មិនធម្មតាមែន ! ស្ត្រីម្នាក់ស្ម័គ្រចិត្តរស់នៅដោយមិនចាយលុយអស់ពេល៥ឆ្នាំមកហើយ
អ្នកស្រី ចូ នេមេត (Jo Nemeth) ដែលមកពី New South Wales ក្នុងចក្រភពអង់គ្លេសបានឈប់ចាយប្រាក់ទាំងស្រុងអស់…
អ្នកស្រី ចូ នេមេត (Jo Nemeth) ដែលមកពី New South Wales ក្នុងចក្រភពអង់គ្លេសបានឈប់ចាយប្រាក់ទាំងស្រុងអស់ ៥ឆ្នាំមកហើយ និងសុខចិត្តរស់នៅក្នុងជម្រកធ្វើពីសំណប៉ាហាំងដើម្បីសន្សំលុយថ្លៃជួលផ្ទះ ។
ប៉ុន្តែបន្ទាប់ពីលាឈប់ពីការងារជាមន្ត្រីអភិវឌ្ឍន៍សហគមន៍កាលពីខែមីនាឆ្នាំ ២០១៥ មករស់នៅជីវភាពដូច្នេះមក អ្នកស្រីបានចាប់ផ្តើមស្រលាញ់ជីវិតកាន់តែខ្លាំងឡើងទៅវិញ ។
ស្ត្រីដែលមានអាយុ ៥១ឆ្នាំខាងលើធ្លាប់មានទម្លាប់ចាយវាយប្រមាណ ៦០០ដុល្លារលើថ្លៃអាហារ ផលិតផលប្រេនៗ និងថ្លៃជួលផ្ទះមុនពេលអ្នកស្រីសម្រេចបោះបង់អ្វីគ្រប់យ៉ាង ។
អ្នកស្រីបានប្រាប់ដល់សារព័ត៌មាន Daily Mail Australia ថា «ខ្ញុំបានសម្រេចចិត្តរស់ដោយមិនចាយលុយពេលដែលខ្ញុំចាប់ផ្តើមដឹងពីផលប៉ះពាល់នៃលុយដែលខ្ញុំបានចាយ» ។អ្នកស្រីបានបន្តថា គោលដៅដំបូងរបស់ខ្ញុំ គឺដើម្បីកាត់បន្ថយផលប៉ះពាល់ដល់បរិស្ថាន និងសង្គម និងកាត់បន្ថយការបំពុលបរិស្ថាន និងការប្រើប្រាស់ធនធាន ។
អ្នកស្រីបានចាប់ផ្តើមជីវភាពរស់នៅថ្មីរបស់ខ្លួនដោយផ្តល់សេវាកម្មមើលថែអចលនទ្រព្យ ឬក្មេងៗជូនអ្នកដទៃដើម្បីផ្លាស់ប្តូរបានការស្នាក់នៅបណ្តោះអាសន្ន ។ សូម្បីតែជម្រករបស់អ្នកស្រីក៏បានធ្វើឡើងពីដែកដែលត្រូវបានបោះចោល និងវត្ថុធាតុកែច្នៃផងដែរ ។ បច្ចុប្បន្ននេះ អ្នកស្រីមានដាំដុះអាហារសម្រាប់បរិភោគដោយខ្លួនឯងថែមទៀត ។
ដើម្បីអាចរស់នៅដោយមិនចាយលុយទាំងស្រុងបាន អ្នកស្រីបានចែករំលែកថាវាពិតជាសំខាន់ណាស់ក្នុងការយល់ដឹងពីភាពខុសគ្នារវាងតម្រូវការ និងការចង់បាន ។
មនុស្សភាគច្រើនសម្រេចចិត្តចាយលុយព្រោះតែចិត្តចង់បានអ្វីមួយច្រើនជាងព្រោះពួកគេត្រូវការវា ។ អ្នកស្រីបានបន្តថា ប្រសិនបើយើងចាយវាយតែលើអ្វីដែលពួកយើងត្រូវការទេនោះ ពួកយើងអាចកាត់បន្ថយការប្រើប្រាស់ ពួកយើងកាត់បន្ថយការបំពុលបរិស្ថាន និងពួកយើងកាត់បន្ថយការចាយវាយ ។
លើសពីនេះទៅទៀត អ្នកស្រីប្រាប់មកថាការដោះដូរទំនិញគ្នាទៅវិញទៅមក គឺជាវិធីងាយមួយក្នុងការកាត់បន្ថយការទិញទំនិញច្រើន ។ អ្នកស្រីបានចូលរួមក្រុមលើ Facebook ដែលពោរពេញទៅដោយមនុស្សដែលដាំដុះអាហារដោយខ្លួនឯង ហើយអ្នកស្រីអាចដោះដូរផលិតផលជាមួយពួកគេបានយ៉ាងងាយ ៕
ចែករំលែកព័តមាននេះ