រាជធានីភ្នំពេញ ៖ យោងតាមការប្រជុំរបស់សហព័ន្ធកីឡាប្រដាល់គុនខ្មែរ និងគណៈកម្មការប្រដាល់ប៉ុស្តិ៍លេខ៥ បញ្ជាក់ថា ប៉ុស្តិ៍លេខ៥ នឹងដំណើរការការប្រដាល់បិទទ្វារដែលធ្លាប់ធ្វើឡើងនៅរៀងរាល់ថ្ងៃសៅរ៍នោះវិញហើយ បន្ទាប់ពីសហព័ន្ធស្នើឱ្យបើកប្រកួតបិទទ្វារតាំងពីដើមខែមេសា ។ វត្តមានបើកឡើងវិញនេះ…
រាជធានីភ្នំពេញ ៖ យោងតាមការប្រជុំរបស់សហព័ន្ធកីឡាប្រដាល់គុនខ្មែរ និងគណៈកម្មការប្រដាល់ប៉ុស្តិ៍លេខ៥ បញ្ជាក់ថា ប៉ុស្តិ៍លេខ៥ នឹងដំណើរការការប្រដាល់បិទទ្វារដែលធ្លាប់ធ្វើឡើងនៅរៀងរាល់ថ្ងៃសៅរ៍នោះវិញហើយ បន្ទាប់ពីសហព័ន្ធស្នើឱ្យបើកប្រកួតបិទទ្វារតាំងពីដើមខែមេសា ។ វត្តមានបើកឡើងវិញនេះ គឺជាការបើកប្រកួតបិទទ្វារក្រោយគេប៉ុណ្ណោះ បើធៀបនឹងសង្វៀនផ្សេងៗ ដែលគេបើកប្រកួតបិទទ្វារជាច្រើនសប្ដាហ៍មកហើយ។
លោក អូឡាឡា អ្នកសម្របសម្រួលកម្មវិធីបញ្ជាក់ថា សង្វៀនទាំងមូលត្រូវបិទចោលមួយរយៈ ដោយការសម្រេចបិទចោលនេះ គឺដើម្បីចូលរួមទប់ស្កាត់ការរីករាលដាលនៃជំងឺCOVID-19ដែលកំពុងបង្កផលប៉ះពាល់។
លោកថា ការបិទចោលកន្លងមករបស់សង្វៀនប៉ុស្តិ៍លេខ៥ គឺធ្វើឱ្យប៉ះពាល់មួយចំនួន ជាពិសេសនៅពេលកីឡាករនីមួយៗ លែងមានសកម្មភាព ។ យ៉ាងណាមិញ លោកបានសម្រេចចិត្តបើកវិញ ដោយការប្រកួតនេះ គឺមិនមានការអនុញ្ញាតឱ្យមានអ្នកចូលទស្សនាទេ ដោយលោកធ្វើឡើងសម្រាប់តែការផ្សាយផ្ទាល់លើផេកនិងលើកញ្ចក់ទូរទស្សន៍សុទ្ធសាធប៉ុណ្ណោះ។ លោកថា ការប្រកួតឡើងវិញមួយសប្ដាហ៍នេះអាចជាការសាកល្បងប៉ុណ្ណោះ ប្រសិនបើមានការគាំទ្រ គឺអាចបន្តបន្ថែម ប៉ុន្តែបើខ្វះការគាំទ្រនោះនឹងពិចារណា ។
ការប្រកួតនេះ គឺជាការប្រកួតមិត្តភាពរវាងកីឡាករក្នុងស្រុក និង កីឡាករក្នុងស្រុក ដែលការប្រកួតនៅថ្ងៃសៅរ៍ទី ២៥ មេសា នេះ មានជំនួបរវាងកីឡាករកម្ពុជា សេក គឹមសាន និងកីឡាករកម្ពុជា លន់ សៀកឡេង អមដោយកីឡាករកម្ពុជាជាច្រើនគូផ្សេងទៀត ។ លោកថា ការប្រកាសបើកឡើងវិញនេះ ទីមួយគឺដើម្បីកុំឱ្យកីឡាករ និងគណៈកម្មការរៀបចំការប្រកួតបាត់បង់ការងារទាំងស្រុង និងទី២ដោយសារតែមានឯកភាពពីខាងស្ពុនស័រ។
ការប្រកួតនេះ នឹងផ្សាយផ្ទាល់លើផេក និងលើទូរទស្សន៍ចាប់ពីម៉ោង៦ល្ងាចតទៅ នៅថ្ងៃសៅរ៍ទី២៥ មេសា ។
លោក សេង កដិកា អ្នករៀបចំការប្រកួតបានអះអាងថា លោកសប្បាយចិត្តដែលប៉ុស្តិ៍លេខ៥សម្រេចបើកការប្រកួតឡើងវិញ ។ លោកថា ការបើកហើយផ្ដោតតែលើផ្សាយផ្ទាល់លើផេក គឺមិនមានបញ្ហាប៉ះពាល់ពីការរីករាលដាលដោយជំងឺCOVID-19នោះទេ ។ លោករំលឹកត្រឡប់មកវិញថា នៅពេលសង្វៀនប្រដាល់ត្រូវបានបិទ កីឡាករភាគច្រើនឮថាលែងចង់ហ្វឹកហាត់តែម្ដង ជាពិសេសការហ្វឹកហាត់ក្នុងក្លិប ដោយលោកចាត់ទុកនោះមិនមែនជារឿងល្អនោះទេ ។ ផ្ទុយទៅវិញកីឡាករដែលធ្លាប់តែខ្លាំង នឹងអាចបោះបង់អាជីពនេះចោល ដោយសារតែពេលសង្វៀនមិនដំណើរការ គឺកីឡាករនឹងទៅធ្វើការផ្សេង ហើយបើទោះជាមិនទៅធ្វើការផ្សេង ក៏ពិតជាខ្លាចសង្វៀនហើយនៅពេលខានយូរ ។
លោកថា អ្នកផ្សេងមិនសូវប៉ះពាល់ តែសម្រាប់កីឡាករគឺបើអត់ការប្រកួតគឺដឹងតែដាច់លុយតែម្ដង ។ លោកថា លោកចង់បើកសង្វៀនតាំងពីសហព័ន្ធតម្រូវឱ្យប្រកួតបិទទ្វារភ្លាមៗម្ល៉េះ ប៉ុន្តែបណ្ដាលមកពីលោកចង់គិតគូរ
ស្វែងរកគូប្រកួតមកប្រកួតឱ្យល្អសិន ទើបបើកឡើងវិញ ។ លោកថា មិនចេះតែឱ្យប្រកួតនៅក្នុងកាលៈទេសៈនៃជំងឺCOVID-19នេះទេ ប៉ុន្តែបណ្ដាលមកពីស្ថានភាពនេះល្អប្រសើរហើយ ទើបលោកសម្រេចបើកប្រកួត។
លោក អូឡាឡា ជំនួយការកម្មវិធីប្រដាល់របស់ប៉ុស្តិ៍លេខ៥ បានអះអាងបន្ថែមថា ស្ថាប័នរបស់លោកបើកប្រកួតក្រោយគេ មិនមែនមានន័យដើរក្រោយគេទេ ប៉ុន្តែគឺដើម្បីគិតគូរឱ្យមានគុណភាពសិន ។ លោកថា ការបិទកន្លងមកប៉ះពាល់គ្រប់ផ្នែកដែលពាក់ព័ន្ធនឹងវិស័យប្រដាល់ទាំងអស់ តែលោកថាធ្វើម៉េចបើនេះគឺជាបញ្ហារបស់ពិភពលោក មិនមែនមានតែនៅកម្ពុជាទេ ។
លោកក៏បានសម្ដែងការសោកស្ដាយដែលជំងឺ COVID-19នៅតែបន្តការវាយលុកក្នុងនោះក៏ធ្វើឱ្យវិស័យប្រដាល់ក៏រងផលប៉ះពាល់ច្រើន បើទោះជាបណ្ដាសង្វៀនទាំងអស់ ចាប់ផ្ដើមបើកឡើងវិញក្ដី ។ លោកទទូចឱ្យកីឡាករដែលរងផលប៉ះពាល់ កុំបោះបង់ការហ្វឹកហាត់ កុំបណ្ដោយឱ្យកម្លាំង និងសមត្ថភាពចុះខ្សោយ ។លោកក៏ទទូចផងដែរថា បើសង្វៀនបើកដំណើរការ ម្ចាស់ស្ពុនស័រទាំងអស់ត្រូវបន្តការគាំទ្រនៅក្នុងវិស័យមួយនេះ ជាពិសេសនៅពេលការប្រដាល់គ្រប់សង្វៀនរបស់ទូរទស្សន៍នីមួយៗដំណើរការឡើងវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ