តម្លៃម៉ូតូ​​​១៣​ម៉ឺន​រៀល ផាកពិន័យ​ជាង​១០​ម៉ឺន​រៀល ខឹង​ដុត​ចោល​មុខ​ប៉ូលិស​ចរាចរណ៍


ខេត្ត​ប៉ៃលិន ៖ គិត​រហូត​មក​ដល់​ព្រឹក​ថ្ងៃ​ទី​០៧ ឧសភា ២០២០​នេះ គម្រប់​១​ស​ប្ដា​ហ៍​ហើយ ដែល​បុរស​ម្នាក់​មិន​បាន​ចូលខ្លួន​មក​ដោះស្រាយ និង​ទទួលយក​ម៉ូតូ​វិញ​នោះ​ឡើយ បន្ទាប់​ពី​បាន​ដុត​ម៉ូតូ​ខ្លួនឯង​ចោល​នៅ​មុខ​សមត្ថកិច្ច ។ ការ​ដែល​ដុត​នោះ ព្រោះ​ខឹង​នគរបាល​ចរាចរណ៍​ ចាប់​ផាកពិន័យ​សរុបទឹកប្រាក់ ជាង​១០​ម៉ឺន​រៀល ខណៈ​ដែល​ម៉ូតូ​នោះទិញ​អស់​តែ ១៣​ម៉ឺន​រៀល ហើយ​មិន​ទាន់​ឲ្យ​លុយ​គេ​គ្រប់​ទៀត ។

ហេតុការណ៍​ដុត​ម៉ូតូ​ខ្លួនឯង​ចោល បាន​កើតឡើង​តាំងពី​ម៉ោង​៦​និង​៣០​នាទី​ព្រឹក ថ្ងៃ​ទី​០១ ខែឧសភា មក​ម្ល៉េះ ខណៈ​ពេល​នគរបាល​ចុះ​ដាក់​កម្លាំង​តាម​គោលដៅ ដើម្បី​រឹត​បន្តឹង​ច្បាប់​ចរាចរណ៍​ថ្មី ស្ថិត​នៅ​បណ្តោយ​ផ្លូវជាតិ​លេខ​៥៩ ក្នុងភូមិ​ទួល​ខ្ពស់ ឃុំ​ស្ទឹង​ត្រង់ ស្រុក​សាលា​ក្រៅ ខេត្ត​ប៉ៃលិន ។

ពាក់ព័ន្ធ​នឹង​ករណី​ខាងលើ​នេះ បើ​តាមលោក រី តារា អធិការ​នគរបាល​ស្រុក​សាលា​ក្រៅ ក៏​បានប្រាប់កោះសន្តិភាព​អោយ​ដឹង​ថា បុរស​ដែល​ដុត​ម៉ូតូ គឺ​ផ្គើន​នឹង​ច្បាប់​ចរាចរណ៍​ថ្មី ពេល​នេះ​មិន​ទាន់​ចូល​មក​សុំ​ទោស​នគរបាល និង​ដោះស្រាយ​នៅឡើយ​ទេ ។ លោក​បាន​បញ្ជាក់​ថា បើ​បុរស​ខាងលើ​នេះ​នៅ​តែ​រត់គេច​ខ្លួន​មិន​ព្រម​ចូល​ទេ ខាង​លោក​នឹង​រៀបចំ​សំណុំរឿង​បញ្ជូន​ទៅ​ថ្នាក់លើ ដើម្បី​ចាត់ការ​តាម​ច្បាប់ ។

ដោយឡែក បើ​តាម​លោក ង៉ែត ទូច ត្រូវជា​ឪពុកក្មេក​របស់​បុរស​ដុត​ម៉ូតូ​ចោល បាន​ប្រាប់​កោះសន្តិភាព​ឱ្យ​ដឹងដែរ​ថា កូនប្រសារ​គាត់​មានឈ្មោះ ដូង វិ​ឆ័​យ ភេទ​ប្រុស អាយុ​៣៣​ឆ្នាំ មានស្រុក​កំណើត នៅ​ស្រុក​មោង​ឬ​ស្សី ខេត្តបាត់ដំបង បច្ចុប្បន្ន​រស់នៅ​ភូមិ​ទួល​ខ្ពស់ ឃុំ​ស្ទឹង​ត្រង់ ស្រុក​សាលា​ក្រៅ ខេត្ត​ប៉ៃលិន ។

លោក ង៉ែត ទូច ក៏​ជា​មេ​ភូមិ​ទួល​ខ្ពស់ បាន​បន្ត​ថា នៅ​ពេល​នគរបាល​ចុះ​ដាក់​កម្លាំង​តាម​គោលដៅ ដើម្បី​រឹត​បន្តឹង​ច្បាប់​ចរាចរណ៍​ផ្លូវគោក កូនប្រសារ​របស់​គាត់ បាន​ជិះ​ម៉ូតូ​ស៊េរី​ចាស់​១​គ្រឿង អត់​មាន​មួក​សុវត្ថិភាព អត់​ស្លាក​លេខ អត់​កញ្ចក់ និង​គ្មាន​កុង​ទ័​រ ហើយ​ក៏​ត្រូវ​នគរបាល ធ្វើការ​ផាកពិន័យ​អស់​ជាង​១០​ម៉ឺន​រៀល ស្រាប់តែ​កូនប្រសារ​គាត់​ខឹង​បាន​ដុត​ម៉ូតូ​ខ្លួនឯង​ចោល បង្ក​ឱ្យ​មានការ​ភ្ញាក់ផ្អើល​តែ​ម្តង តែ​ត្រូវ​ប្រជាពលរដ្ឋ និង​នគរបាល​នាំ​គ្នា​ជួយ​ពន្លត់​ទាន់​ពេលវេលា រួច​ក៏​អូស​យក​ម៉ូតូ​នោះ ទៅ​រក្សា​ទុក​នៅ​អធិការ​នគរបាល​ស្រុក ផង​ដែរ ។

លោក ង៉ែត ទូច បាន​បន្ថែម​អោយ​ដឹង​ថា មូលហេតុ ដែល​កូនប្រសារ​គាត់​ដុត​ម៉ូតូ​ខ្លួនឯង​ចោល​នោះ ព្រោះ​មន្ត្រី​នគរបាល​ស្ទាក់​ចាប់ ហើយ​ពេល​នោះ រូបគេ​ឃើញ​ម៉ូតូ​ផ្សេង​ទៀត អត់​មួក អត់​កញ្ចក់​ដែរ តែ​ត្រូវ​នគរបាល​បើក​ឱ្យធ្វើ​ដំណើរ​ទៅ​មុខ​ធម្មតា ទើប​កូនប្រសារ​គាត់​ខឹង​ចិត្ត ក៏​ដុត​ម៉ូតូ​ចោល ដើរ​ចេញ​តែ​ម្តង​ទៅ ។

លោក ង៉ែត ទូច បាន​បញ្ជាក់​ថា ម៉ូតូ​ចាស់​១​គ្រឿង​ដែល​កូនប្រសារ ដុត​ចោល គឺ​ម៉ូតូ​ស៊េរី​ឆ្នាំ​១៩៩៧ មាន​តែ​តួ​ដែក ដែល​ទិញ​ក្នុង​តម្លៃ​១៣​ម៉ឺន​រៀល ហើយ​មិន​ទាន់​ឱ្យប្រាក់​គេ​គ្រប់​នៅឡើយ​ទេ ។ ទោះ​យ៉ាងណា រហូត​មក​ដល់​ពេល​នេះ ខាង​លោក​ក៏​ខំប្រឹង​ពន្យល់​ឱ្យ​កូនប្រសារ​ខ្លួន កុំ​បន្ត​លាក់ខ្លួន​បែប​នេះ​ទៀត ។

សូម​ជម្រាប​ដែរ​ថា ភ្លាម​ៗ បន្ទាប់​ពី​ជនសង្ស័យ​ដុត​ម៉ូតូ​ចោល លោក​អភិបាលខេត្ត​ប៉ៃលិន បាន​ហៅ​ឪពុក​ម្តា​យមក​ណែនាំ​ផង​ដែរ នៅ​អធិការដ្ឋាន​នគរបាល​ស្រុក​សាលា​ក្រៅ ៕

ចរាចរណ៍

Sponsored News

ការស្ទង់មតិគេហទំព័រថ្មី




សូម​អរគុណ