តរុណីហួត គឹមហុង រៀបរាប់ពីខ្សែជីវិតរបស់ខ្លួននៅលើវិថីបាល់ទាត់នារី
- ភ្នំពេញ
រាជធានីភ្នំពេញ ៖ កីឡាការិនីបាល់ទាត់ជម្រើសជាតិកម្ពុជា១រូប ឈ្មោះ ហួត គឹមហុង កាលពីដើមខែមេសា ឆ្នាំ ២០២០ កន្លងទៅនេះ…
រាជធានីភ្នំពេញ ៖ កីឡាការិនីបាល់ទាត់ជម្រើសជាតិកម្ពុជា១រូប ឈ្មោះ ហួត គឹមហុង កាលពីដើមខែមេសា ឆ្នាំ ២០២០ កន្លងទៅនេះ បានផ្តល់កិច្ចសម្ភាសន៍នៅលើគេហទំព័ររបស់សហព័ន្ធបាល់ទាត់ពិភពលោក (FIFA) បង្ហើបឱ្យដឹងអំពីខ្សែជីវិតរបស់ខ្លួននៅលើវិថីបាល់ទាត់ ដែលផ្តើមចេញពីក្មេងកំព្រាមួយរូប។
ហួត គឹមហុង បាននិយាយពេលកំពុងរៀនតាមអនឡាញនៅផ្ទះមិត្តរបស់នាងឯទីក្រុង Marcellus នៃរដ្ឋ New York អំឡុងពេលជំងឺ COVID-19 កំពុងរាតត្បាតថា ខ្លួន(គីមហុង)
និងបងប្អូន៥នាក់ បានរស់នៅមណ្ឌលកុមារកំព្រាមួយកន្លែងក្នុងខេត្តបាត់ដំបងតាំងពីឆ្នាំ២០០៨ ពោលគឺចាប់តាំងពីម្តាយឪពុករបស់នាងបានលែងលះគ្នា ។
កីឡាការនីវ័យ២២ឆ្នាំរូបនេះបានបន្តថា សាលាបណ្តុះបណ្តាលយុវជន SALT ត្រូវបានបង្កើតឡើងដោយគម្រោងរបស់អង្គការក្រៅរដ្ឋាភិបាលNGOគាំទ្រដោយ FIFA ហើយនាងទទួលបានការបណ្តុះបណ្តាល និងបង្វឹកដោយលោក Sam Schweingruber ដែលជាគណៈគ្រប់គ្រងរបស់ SALT Academy ផ្ទាល់តែម្តង ។
គឹមហុងនិយាយថា៖«ខ្ញុំពេញចិត្តនឹងអ្វីដែលខ្ញុំកំពុងធ្វើណាស់ក្នុងនាមជាកីឡាការិនីបាល់ទាត់នេះ ប៉ុន្តែខ្ញុំក៏បានជួបឧបសគ្គក្នុងជីវិត ក្រោយពីខ្ញុំលេងបាល់ទាត់ដែរ ។ ឧបសគ្គគឺបងប្រុស និងបងស្រីរបស់ខ្ញុំ មិនចង់ឱ្យខ្ញុំលេងវានោះទេ ហើយពួកគេតែងតែវាយខ្ញុំ និងឱ្យខ្ញុំធ្វើការងារផ្ទះជាច្រើន ដើម្បីហាមឃាត់ឱ្យខ្ញុំឈប់លេងបាល់ តែខ្ញុំមិនអាចឈប់បានទេ ព្រោះខ្ញុំរីករាយ និងសប្បាយចិត្តពេលណាដែលខ្ញុំបានប៉ះបាល់»។
ស្ថិតនៅក្នុងក្រុម Mighty Girl ដែលជាក្រុមបាល់ទាត់នារីរបស់សាលាបណ្តុះបណ្តាល SALT Academy គឹមហុង បានចំណាយពេល ៦ឆ្នាំនៅទីនោះ មុនចាកចេញទៅចូលរួមក្លិបធំ ភ្នំពេញក្រោន នៅឯភ្នំពេញ និងក៏ដឹកនាំក្រុមយុវជនអាយុក្រោម១៤ឆ្នាំផងដែរនៅទីនោះ។
នៅឆ្នាំ ២០១៨ គឹមហុង ស្រាប់តែទទួលបានឱកាសកោះហៅឱ្យចូលរួមក្នុងក្រុមជម្រើសជាតិបាល់ទាត់នារី និងទទួលបានតួនាទីជាប្រធានក្រុមទៀតផង ។ កីឡាការិនីរូបនេះ ស៊ុតបញ្ចូលទី ៦គ្រាប់ម្នាក់ឯង និងបញ្ជូនបាល់ឱ្យមិត្តរួមក្រុមទាត់បញ្ចូលទី ៣គ្រាប់ យកឈ្នះលើទីម័រខាងកើត១២-០ក្នុងការប្រកួតផ្លូវការដំបូងបង្អស់របស់ក្រុមជម្រើសជាតិនារីនៅថ្ងៃទី៣០ ខែមិថុនា ឆ្នាំ២០១៨។
នាងនិយាយថា៖«ការប្រកួតបាល់ទាត់នារីក្នុងប្រទេសកម្ពុជា គឺពិតជាមិនរីកចម្រើនខ្លាំងដូចទៅនឹងប្រទេសដទៃក្នុងទ្វីបអាស៊ីនោះទេ។ វប្បធម៌ក្នុងតំបន់ ក្មេងស្រី គឺត្រូវធ្វើការងារផ្ទះ និងរៀបមង្គលការពេលធំពេញវ័យប៉ុណ្ណោះ អ៊ីចឹងហើយទើបខ្ញុំចង់ជួយនិងរួមចំណែកអភិវឌ្ឍកម្រិតលេងរបស់យើងឱ្យខ្ពស់»៕ (កែសម្រួលដោយ ៖ បុប្ផា)
ចែករំលែកព័តមាននេះ