រាជធានីភ្នំពេញ ៖ កម្លាំងប៉ូលិសខណ្ឌពោធិ៍សែនជ័យ និងប៉ូលិសប៉ុស្ដិ៍ចោមចៅ បានឡោមព័ទ្ធទីតាំងមួយដែលដាក់ស្លាកក្រុមហ៊ុន «ស៊ិនជូរី ខេមបូឌា» បន្ទាប់ពីទទួលបាន ពាក្យបណ្តឹងរបស់ស្ត្រីម្នាក់ដែលលួចរត់ចេញរួចពីក្នុងក្រុមហ៊ុនហើយអះអាងថា ក្រុមហ៊ុននេះបង្ខាំងរូបនាងរួមជាមួយស្ត្រីមួយចំនួនទៀតទុក ដើម្បីបញ្ជូនទៅធ្វើជាពលការិនីដោយខុសច្បាប់នៅប្រទេសម៉ាឡេស៊ី ។
រាជធានីភ្នំពេញ ៖ កម្លាំងប៉ូលិសខណ្ឌពោធិ៍សែនជ័យ និងប៉ូលិសប៉ុស្ដិ៍ចោមចៅ បានឡោមព័ទ្ធទីតាំងមួយដែលដាក់ស្លាកក្រុមហ៊ុន «ស៊ិនជូរី ខេមបូឌា» បន្ទាប់ពីទទួលបាន ពាក្យបណ្តឹងរបស់ស្ត្រីម្នាក់ដែលលួចរត់ចេញរួចពីក្នុងក្រុមហ៊ុនហើយអះអាងថា ក្រុមហ៊ុននេះបង្ខាំងរូបនាងរួមជាមួយស្ត្រីមួយចំនួនទៀតទុក ដើម្បីបញ្ជូនទៅធ្វើជាពលការិនីដោយខុសច្បាប់នៅប្រទេសម៉ាឡេស៊ី ។ ហេតុការណ៍នោះបង្កឱ្យមានការភ្ញាក់ផ្អើលឡើងកាលពីល្ងាចថ្ងៃទី២៤ តុលា ដែលទីតាំងក្រុមហ៊ុនខាងលើស្ថិតនៅផ្ទះលេខ២៤៤ ផ្លូវបេតុង ភូមិជ្រៃកោង សង្កាត់ ចោមចៅ ខណ្ឌពោធិ៍សែនជ័យ ។
មន្ត្រីប៉ូលិសឱ្យដឹងថា ស្ត្រីម្នាក់ដែលរត់រកការអន្តរាគមន៍ឱ្យជួយនេះឈ្មោះ ញ៉ុន ហេង អាយុ៣១ឆ្នាំ ជាកម្មការិនីធ្វើចម្ការនៅឃុំតាស្តា ស្រុកសំពៅលូន ខេត្តបាត់ដំបង និងមានស្រុកកំណើតនៅភូមិបឹងខ្នារ ឃុំបឹងខ្នារ ស្រុកបាកាន ខេត្តពោធិ៍សាត់ ។ នៅមុនពេលមានការឡោមព័ទ្ធនេះ ស្ត្រីខាងលើត្រូវបានស្ត្រីម្នាក់ទៀត ឈ្មោះ ហ៊ុយ នាង អាយុ៤០ឆ្នាំ ជាមេខ្យល់ និងជាកម្មការិនីធ្វើចម្ការជាមួយគ្នា មានទីលំនៅក្នុងភូមិបុសខ្នុរ ឃុំតាស្តា លួងលោមនាំមកភ្នំពេញ ហើយនាំមកកាន់ក្រុមហ៊ុនខាងលើដោយប្រាប់ថា ក្រុមហ៊ុនមួយនេះធានានាំទៅធ្វើជាពលការិនីនៅប្រទេសម៉ាឡេស៊ីស្របច្បាប់ ព្រមទាំងទទួលបានប្រាក់ឈ្នួលក្នុងមួយខែ៣០០ដុល្លារ ប៉ុន្តែត្រូវបង់លុយថ្លៃសេវាចូលក្រុមហ៊ុនចំនួន២០០ដុល្លារជាមុនសិន ។ ខណៈនោះនាងមានការត្រេកអរខ្លាំងណាស់ ព្រោះសង្ឃឹមថានឹងបានការងារល្អ ប្រាក់ឈ្នួលខ្ពស់ ហើយនាងក៏ព្រមទៅជាមួយស្ត្រីជាមេខ្យល់នោះដោយគ្មានការសង្ស័យអ្វីទាំងអស់ ។
ស្ត្រីរូបនេះបន្តថា លុះពេលទៅដល់ក្រុមហ៊ុនខាងលើ អ្វីៗមិនដូចការអះអាងរបស់ស្ត្រីជាមេខ្យល់ឡើយ ធ្វើឱ្យនាងខកចិត្តយ៉ាងខ្លាំង ព្រោះតែពេលទៅដល់ស្រាប់តែប្រធានក្រុមហ៊ុនដកទូរស័ព្ទដៃពីនាង និងស្ត្រីដទៃទៀតជិត១០នាក់ មិនឱ្យប្រើប្រាស់ទាក់ទងទៅក្រុមគ្រួសារឡើយ ។ មិនតែប៉ុណ្ណោះ ថែមទាំងបង្ខាំងទុកឱ្យនៅតែក្នុងបន្ទប់ មិនឱ្យទៅណាមកណាបានឡើយ សូម្បីតែចង់ទៅបង្គន់ ក៏មានមនុស្សទៅតាមឃ្លាំមើលជាប់រហូតដែរ ។ ស្ត្រីរូបនេះបន្តថា ដោយមើលឃើញពីសកម្មភាពបង្ខាំងមនុស្សស្រស់ៗបែបនេះ ទើបនៅវេលាម៉ោងជាង១សៀលថ្ងៃទី២៤ តុលា នាងបានប្រើល្បិចធ្វើជាឈឺពោះរកកន្លែងបត់ជើង ។ ខណៈនោះមិនដឹងថា អ្នកឃ្លាំមើលរវល់ទៅណាឡើយ មិនបានតាមមើលនាងទេ ដែលនៅពេលមានឱកាសបែបនេះ នាងក៏លួចរត់ចេញពីទីតាំងខាងលើ ដោយឡើងផ្លោះរបងថ្មដែលមានព័ទ្ធលួសបន្លាផង ហើយចេញមកខាងក្រៅរួច និងស្រែកឱ្យអ្នកនៅជិតនោះជួយ ។ ខណៈនោះមានជាងជួសជុលរថយន្តឃើញ ក៏ជួយនាំនាងទៅប្តឹងប៉ូលិស ហើយបូ៉លិសក៏ចុះមកឡោមព័ទ្ធទីតាំងក្រុមហ៊ុននេះភ្លាមៗទៅតាមពាក្យបណ្ដឹង ។ ប៉ុន្តែពេលទៅដល់ ប្រធានក្រុមហ៊ុននេះបានដឹកជញ្ជូនពលការិនីជិត១០នាក់តាមរថយន្តទួរីស១គ្រឿងគេចចេញពីទីតាំងខាងលើទៅកាន់កន្លែងផ្សេងទៀតបាត់អស់ទៅហើយ ដែលមិនដឹងថាយកទៅលាក់ទុកនៅទីណាឡើយ ។ ម្យ៉ាងទៀតស្ត្រីដែលត្រូវបង្ខាំងនោះសុទ្ធតែត្រូវដកទូរស័ព្ទមិនឱ្យប្រើប្រាស់ទៀត ។
ប៉ូលិសឱ្យដឹងថា ទីតាំងបង្ខាំងមនុស្សខុសច្បាប់នេះ គឺជួលពីអ្នកដទៃ មិនមែនជារបស់ក្រុមហ៊ុនទេ ។ ការជួលប្រព្រឹត្តអំពើខាងលើមានរយៈពេលជាង២ឆ្នាំមកហើយ គិតត្រឹមពេលបែកការណ៍នេះ ទើបដឹងថាមានស្ត្រីជាច្រើននាក់ត្រូវបានមេខ្យល់លួងលោមនាំទៅកាន់ទីនោះ និងបានបង្ខាំងអស់ជាច្រើនថ្ងៃ រហូតគ្រប់ចំនួន១០នាក់ ឬ២០នាក់ ទើបបញ្ជូនទៅកាន់ប្រទេសម៉ាឡេស៊ីម្ដង ។ រីឯការបញ្ជូនទៅនោះមិនមែននៅពេលថ្ងៃទេ គឺធ្វើឡើងនៅវេលាពាក់កណ្ដាលយប់ ឬវេលាម៉ោង៣ទៀបភ្លឺ ចន្លោះពេលដែលស្ងាត់គ្មានសមត្ថកិច្ច ។ ទោះបីជាបែបណា ពេលនេះប៉ូលិសកំពុងស្រាវជ្រាវរកប្រធានក្រុមហ៊ុន និងបក្សពួកដើម្បីចាត់ការតាមច្បាប់ ចំណែកស្ត្រីជាមេខ្យល់ត្រូវ បានប៉ូលិសនាំយកទៅសាកសួរ និងចាត់ការតាមនីតិវិធីផងដែរ ៕
ចែករំលែកព័តមាននេះ