រាជធានីភ្នំពេញ ៖ លោកអ៊ុក សិទ្ធិជាតិអគ្គនាយកនៃអគ្គនាយកដ្ឋានកីឡា ថ្មីៗនេះបានបញ្ជាក់ថា មកទល់ពេលនេះ លោកមិនទាន់ហ៊ានកំណត់ថាតើការប្រកួតកីឡាជាតិលើកទី៣ដែលគ្រោងធ្វើនៅឆ្នាំនេះនឹងត្រូវបន្តលើកពេលឬក៏ត្រូវលុបចោលនោះទេ ខណៈជំងឺកូវីដ-១៩ ស្ថិតក្នុងលក្ខណៈផុយស្រួយនៅឡើយ ។…
រាជធានីភ្នំពេញ ៖ លោកអ៊ុក សិទ្ធិជាតិអគ្គនាយកនៃអគ្គនាយកដ្ឋានកីឡា ថ្មីៗនេះបានបញ្ជាក់ថា មកទល់ពេលនេះ លោកមិនទាន់ហ៊ានកំណត់ថាតើការប្រកួតកីឡាជាតិលើកទី៣ដែលគ្រោងធ្វើនៅឆ្នាំនេះនឹងត្រូវបន្តលើកពេលឬក៏ត្រូវលុបចោលនោះទេ ខណៈជំងឺកូវីដ-១៩ ស្ថិតក្នុងលក្ខណៈផុយស្រួយនៅឡើយ ។
លោកអ៊ុក សិទ្ធិជាតិ បញ្ជាក់ថា កូវីដ-១៩ មិនមែនជារឿងរបស់កម្ពុជាតែម្នាក់ឯងនោះទេ តែវាជាបញ្ហាកង្វល់របស់ពិភពលោកទាំងមូលធ្វើឱ្យការងារជាច្រើនជាប់គាំងទៅមុខមិនរួចថយក្រោយមិនរួច ។ ជាក់ស្ដែង ការប្រកួតបាល់ទាត់ជម្រុះពិភពលោក ការប្រកួតកីឡាអូឡាំពិកឆ្នាំ២០២០នៅទីក្រុងតូក្យូប្រទេសជប៉ុនក៏ត្រូវលើកពេលប្រកួតដែរ ។ ពេលនេះ អ្វីៗដែលពិភពលោកកំពុងតែគិតនោះគឺកូវីដ-១៩នេះតែម្ដង ។ នេះនៅមិនទាន់និយាយពីការប្រកួតជើងឯកនានាដែលសហព័ន្ធតំបន់ ទ្វីប ឬ ពិភពលោកត្រូវលើកពេល ឬលុបចោលនោះឡើយ ។
ការប្រកួតកីឡាជាតិគឺជាយុទ្ធសាស្ត្ររបស់កម្ពុជាសម្រាប់ឆ្ពោះទៅស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ ។ កម្ពុជាត្រូវការការប្រកួតដែលមានទម្រង់ជាហ្គេមនេះព្រោះវាជួយបង្រៀនដល់មន្ត្រីសហព័ន្ធកីឡាជាតិឲ្យចេះធ្វើការជាក្រុម ចេះរៀបចំការប្រកួត មានគំនិតបណ្ដុះបណ្ដាលមន្ត្រីនានាដែលពាក់ព័ន្ធជាមួយការប្រកួតជាដើម ។
តាមការគ្រោងទុក ការប្រកួតមានជាង៣០ប្រភេទកីឡា ប៉ុន្តែដោយសារកញ្ចប់ថវិកានៅរក្សាទុកដដែលនោះ ក្រសួងអប់រំ យុវជន និងកីឡា មានគម្រោងបន្ថែមនូវប្រភេទកីឡាតែសុំឲ្យសហព័ន្ធនានាបន្ថយចំនួនវិញ្ញាសាវិញ ។
ទោះបីអ្វីៗស្ថិតនៅក្នុងការគិតទុកក៏ដោយប៉ុន្តែទាល់តែបញ្ហាកូវីដ-១៩នៅលើពិភពលោកនេះលែងជាកង្វល់សម្រាប់មនុស្សជាតិ ទើបការនិយាយពីការប្រកួតកីឡាជាតិនឹងច្បាស់លាស់ឡើងវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ