រាជធានីភ្នំពេញ ៖ ក្នុងប៉ុន្មានសប្ដាហ៍នេះ ការប្រកួតប្រដាល់នៅលើសង្វៀននានានៅតែដំណើរការធម្មតាគ្រាន់តែបិទទ្វារមិនឱ្យមានអ្នកចូលទស្សនាដូចមុនប៉ុណ្ណោះ ដើម្បីការពារពីការឆ្លងជំងឺកូវីដ-១៩ ។ ជាមួយនឹងការផ្លាស់ប្ដូរនេះ តើអ្នកប្រដាល់ដែលធ្លាប់មានកម្លាំងស៊ុហ្វខ្លាំងក្លាព្រោះតែសម្រែកអ្នកទស្សនាផ្ទាល់នៅជុំវិញសង្វៀនប្រដាល់នឹងមានអារម្មណ៍ដូចម្ដេចនៅពេលការប្រកួតលែងមានអ្នកផ្ដល់កម្លាំងចិត្តបែបនេះនោះ។
កីឡាករ ហ៊ឹម សារ៉ាន់ ដែលបានឡើងប្រដាល់នៅប៉ុស្តិ៍លេខ៥ កាលពីថ្ងៃទី២ ឧសភា ឆ្នាំ២០២០បញ្ជាក់ពីអារម្មណ៍របស់ខ្លួនមុនឡើងរេញថា ធ្លាប់តែវ៉ៃឱ្យគេមើល ហើយមានអ្នកទស្សនាច្រើនៗ ដល់មកវ៉ៃឱ្យរេញមើលបែបនេះ ដូចយ៉ាងម៉េចយ៉ាងម៉ាទេ ។ លោកអះអាងពីការគ្មានកម្លាំងចិត្តវ៉ៃ ដោយសារតែអ្នកប្រដាល់គឺមិនខុសពីអ្នកចម្រៀងនោះទេ បើច្រៀងលើឆាកហើយគ្មានអ្នកទស្សនា គឺពិតជាខ្វះកម្លាំងចិត្ត។
លោកអះអាងថា ការប្រកួតនៅលើសង្វៀនដែលមានអ្នកទស្សនាច្រើន និងគ្មានអ្នកទស្សនា គឺខុសគ្នាមេឃនិងដី ដោយសារតែពេលមានអ្នកទស្សនា បើប្រកួតចាញ់ប្រៀបល្មមៗ គឺត្រូវតែស៊ូ ហើយរុលទៅមុខ ព្រោះមានអារម្មណ៍ថាខ្មាសបើចាញ់ដោយមិនប្រឹងអស់ពីលទ្ធភាព ឬមិនឈ្នះគូប្រកួត ។ ប៉ុន្តែដល់ពេលប្រកួតគ្មានអ្នកទស្សនា គឺទឹកចិត្តទាំងនោះហាក់មិនសូវមាន ។ ទោះបីយ៉ាងណាលោកបង្ហើបថា ពេលប្រកួតគ្មានអ្នកទស្សនា លោកក៏ស្រួល គូប្រកួតក៏ស្រួល ដោយសារតែភាពជាក់ស្ដែងគឺប្រកួតឱ្យតែចប់ទឹក ព្រោះមិនសូវមានកម្លាំងជំរុញនោះផង ។
លោកប្រកួតនៅក្នុងថ្ងៃនោះ បានឈ្នះពិន្ទុកីឡាករ អ៊ុំ កំសត់ ប៉ុន្តែលោកថា បើធៀបនឹងការប៉ះគ្នាដោយមានអ្នកទស្សនាស្រែកបន្ទរនៅជុំវិញរេញ គឺការប្រកួតគ្មានអ្នកទស្សនាហាក់ស្រួលឈ្នះជាង ។ បើទោះជាការប្រកួតទាំងមូលមានអ្នកទស្សនាតាមការផ្សាយផ្ទាល់រាប់ម៉ឺននាក់ តែលោកនៅតែយល់ថា មិនដូចមានអ្នកទស្សនាផ្ទាល់នោះទេ ទើបលោកមិនសូវចង់ប្រកួតអស់ដៃ ។លោកបានលើកឡើងថា ប្រកួតគ្មានអ្នកមើលហាក់ដូចជាមិនសូវមានន័យនៅពេលវ៉ៃខ្លាំង ឬឈ្នះគូប្រកួតនោះ។
ផ្ទុយពីអារម្មណ៍របស់ហ៊ឹម សារ៉ាន់ កីឡាករជ័យ ស៊ីនេត ដែលបានឡើងប្រកួតនៅលើសង្វៀន
ទូរទស្សន៍អាស៊ីអាគ្នេយ៍បានលើកឡើងថា មិនសូវខុសគ្នានោះទេនៅពេលឡើងវ៉ៃលើរេញដោយគ្មានអ្នកមើល ឬមានអ្នកមើលនោះ ។ លោកថា កីឡាករគ្រប់រូបនៅពេលជក់វ៉ៃលើរេញ មិនសូវ
ខ្វល់ខ្វាយរឿងអ្នកណាមើលឬមិនមើលនោះទេ គឺគិតតែវាយសម្រុក ។ មិនតែប៉ុណ្ណោះលោកចាត់ទុកថា ពេលប្រកួតដោយគ្មានសំឡេងរំខានពីអ្នកទស្សនា ហាក់ធ្វើឱ្យអារម្មណ៍កីឡាករមិនសូវបែកសមាធិ និងអាចពង្រឹងសមត្ថភាពបានល្អ ។ លោកថា កីឡាករខ្លះពេលគ្មានអ្នកទស្សនាអាចពិបាកប្រកួត តែសម្រាប់រូបលោកគឺធម្មតា ។
យ៉ាងណាក៏ដោយលោកបានបញ្ជាក់យ៉ាងខ្លីថា សម្រាប់លោកគឺចង់ឱ្យមានអ្នកទស្សនាផ្ទាល់ច្រើនជាង ដោយសារតែលោកក៏ហាក់ប្លែកអារម្មណ៍នៅពេលការប្រកួតមានតែគណៈកម្មការមើលការខុសត្រូវ។
យោងតាមបរិយាកាស ការប្រកួតមានអ្នកទស្សនា និងគ្មានអ្នកទស្សនា សម្រាប់ការប្រកួតគឺប្រែប្រួលខុសគ្នា ដោយរាល់ពេលមានអ្នកទស្សនា គេឃើញកីឡាករម្នាក់ៗមិនចង់ចាញ់ទេដោយប្រឹងស្ទុះស្ទា ហើយគ្រូបង្វឹកកីឡាករម្ខាងៗក៏មកធ្វើសញ្ញាបញ្ជាចង់ដាច់ដៃដាច់ជើង ប៉ុន្តែចាប់តាំងពីការប្រកួតអត់មានអ្នកទស្សនាគឺមិនឃើញគ្រូបង្វឹកមកជំរុញទេ ហើយការប្រកួតគឺមើលតែចាញ់ប្រៀបល្មមៗ កីឡាករម្ខាងទៀត ក៏បោះបង់ការប្រកួតគឺមិនបន្តតែម្ដង ។
ការប្រកួតដែលបានធ្វើឡើងក៏មិនសូវឃើញគូណាវាយទៅវាយមកឱ្យល្អមើលទាក់ភ្នែកដូចគ្នា ក្នុងពេលដែលគណៈកម្មការក៏មិនសូវជំរុញឱ្យប្រកួតខ្លាំង បើធៀបនឹងពេលសង្វៀនមានអ្នកទស្សនាកកកុញនោះទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ