ខេត្តសៀមរាប ៖ កងរាជអាវុធហត្ថលើផ្ទៃប្រទេស និងអាវុធហត្ថខេត្ត សហការជាមួយកម្លាំងរដ្ឋបាលព្រៃឈើ និងសមត្ថកិច្ចមូលដ្ឋានបានបង្ក្រាបទីតាំងសិប្បកម្មកែច្នៃឈើល្មើសច្បាប់មួយ នៅវេលាម៉ោង៣រសៀល ថ្ងៃទី៨ ខែឧសភា ឆ្នាំ២០២០…
ខេត្តសៀមរាប ៖ កងរាជអាវុធហត្ថលើផ្ទៃប្រទេស និងអាវុធហត្ថខេត្ត សហការជាមួយកម្លាំងរដ្ឋបាលព្រៃឈើ និងសមត្ថកិច្ចមូលដ្ឋានបានបង្ក្រាបទីតាំងសិប្បកម្មកែច្នៃឈើល្មើសច្បាប់មួយ នៅវេលាម៉ោង៣រសៀល ថ្ងៃទី៨ ខែឧសភា ឆ្នាំ២០២០ នៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ។ ខណៈនោះម្ចាស់ទីតាំងបានរត់គេចខ្លួនបាត់ ។
មន្ត្រីអាវុធហត្ថខេត្តសៀមរាប ឲ្យដឹងថា នៅក្នុងប្រតិបត្តិការនេះមានការចូលរួមពីអាវុធហត្ថក្រុង និងលោកវរសេនីយ៍ឯកសេង វុទ្ធី មេបញ្ជាការរងខេត្តសៀមរាបសហការជាមួយ កម្លាំងអាវុធហត្ថលើផ្ទៃប្រទេស ក្រោមការដឹកនាំដោយលោកវរសេនីយ៍ឯកភឿក ភារម្យ និងលោកម៉ុង ប៊ុនលីម នាយខណ្ឌរដ្ឋាភិបាលព្រៃឈើខេត្តសៀមរាប សម្របសម្រួលដោយលោកកើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ។
មន្ត្រីដដែលបន្តថា ប្រតិបត្តិការនេះរកឃើញវត្ថុតាងម៉ាស៊ីនរ៉ៃចំនួន២គ្រឿង ឈើប្រភេទលេខ១ចំនួន៣៦ដុំស្មើនឹង១,៥៧៧ម៉ែត្រគូប បានប្រគល់ឲ្យខណ្ឌរដ្ឌបាលព្រៃឈើខេត្តសៀមរាបដើម្បីបន្តនិតិវិធី ។ ទោះជាយ៉ាងណាក្ដីសមត្ថកិច្ចមិនទាន់បញ្ជាក់អត្តសញ្ញាណម្ចាស់ទីតាំងសិប្បកម្មកែច្នៃឈើនោះនៅឡើយទេ ខណៈម្ចាស់ផ្ទះកំពុងគេចខ្លួន ។
ប្រភពបានបង្ហើបថា នៅក្នុងទីរួមខេត្តសៀមរាប មានទីតាំងរោងសិប្បកម្មច្នៃឈើមិនតិចជាង៣០កន្លែង ហើយគេមិនដឹងថាមានច្បាប់ ឬយ៉ាងណានោះទេ ជាពិសេសនៅភូមិខ្នារ សង្កាត់ជ្រាវនេះតែម្តង ។ (កែសម្រួលដោយ ៖ បុប្ផា)
ចែករំលែកព័តមាននេះ