អភិបាលខេត្តព្រមានរុះរើលែងឱ្យធ្វើអាជីវកម្ម បើសិនពលរដ្ឋនៅតែខ្វះទឹកប្រើ
- ព្រះសីហនុ
ខេត្តព្រះសីហនុ ៖ នាព្រឹកថ្ងៃទី១៤ ខែមេសា ឆ្នាំ២០២០នេះ លោក គួច ចំរេីន អភិបាល នៃគណ:អភិបាលខេត្តព្រះសីហនុ…
ខេត្តព្រះសីហនុ ៖ នាព្រឹកថ្ងៃទី១៤ ខែមេសា ឆ្នាំ២០២០នេះ លោក គួច ចំរេីន អភិបាល នៃគណ:អភិបាលខេត្តព្រះសីហនុ បានដឹកនាំកិច្ចប្រជុំរកដំណោះស្រាយការផ្គត់ផ្គង់ទឹកស្អាតជូនប្រជាពលរដ្ឋនៅប្រជុំជនវាលរេញ ស្រុកព្រៃនប់ ខេត្តព្រះសីហនុ។
ក្រោយពីការជួបពិភាក្សា លោកអភិបាលខេត្តបានបន្តចុះពិនិត្យមើលស្ថានភាពទឹកនៅតាមផ្ទះប្រជាពលរដ្ឋមួយចំនួនដែលបានប្រើប្រាស់ទឹកស្អាត និងចុះពិនិត្យអាងស្តុកទឹកផងដែរដែលមានទីតាំងនៅចំណុចក្បែវត្តថ្មដា ស្ថិតក្នុងភូមិសំរុងក្រោមឃុំសំរុង ស្រុកព្រៃនប់ខេត្តព្រះសីហនុ ខណៈគ្រឿងចក្រកំពុងបន្តកាយស្តារស្រះដែលជាអាងស្តុបទឹករាល់ថ្ងៃ។
នៅក្នុងឱកាសនោះដែរ លោកអភិបាលខេត្តបានណែនាំដល់ក្រុមហ៊ុនផលិតទឹកស្អាតឱ្យពង្រីកអាងទឹកឱ្យបានធំហើយជ្រៅជាងមុន ដើម្បីរក្សាទឹកបានច្រើន ដើម្បីធានាជូនពលរដ្ឋការប្រើប្រាស់គ្រប់គ្រាន់ ព្រមទាំងបានណែនាំឱ្យក្រុមហ៊ុនត្រូវសហការជាមួយមន្ទីរអភិវឌ្ឍន៍ជនបទ មន្ទីរសិប្បកម្ម និងឧស្សាហកម្ម និងមន្ទីរធនធាន និងឧតុនិយមទឹករួមទាំអជ្ញាធរមូលដ្ឋានផងដែរ ដើម្បីធ្វើកិច្ចការនេះឱ្យទទួលបានប្រសិទ្ធភាព។
ទន្ទឹមនឹងនេះដែរ លោកអភិបាលខេត្តក៏បានព្រមានរុះរើ លែងឱ្យធ្វើអាជីវកម្ម ប្រសិនបើណាឆ្នាំក្រោយនៅតែមានបញ្ហាខ្វះខាតដដែលៗដូច្នេះទៀត បើទោះជាមានអាជ្ញាប័ណ្ណពីក្រសួងក៏ដោយ។
សូមបញ្ជាក់ថា បញ្ហាកង្វះទឹកប្រើប្រាស់នៅប្រជុំជនវាលរេញគិតមកទល់ពេលនេះមានរយៈពេលប្រមាណជាជាងមួយខែមកហើយគឺចាប់ពីថ្ងៃទី១១ មីនា ឆ្នាំ២០២០ ហើយកន្លងមកនេះ ក៏មានកិច្ចប្រជុំរកដំណោះស្រាយក្រោមការដឹកនាំពីលោកអភិបាលខេត្តម្ដងរួចមកហើយតែហាក់នៅមិនទាន់មានប្រសិទ្ធភាព រហូតដល់ថ្ងៃនេះដើម្បីជាតម្រូវការចាំបាច់របស់ពលរដ្ឋ លោកអភិបាលខេត្តបានបើកកិច្ចពិភាក្សាជាលើកទី២និងចុះតាមដានអនុវត្តផ្ទាល់ទាំងលំនៅដ្ឋានរបស់ប្រជាពលរដ្ឋដែលប្រើប្រាស់ទឹកស្អាតនេះទាំងទីតាំងស្តុក អាងទឹក ដើម្បីស្វែងយល់ឲ្យបានដិតដល់ ។
ទោះបីជាយ៉ាងណា លោកអភិបាលខេត្តក៏នៅបន្តជំរុញក្រុមហ៊ុនផលិតទឹកស្អាតនេះឲ្យមានស្មារតីយកចិត្តទុកដាក់ខ្ពស់ក្នុងការផ្គត់ផ្គង់ទឹកស្អាតជូនពលរដ្ឋចំនួន២ឃុំ គឺឃុំសំរុងនិងឃុំវាលរេញដែលជាឃុំប្រជុំជន ហើយមិនត្រូវខ្វះការផ្គត់ផ្គង់ដូចឆ្នាំនេះតទៀតទេ ៕
ចែករំលែកព័តមាននេះ