ការផ្ទុះជំងឺកូវីដ ១៩ បានបង្កការប៉ះពាល់ដល់សិស្សានុសិស្សជាច្រើនជុំវិញពិភពលោក ប៉ុន្តែនិស្សិតដែលត្រូវបញ្ចប់ការសិក្សាក្នុងឆ្នាំ ២០២០ នេះជួបប្រទះផលប៉ះពាល់ខ្លាំងជាងគេ ។ និស្សិតទាំងនេះត្រូវបានបង្ខំឲ្យចាកចេញពីសាកលវិទ្យាល័យ និងចូលក្នុងទីផ្សារការងារក្នុងកំឡុងពេលដែលសេដ្ឋកិច្ចទទួលរងការប៉ះពាល់ពីកូវីដ ១៩…
ការផ្ទុះជំងឺកូវីដ ១៩ បានបង្កការប៉ះពាល់ដល់សិស្សានុសិស្សជាច្រើនជុំវិញពិភពលោក ប៉ុន្តែនិស្សិតដែលត្រូវបញ្ចប់ការសិក្សាក្នុងឆ្នាំ ២០២០ នេះជួបប្រទះផលប៉ះពាល់ខ្លាំងជាងគេ ។ និស្សិតទាំងនេះត្រូវបានបង្ខំឲ្យចាកចេញពីសាកលវិទ្យាល័យ និងចូលក្នុងទីផ្សារការងារក្នុងកំឡុងពេលដែលសេដ្ឋកិច្ចទទួលរងការប៉ះពាល់ពីកូវីដ ១៩ ។
ដើម្បីចូលរួមអបអរការសម្រេចរបស់និស្សិតដែលបញ្ចប់ការសិក្សាក្នុងឆ្នាំ ២០២០ នេះ អតីតប្រធានាធិបតីសហរដ្ឋអាមេរិកគឺលោក បារ៉ាក់ អូបាម៉ា (Barack Obama) បានចែករំលែកក្នុងវីឌីអូមួយសម្រាប់និស្សិតប្រមាណ ២៧,០០០នាក់ក្នុងសហរដ្ឋអាមេរិក ។
លោកបានមានប្រសាសន៍ថា «ការបញ្ចប់ការសិក្សាពីសាកលវិទ្យាល័យគឺជាការសម្រេចដ៏ធំមួយក្នុងគ្រប់កាលៈទេសៈ ហើយមនុស្សជាច្រើនបានឆ្លងកាត់ច្រើនណាស់ដើម្បីមកដល់ថ្ងៃនេះ ។ អ្នកបានឆ្លងកាត់ឧបសគ្គទាំងក្នុងថ្នាក់និងក្រៅថ្នាក់រៀន ហើយមនុស្សជាច្រើនត្រូវខិតខំយ៉ាងខ្លាំងដើម្បីបង់ថ្លៃការសិក្សា និងមនុស្សមួយចំនួនជាអ្នកដំបូងក្នុងក្រុមគ្រួសារអ្នកដែលបានទទួលការសម្រេចនេះ» ។
លោកក៏បានបន្តលើកឡើងពីស្ថានការផ្សេងៗដែលនិស្សិតបញ្ចប់ការសិក្សាកំពុងតែជួបប្រទះ ព្រមទាំងផលប៉ះពាល់ទៅលើក្រុមស្បែកខ្មៅ និងការបាញ់សម្លាប់ជនជាតិស្បែកខ្មៅម្នាក់ខណៈដែលលោករត់ហាត់កីឡាក្នុងពេលថ្មីៗនេះផងដែរ ។
ក្រៅពីនេះហើយ លោកបានផ្តល់នូវដំបូន្មានសំខាន់ៗចំនួនបីដែលមានដូចជា ដោះស្រាយបញ្ហាដែលសហគមន៍ខ្លួនកំពុងជួបប្រទះ បង្កើតផ្លូវសម្រាប់អ្នកដទៃ និងធ្វើខ្លួនជាគំរូល្អសម្រាប់អ្នកដទៃ ។
អតីតប្រធានាធិបតីខាងលើបានបន្ថែមថា អ្នកទាំងអស់គ្នាជាគំរូសម្រាប់អ្នកដទៃហើយ មិនថាអ្នកចង់ធ្វើឬមិនធ្វើទេ ។ លោកបានបន្តថា អ្នកបានខិតខំរហូតទទួលបានសញ្ញាប័ត្រនេះ ។ អ្វីៗគឺនៅលើអ្នកថាអ្នកនឹងប្រើវាយ៉ាងដូចម្តេច ៕
ចែករំលែកព័តមាននេះ