ខេត្តបាត់ដំបង ៖ បើតាមសេចក្តីរាយការណ៍បានឱ្យដឹងថា បុរសញៀននឹងគ្រឿងញៀនម្នាក់ត្រូវបានសមត្ថកិច្ចចាប់ខ្លួនភ្លាមៗ បន្ទាប់ពីដុតផ្ទះខ្លួនឯងឆេះអស់គ្មានសល់ បង្កឱ្យមានការភ្ញាក់ផ្អើលកាលពីម៉ោង៣រសៀល ថ្ងៃទី១១ ខែមេសា ឆ្នាំ២០២០ ស្ថិតនៅក្នុងភូមិភ្នំតូច ឃុំពេជ្រចិន្តា ស្រុកភ្នំព្រឹក។
មន្ត្រីកងរាជអាវុធហត្ថបានរាយការណ៍ថា បុរសខាងលើឈ្មោះ រ៉េន សុគាន់ អាយុ២៣ឆ្នាំ រស់នៅម្នាក់ឯង នៅក្នុងផ្ទះរបស់ខ្លួនដែលស្ថិតនៅភូមិ-ឃុំកើតហេតុខាងលើ។ ហើយបុរសរូបនេះជាមនុស្សបែកថ្នាំដល់កំរិត ហើយបានដុតផ្ទះខ្លួនឯងឆេះអស់គ្មានសល់។
ប្រភពដដែលបានបញ្ជាក់ថា លំនៅឋាននោះខាងលើធ្វើអំពីឈើជញ្ជាំង និងដំបូលប្រក់ស័ង្កសីមានទំហំ ៤x៦ម៉ែត្រ។ សមត្ថកិច្ចបានប្រាប់ថា គេគ្រាន់តែដឹងថា ជននេះបានដុតកំទេចផ្ទះខ្លួនឯង ដែលមនុស្សទូទៅសន្និដ្ឋានថា ទំនងបណ្ដាលមកពីជននេះញៀនថ្នាំដល់កំរិត។
ក្រោយពេលដុតផ្ទះឆេះខ្ទេចខ្ទី ជននេះបានកាន់កាំបិតផ្គាក់កំញើញអ្នកភូមិ និងសមត្ថកិច្ចដែលព្យាយាមចូលជួយអន្តរាគមន័ពន្លត់ភ្លើងឆេះផ្ទះនោះ តែបន្តិចក្រោយទើបត្រូវសមត្ថកិច្ចព័ទ្ធចាប់ខ្លួនបានតែម្តង។
បើតាមសមត្ថកិច្ចបានបញ្ជាក់ដែរថា លំនៅឋាន និងទ្រព្យសម្បត្តិទាំងអស់បានក្លាយជាផេះ រីឯជនបង្កត្រូវបានឃាត់ខ្លួន តែគេមិនទាន់ដឹងអំពីនីតិវិធីរបស់សមត្ថកិច្ចចំពោះជនម្នាក់នេះនៅឡើយទេ៕ (កែសម្រួលដោយ ៖ បុប្ផា)
ចែករំលែកព័តមាននេះ