ខេត្តស្វាយរៀង ៖ ភរិយាវីរកងទ័ពលោក នៃ សុភ័ក្រ បានសម្រាលកូនប្រុសម្នាក់នៅមន្ទីរពេទ្យបង្អែកខេត្តដោយសុវត្ថិភាព ។ អ្វីដែលមហាជនកាន់តែរំភើបរីករាយនោះ គឺនៅពេលបានឮសម្ដីរបស់ស្ត្រីជាភរិយាឈ្មោះ សឿន…
ខេត្តស្វាយរៀង ៖ ភរិយាវីរកងទ័ពលោក នៃ សុភ័ក្រ បានសម្រាលកូនប្រុសម្នាក់នៅមន្ទីរពេទ្យបង្អែកខេត្តដោយសុវត្ថិភាព ។ អ្វីដែលមហាជនកាន់តែរំភើបរីករាយនោះ គឺនៅពេលបានឮសម្ដីរបស់ស្ត្រីជាភរិយាឈ្មោះ សឿន សុភា និយាយក្នុងស្នាមញញឹមថា កាលពីលោកប្តីចេញទៅបំពេញភារកិច្ចជាកងទ័ពជួរមុខ នាងមានផ្ទៃពោះប៉ុន្មានខែហើយ ។
ពេលដឹងដំណឹងថា ប្តីជាទីស្រឡាញ់ត្រូវទាហានថៃចាប់ខ្លួនពេលអនុវត្តបទឈប់បាញ់ ពេលនោះ នាងមានការភ័យព្រួយអំពីសុវត្ថិភាពរបស់ប្តី ហើយព្រួយបារម្ភយ៉ាងខ្លាំង ។ នាងរង់ចាំមើលផ្លូវប្តីអស់រយៈពេល១៥៥ថ្ងៃ ទើបលោកប្ដីត្រូវបានដោះលែង់មកស្រុកខ្មែរវិញ ។
នាងអរគុណរាជរដ្ឋាភិបាល ជាពិសេស សម្តេចមហាបវរធិបតី ហ៊ុន ម៉ាណែត បានព្យាយាមទំនាក់ទំនងជាមួយអន្តរជាតិជួយអន្តរាគមន៍ រហូតទាហានចោរសៀមព្រមដោះលែងវីរកងទ័ពទាំង១៨រូបបានត្រឡប់មកជួបជុំគ្រួសារវិញ ជាពិសេសប្តីបានមកទាន់ពេលនាងសម្រាលកូន ។ បើតាមក្រុមគ្រូពេទ្យបានប្រាប់អ្នកយកព័ត៌មានថា ភរិយាវីរកងទ័ពលោក នៃ សុភ័ក្រ សម្រាលកូននៅវេលាម៉ោង៩ និង២៥នាទីព្រឹក ថ្ងៃទី៦ ខែមករា ឆ្នាំ២០២៦ នៅផ្នែកសម្ភពនៃមន្ទីរពេទ្យបង្អែកខេត្ត ។
ក្នុងឱកាសអបអរសាទរខួបលើកទី៤៧ នៃទិវាជ័យជម្នះ ៧មករា ឯកឧត្តម ប៉េង ពោធិ៍សា អភិបាលខេត្ត និងលោកជំទាវ ដួង វណ្ណា តំណាងរាស្ត្រមណ្ឌលស្វាយរៀង ព្រមទាំងសហការី បានអញ្ជើញទៅសួរសុខទុក្ខភរិយា និងកូនប្រុសលោក នៃ សុភ័ក្រ ជាវីរកងទ័ព១រូបក្នុងចំណោម១៨រូប ដែលទេីបសម្រាលនៅផ្នែកសម្ពពនៃមន្ទីរពេទ្យបង្អែកខេត្ត ។
លោក នៃ សុភ័ក្រ មានទីលំនៅក្នុងភូមិព្រៃត្រុំ ឃុំញរ ស្រុកកំពង់រោទ៍ ។ ក្នុងឱកាសនោះ ឯកឧត្តមអភិបាលខេត្ត បានសម្តែងនូវការត្រេកអរ និងក្តីរំភើបជាមួយក្រុមគ្រួសារដែលបានជួបជុំសមាជិកវិញ ហើយសម្រាលបានកូនប្រុសម្នាក់ដោយសុវត្ថិភាព ៕
ចែករំលែកព័តមាននេះ