែកព័តមាននេះ