រឿងរ៉ាវពុករលួយរបស់អតីតមន្ត្រីសហ ព័ន្ធបាល់ទាត់កម្ពុជាឈានដល់ណាហើយ
- ភ្នំពេញ
រាជធានីភ្នំពេញ ៖ យោងតាមការឱ្យ ដឹងពីលោកគុជ គីមឡុង ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញថា លោក រស់ ពិសិដ្ឋ…
រាជធានីភ្នំពេញ ៖ យោងតាមការឱ្យ ដឹងពីលោកគុជ គីមឡុង ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញថា លោក រស់ ពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ បានចោទប្រកាន់លោក ម៉ៃ តុលា អតីតអគ្គលេខាធិការសហព័ន្ធបាល់ទាត់កម្ពុជា ពីបទរំលោភលើទំនុកចិត្ត ខណៈរឿងក្ដីនេះកំពុងស្ថិតក្នុងដំណាក់កាលស៊ើបសួរនៅឡើយ។
ជាមួយគ្នានេះលោកព្រះរាជអាជ្ញារងរូបនេះក៏បានលើកយកមាត្រាដែលបានចែងក្នុងការផ្ដន្ទាទោសថា«បុគ្គលដែលប្រព្រឹត្តអំពើណាមួយ ជាការរំលោភលើទំនុកចិត្ត ក្នុងគោលបំណងទទួលផលប្រយោជន៍ដល់ខ្លួន ឬក្នុងគោលបំណងធ្វើឲ្យខូចខាតដល់នីតិបុគ្គល ហើយបានបណ្តាលឲ្យមានការខូចខាតទ្រព្យសម្បត្តិរបស់នីតិបុគ្គលនោះ ត្រូវផ្ដន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀលតាមមាត្រា៣៩៣»។
គួររំលឹកឡើងវិញថា កាលពីថ្ងៃទី៦ ឧសភា ឆ្នាំ២០២០កន្លងទៅ សហព័ន្ធបាល់ទាត់កម្ពុជា បានចេញសេចក្ដីប្រកាសព័ត៌មាន ព្យួរអតីត និងមន្ត្រីរបស់ខ្លួនចំនួន៤រូបរួមមាន លោក ម៉ៃ តុលា
អគ្គលេខាធិការរង, លោក ឆាំង ពិសិដ្ឋ ប្រធានការិយាល័យប្រកួត, លោក ទុយ វិចិ្ឆកា ប្រធានការិយាល័យអាជ្ញាកណ្ដាល និងលោក គល់ សុភារម្យ ប្រធានការិយាល័យរដ្ឋបាល មិនឲ្យពាក់ព័ន្ធសកម្មភាពបាល់ទាត់មួយជីវិត ដោយសារតែអ្នកទាំងបួនប្រព្រឹត្តកំហុសឆ្គងរំលោភសេចក្ដីទុកចិត្តពាក់ព័ន្ធនឹងថវិកាគម្រោងអភិវឌ្ឍន៍បាល់ទាត់ទទួលបានពីក្រុមហ៊ុនឯកជនមួយ។
លោក កែវ សារ៉េត អគ្គលេខាធិការសហព័ន្ធបាល់ទាត់កម្ពុជា បានបញ្ជាក់ទៀតថា បន្ទាប់ពីកិច្ចប្រជុំរបស់គណៈកម្មាធិការប្រតិបត្តិបានរកឃើញថា កំហុសនេះមិនអាចលើកលែងឲ្យពួកគេទាំង៤នាក់បាន ទើបសម្រេចដាក់ពិន័យតាមរយៈការដកតំណែង និងដាក់បម្រាមមិនឲ្យធ្វើសកម្មភាពកីឡាបាល់ទាត់អស់មួយជីវិត ។
បន្ថែមពីលើការពិន័យ ឬព្យួរមន្ត្រីទាំង៤ពីគ្រប់សកម្មភាពបាល់ទាត់អស់មួយជីវិតនេះ លោក ម៉ៃ តុលា ក៏ត្រូវបានសហព័ន្ធបាល់ទាត់កម្ពុជាបញ្ជូនសំណុំរឿងពុករលួយទៅកាន់តុលាការដើម្បីចាត់
វិធានការតាមផ្លូវច្បាប់ជាធរមានផងដែរ ។
ជុំវិញបញ្ហានេះ លោក កែវ សារ៉េត បានបកស្រាយថា៖ «កាលដែលលោក ម៉ៃ តុលា មានកំហុសធ្ងន់ធ្ងរជាងគេ ដោយសារគាត់ជាប្រធានក្រុមដែលត្រូវទទួលខុសត្រូវ ហើយបើយើងមិនចាត់ការរឿងនេះ ទុកឲ្យបែកធ្លាយដល់ FIFA គឺ FIFA នឹងពិន័យ FFC ធ្ងន់ធ្ងរជាងនេះ»។
លោក កែវ សារ៉េត បន្តថា ចំណាត់ការរបស់សហព័ន្ធបាល់ទាត់កម្ពុជាទៅលើអតីតមន្ត្រីទាំង៤រូបខាងលើជាការធ្វើកំណែទម្រង់ស៊ីជម្រៅនៅក្នុងសហព័ន្ធបាល់ទាត់កម្ពុជាស្របតាមគោលការណ៍សហព័ន្ធកីឡាបាល់ទាត់អន្តរជាតិ (FIFA) និងសហព័ន្ធកីឡាបាល់ទាត់អាស៊ី (AFC) ដែលតែងតែលើកទឹកចិត្តឲ្យបោសសម្អាតអំពើពុករលួយក្នុងវិស័យកីឡាបាល់ទាត់ដ៏មានប្រជាប្រិយភាពមួយនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ