កាត់​សម្អាត​គល់ឈើ​ពុក​ផុយ និង​ក្រី​មែក​ឈើ​ដែល​​អាចបង្ក​​ហានិភ័យ​​មកលើប្រា​សាទ


ខេត្ត​សៀម​រា​ប ៖ ​អ្នកជំនាញ​នៃ​គណៈ​ក​ម្មា​ធិ​ការ​អន្តរជាតិ​សម្របសម្រួល​កិច្ច​គាំពារ និង​អភិវឌ្ឍន៍​តំបន់​អង្គរ​(ICC-Angkor) ក្នុង​កិច្ចប្រជុំ​ពេញអង្គ​លើក​ទី​២៦ និង​ប្រជុំ​បច្ចេកទេស​លើក​ទី​៣៣ និង​តាម​ការ​អង្កេត​យ៉ាង​យកចិត្តទុកដាក់​ពី​ក្រុម​គ្រប់​គ្រង​ហានិភ័យ​ដើមឈើ​របស់​នាយក​ដ្ឋា​ន​គ្រប់គ្រង​ព្រៃឈើ ទេសភាព​វប្បធម៌ និង​បរិស្ថាន នៃ​អាជ្ញាធរ​ជាតិ​អប្សរា បាន​និង​កំពុង​មមាញឹក​ក្នុង​ការងារ​កាត់​ដើមឈើ​ងាប់, គល់ឈើ​ពុក​ផុយ និង​កាត់​ក្រី​មែកឈើ ដែល​អាចបង្ក​​ហានិភ័យ​មក​លើ​ប្រាសាទតាព្រហ្ម​ចំនួន​១៣​ដើម​។

ដើមឈើ​ទាំងនោះ​រួម​មាន ដើម​ស្ពង់​១​ដើម ដុះ​កោង​ទ្រេត​ខ្លាំង​នៅ​លើ​កំពែង​ប្រាសាទ ត្រូវ​កាត់​ពាក់កណ្តាល​ដើម​ចេញ, គល់​ស្ពង់​ពុក​ផុយ​ចំនួន​៤​កន្លែង, ដើម​ក្រឡាញ់​១​ដើម, ដើម​ពភ្លា​១​ដើម និង​ដើម​ស្ពង់​តូច១​ដើម ដែល​ដុះ​នៅ​លើ​កំពែង​ប្រាសាទ​ក៏​ត្រូវ​កាត់​យក​ចេញ​។ ជាមួយ​គ្នា​​នេះដែរ ក្រុមការងារ​នឹង​ធ្វើការ​កាត់​ក្រី ដើមឈើ​ចំនួន​៥​ដើម ដែល​មាន​មែក​ចំនួន​៩​ត្រូវ​យក​ចេញ ក្នុង​នោះ​មាន​ដើម​ស្ពង់, ដើម​ចំបក់, ដើម​ត្រាង, ដើម​ត្រ​សេក និងដើម​​ពភ្លា​ប្រើស​។

ការងារ​ទាំងនេះ​ធ្វើ​ឡើង​ក្នុង​បំណង​ដើម្បី​បង្ក​ភាព​ងាយស្រួល​ក្នុង​ការ​ជួសជុល​ប្រាសាទ បង្កើត​ឲ្យ​មាន​សោភ័ណ​ភាព​ប្រសើរ​ជាង​មុន ជួយ​សម្រាល​តួ​ដើម​កុំ​ឲ្យ​ដួល​រលំ ជា​ពិសេស​បង្ការ​ផល​ប៉ះពាល់​ខ្លាំង​ដល់​រចនាសម្ព័ន្ធ​ថ្ម​កំពែង​ប្រាសាទ នៅ​ពេល​ដែល​ដើម​របស់​វា​ដុះ​លូតលាស់​កាន់តែ​ធំ​ទៅ​ៗ និង​រួមចំណែក​ក្នុង​ការ ធានា​ដល់​សុវត្ថិភាព​ជូន​ភ្ញៀវ​ទេសចរ​ជាតិ​-​អន្តរជាតិ ដែល​មក​ទស្សនា​ប្រាសាទ​នេះ​ផង​។ ការងារ​នេះ​អាច​នឹង​ប្រើ​រយៈ​ពេល​យូរ ព្រោះ​ត្រូវ​ប្រើ​រន្ទា ដើម្បី​​ដំឡើង​​កាត់​ ដោយសារ​ដើម​ខ្លះ​មានកំ​ពស់​ខ្ពស់ និង​ដុះ​កៀក​នឹង​ប្រាសាទ​៕​ (កែសម្រួលដោយ ៖ ធីតា​)

ព្រឹត្តិការណ៍សង្គម

Sponsored News

ការស្ទង់មតិគេហទំព័រថ្មី




សូម​អរគុណ