សហព័ន្ធកីឡាវាយកូនបាល់អន្តរជាតិ (ITF) បានលើកឡើងថា ខ្លួនកំពុងធ្វើការលើវិធានការណ៍បន្ថែមទៀត រួមទាំងមូលនិធិសង្គ្រោះថ្មី ដើម្បីគាំទ្រដល់កីឡាករដែលស្ថិតនៅចំណាត់ថ្នាក់ទាប ដែលកំពុងជួបវិបត្តិដោយសារតែការចាក់សោរប្រទេស ដែលបណ្តាលមកពីវីរុសកូវីដ-១៩ ។
ព្រឹត្តិការណ៍ការប្រកួតកីឡាវាយកូនបាល់អាជីពជាច្រើនរដូវកាលនេះ ត្រូវបានពន្យារពេល និងលុបចោលនៅដើមខែមីនា ហើយនឹងត្រូវបិទទ្វាររហូតដល់ចុងខែកក្កដា ដោយសារការរឹតត្បិតការធ្វើដំណើរដែលប្រទេសជាច្រើនបានអនុវត្ត ដើម្បីទប់ស្កាត់ការរីករាលដាលនៃវីរុសនេះ ។
កាលពីដើមខែឧសភា ITF, ATP, WTA និងអង្គភាពគ្រប់គ្រង Grand Slams ទាំង៤ បានប្រមូលថវិកាចំនួនជាង ៦លានដុល្លារអាមេរិក ដើម្បីជួយដល់កីឡាករដែលមានចំណាត់ថ្នាក់ទាបប្រមាណ ៨០០នាក់ដែលពឹងផ្អែកតែទៅលើការឈ្នះការប្រកួតដើម្បីរកប្រាក់ចិញ្ចឹមជីវិត ។
ITF បាននិយាយថា វិធានការណ៍ថ្មីរបស់ខ្លួននឹងរួមបញ្ចូលទាំងមូលនិធិជំនួយ ដើម្បីជួយដល់កីឡាករ ដែលមានចំណាត់ថ្នាក់ចន្លោះពី ៥០១ ទៅ ៧០០ ដោយមិនត្រូវបានរាប់បញ្ចូលក្នុងកម្មវិធីផ្តល់ជំនួយផ្សេងទៀតឡើយ ។ ព័ត៌មានលម្អិតបន្ថែមទៀត នឹងត្រូវប្រកាសបន្ទាប់ពីកិច្ចប្រជុំក្រុមប្រឹក្សាភិបាលរបស់ខ្លួន នៅថ្ងៃទី២ ខែមិថុនាខាងមុខ ។
លោក David Haggerty ប្រធាន ITF បានថ្លែងនៅក្នុងសេចក្តីថ្លែងការណ៍មួយកាលពីល្ងាចថ្ងៃច័ន្ទថា «យើងកំពុងធ្វើអ្វីគ្រប់យ៉ាងដោយអស់ពីលទ្ធភាព ដើម្បីធានាថាកីឡាករដែលមានទេពកោសល្យក្នុងស្ថាប័ននេះ ទទួលបានការគាំទ្រដែលពួកគេត្រូវការ និងបន្តការអភិវឌ្ឍសមត្ថភាពរបស់ពួកគេ អំឡុងពេលមានវិបតិ្តនេះ» ៕
ចែករំលែកព័តមាននេះ