រាជធានីភ្នំពេញ ៖ រឿង សារ័ត្ន មកពីក្លិបកងពលតូចទ័ពពិសេសឆត្រយោង៩១១បង្ហាញអារម្មណ៍សោកស្ដាយយ៉ាងខ្លាំងបន្ទាប់ពីប្រកួតចាញ់ពិន្ទុកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សពោធិសែនជ័យទាំងប្រផិតប្រផើយ ក្នុងកម្មវិធីប្រដាល់រ៉េដអាន នៅលើសង្វៀនស៊ីអិនស៊ី…
រាជធានីភ្នំពេញ ៖ រឿង សារ័ត្ន មកពីក្លិបកងពលតូចទ័ពពិសេសឆត្រយោង៩១១បង្ហាញអារម្មណ៍សោកស្ដាយយ៉ាងខ្លាំងបន្ទាប់ពីប្រកួតចាញ់ពិន្ទុកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សពោធិសែនជ័យទាំងប្រផិតប្រផើយ ក្នុងកម្មវិធីប្រដាល់រ៉េដអាន នៅលើសង្វៀនស៊ីអិនស៊ី កាលពីថ្ងៃអាទិត្យ ទី១៩ មេសា។
ការប្រកួតរវាងកីឡាករទាំងពីរលើកនេះមានសភាពតឹងតែងយ៉ាងខ្លាំងដោយសារទាំងសងខាងសុទ្ធតែជាអ្នកប្រដាល់ជើងចាស់មានថ្វីដៃប្រកួតល្អដូចគ្នា ។ ចាប់ពីទឹកទី១ដល់ទឹកទី៣ទាំងសងខាងបានបង្កើនការវាយសម្រុកដាក់គ្នាយ៉ាងសាហាវធ្វើឱ្យគេពិបាកមើលថានរណាមានប្រៀបជាងនរណា ។ ប៉ុន្តែ ពុទ្ធ ឆាយរិទ្ធី ហាក់មានប្រៀបជាងចាប់ពីទឹកទី៤ដល់ទឹកទី៥ ដោយគេបានម៉ាត់ចូលមុខនិងបុកជង្គង់ចូលចំពោះទឹកពេញៗធ្វើឱ្យរឿង សារ័ត្ន ដួលទាំងជំហរជាច្រើនលើកច្រើនសា ។
ទោះបីយ៉ាងណា រឿង សារ័ត្ន នៅតែព្យាយាមសម្រុកចូលកៀកដើម្បីប្ដូរស្នៀតកែងសងវិញតែត្រូវពុទ្ធ ឆាយរិទ្ធី ធាក់ចេញមិនឱ្យចូលកៀកបានឡើយ ។ ចូលដល់ទឹកទី៥ រឿង សារ័ត្ន វាយបណ្ដើរដកថយបណ្ដើរ ខណៈពុទ្ធ ឆាយរិទ្ធី នៅតែសម្រុកចូលវាយរហូតដល់ចប់ទឹកទី៥និងឈ្នះពិន្ទុនៅនាទីចុងក្រោយ ។
សេក គឹមរួន មកពីក្លិបមកុដរាជសីហ៍ ចាញ់ពិន្ទុកីឡាករ សោម វិឆ័យ មកពីក្លិបវិបុលដារិទ្ធខណ្ឌពោធិសែនជ័យ ។ ទោះបីគូនេះសុទ្ធតែជាអ្នកប្រដាល់ជើងចាស់ដូចគ្នា ប៉ុន្តែសោម វិឆ័យ មានថ្វីដៃប្រកួតល្អជាង ជាពិសេសផ្នែកកម្លាំងតែម្ដង ធ្វើឱ្យសេក គឹមរួន ស្ថិតនៅក្នុងស្ថានភាពមិនសូវល្អជាញឹកញាប់ ចាប់តាំងពីទឹកទី១ដល់ទឹកទី៤ ។
សេក គឹមរួន ព្យាយាមវាយតបតដែរតែមិនអាចទៅរួចនោះទេ ដោយត្រូវសោមវិឆ័យ ទាត់និងម៉ាត់ចូលមុខនិងកណ្ដៀតក្អមពេញៗ។ ទីបំផុតចៅក្រមទាំង៥រូបបានសម្រេចឱ្យ សោម វិឆ័យ ឈ្នះពិន្ទុដោយឯកច្ឆ័ន្ទ។
ក្រៅពីគូជក់ចិត្តទាំងពីរនេះទៅ កីឡាករ រិនដាវីត មកពីក្លិបរាជសីហ៍ចតុមុខ ឈ្នះពិន្ទុកីឡាករឡុង ខេត្ត មកពីក្លិបខ្លារខិនមានរិទ្ធ ។ កីឡាករ សូរ ចាន់រាជ មកពីក្លិបជ្រៃសែនជ័យខេត្តកំពង់ស្ពឺ ឈ្នះពិន្ទុកីឡាករ ធន់ វិស្ណុ មកពីសមាគមកីឡាប្រដាល់ក្រសួងការពារជាតិ និងគូប្រកួតបើកឆាក កីឡាករ សូ សុផល មកពីក្លិបកងពលតូចទ័ពពិសេសឆត្រយោង៩១១ ក៏ឈ្នះពិន្ទុកីឡាករ លីន ពន្លឺ មកពីក្លិបបូរីរាជសីហ៍មានរិទ្ធដូចគ្នា ៕ (កែសម្រួលដោយ ៖ បុប្ផា)
ចែករំលែកព័តមាននេះ