រាជធានីភ្នំពេញ ៖ លោកអុឹម វណ្ណៈ ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី៧ ខែឧសភា ឆ្នាំ២០២០ បានប្រកាសសាលក្រមផ្ដន្ទាទោសជនជាតិនីហ្សេរីយ៉ា២នាក់ ដាក់ពន្ធនាគារក្នុងម្នាក់ៗ៣០ឆ្នាំ និងពិន័យជាប្រាក់ចូលថវិការដ្ឋក្នុងម្នាក់៤០លានរៀល ពីបទ.ដឹកជញ្ជូន រក្សាទុក និងជួញដូរនូវសារធាតុញៀនដោយខុសច្បាប់ ។
សាលក្រមបានសម្រេចធ្វើការលើកលែងចោទប្រកាន់លើស្ត្រីខ្មែរម្នាក់ ដែលពាក់ពន្ធនឹងបទល្មើសគ្រឿងញៀនជាមួយក្រុមជនជាតិនីហ្សេរីយ៉ាងទាំង២ខាងលើនេះដែរ ឲ្យមានសេរីភាពឡើងវិញ បន្ទាប់ពីតុលាការបានបើកការស៊ើបអង្កេតអស់រយៈពេលជាច្រើនខែ ។ សាលក្រមក៏បានបើកផ្លូវឲ្យប្តឹងឧទ្ធរណ៍តាមកំណត់ច្បាប់ បើសិនជាជនជាប់ចោទកើតទុកមិនសុខចិត្តចំពោះការកាត់ក្តីនេះ ។
ជនជាប់ចោទទាំង២នាក់ខាងលើ ក្នុងនោះម្នាក់ឈ្មោះ ONEKANMA EMEKA CHRIST ភេទប្រុស អាយុ៤០ឆ្នាំ (ចាប់ឃុំខ្លួនកាលពីថ្ងៃទី១៥ ខែកុម្ភៈ ឆ្នាំ២០១៩) និងម្នាក់ទៀតឈ្មោះ ALFASANSAFINU INNOSEN ភេទប្រុស អាយុ៣៩ឆ្នាំ (ចាប់ខ្លួនកាលពីថ្ងៃទី២៩ ខែតុលា ឆ្នាំ២០១៩) ។ រីឯស្ត្រីខ្មែរដែលត្រូវបានលើកលែងបទចោទប្រកាន់ឈ្មោះ មាស វាសនា អាយុ៣៧ឆ្នាំ ។
សំណុំរឿងខាងលើនេះត្រូវបានសាលាដំបូងរាជធានីភ្នំពេញបានលើកយកមកបើកសវនាការជំនុំជម្រះទោស កាលពីថ្ងៃទី៧ ខែ មេសា ឆ្នាំ២០២០ ដឹកនាំដោយលោកចៅក្រម អុឹម វណ្ណៈ និង លោក ឆាយ ហុង ជាតំណាងអយ្យការ ។
ពេលសវនាការ ជនជាប់ចោទបានបដិសេធបទចោទប្រកាន់ទាំងស្រុងថា គ្រឿងញៀនដែលសមត្ថកិច្ចចាប់យកនោះ មិនមែនជារបស់ពួកគេទេ ពួកគេគ្រាន់តែជាអ្នកកាន់កញ្ចប់នោះពីមនុស្សម្នាក់ និងយកទៅបន្តឲ្យមនុស្សម្នាក់ទៀត ដោយមិនបានដឹងថា ជាកញ្ចប់គ្រឿងញៀនឡើយ ។
សូមរំលឹកថា ជនសង្ស័យទាំង៣នាក់ខាងលើត្រូវបានកម្លាំងសមត្ថកិច្ចនគរបាលការិយាល័យទី១ នៃមន្ទីរប្រឆាំងគ្រឿងញៀនក្រសួងមហាផ្ទៃបង្ក្រាប និងចាប់ខ្លួនកាលពីថ្ងៃទី១៥ ខែកុម្ភៈ ឆ្នាំ២០១៩ នៅចំណុចមុខស្ថានីយ៍ប្រេងតេលា តាមបណ្តោយផ្លូវលេខ១៧១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ និងនៅចំណុចបន្ទប់ជួលលេខ2F18 រួមទាំងដកហូតថ្នាំញៀនប្រភេទអ៊ិចស្តាស៊ី (MDMA) ចំនួន ៥.០០៦ គ្រាប់ ស្មើនឹងទម្ងន់ជាង២គីឡូក្រាម ។
សមត្ថកិច្ចបានប្រើជំនាញវិធានញុះញង់ បង្ក្រាប និងចាប់ខ្លួនជនសង្ស័យក្នុងបទល្មើសជាក់ស្តែង ប៉ុន្តែជនសង្ស័យនៅតែបដិសេធ ថាគ្រឿងញៀនដែលសមត្តកិច្ចដកហូតនោះមិនមែនជារបស់ពួកគេទេ ៕ (កែសម្រួលដោយ ៖ ធីតា)
ចែករំលែកព័តមាននេះ