ខេត្តសៀមរាប ៖ បើតាមសេចក្តីរាយការណ៍បានឲ្យដឹងថា អាជ្ញាធរស្រុកស្វាយលើ បានធ្វើការឃាត់ខ្លួនទាហានជើងគោកនៃយោធភូមិភាគទី៤ម្នាក់ ដែលឈរជើងនៅស្នាក់ការអង្គការបរិស្ថាន ស្ថិតក្នុងស្រុកស្វាយលើ ពាក់ព័ន្ធនឹងករណីចាប់ឡានដឹកគ្រឿងសង្ហារឹម រួចទារប្រាក់៣០០ដុល្លារជាថ្នូរនឹងការដោះលែង ដែលអ្នករកស៊ីនិយាយថា…
ខេត្តសៀមរាប ៖ បើតាមសេចក្តីរាយការណ៍បានឲ្យដឹងថា អាជ្ញាធរស្រុកស្វាយលើ បានធ្វើការឃាត់ខ្លួនទាហានជើងគោកនៃយោធភូមិភាគទី៤ម្នាក់ ដែលឈរជើងនៅស្នាក់ការអង្គការបរិស្ថាន ស្ថិតក្នុងស្រុកស្វាយលើ ពាក់ព័ន្ធនឹងករណីចាប់ឡានដឹកគ្រឿងសង្ហារឹម រួចទារប្រាក់៣០០ដុល្លារជាថ្នូរនឹងការដោះលែង ដែលអ្នករកស៊ីនិយាយថា ដាក់កុងត្រូលជជុះដុះមមិះយូរហើយ។ ហេតុការណ៍នេះធ្វើឡើងនៅថ្ងៃទី១០ ខែមេសា ឆ្នាំ២០២០ ស្ថិតនៅភូមិត្រពាំងខ្នារ ឃុំស្វាយលើ ស្រុកស្វាយលើ។
លោកវរសេនីយ៍ត្រី ឈា សាវុធ មេបញ្ជាការកងរាជអាវុធហត្ថស្រុកស្វាយលើ បានឲ្យដឹងនៅរសៀលថ្ងៃទី១១ ខែមេសានេះថា ពិតជាមានករណីឃាត់ខ្លួនទាហានជើងគោកម្នាក់ (ដឺប៉េ) ពិតមែន។ ការឃាត់នេះ គឺធ្វើតាមពាក្យបណ្តឹងរបស់ពលរដ្ឋម្នាក់ឈ្មោះ ខុំ វ៉ា រស់នៅភូមិអូរអាកុក ឃុំតាសៀម ស្រុកស្វាយលើ ដែលជាអ្នកដឹកគ្រឿងសង្ហារឹម (ទ្វារបង្អួច) ក្នុង ករណីឈ្មោះ រ៉ុង មានមុខងារជាទាហានជើងគោកឈរជើងជាមួយអង្គការបរិស្ថាន ដោយបានបើកឡានដេញកាក់នៅជិតប្រាសាទបឹងមាលា រួចហើយសម្លុតទារប្រាក់ចំនួន៣០០ដុល្លារ។
បើតាមជនរងគ្រោះនិយាយថា គាត់គ្មានលុយទេ គឺនៅសល់តែ៥០ម៉ឺនរៀលទេ តែឈ្មោះរ៉ុង មិនព្រមហើយក៏បានដកយកអត្តសញ្ញាណប័ណ្ណទុកសិន ដោយនិយាយថា ពេលយកទ្វារទៅលក់បានលុយ ចាំយកមកឲ្យគាត់គ្រប់ចំនួន ទើបឲ្យអត្តសញ្ញាណប័ណ្ណនោះវិញ។ ដោយសារមានការខឹងនឹងទង្វើរបស់យោធាខាងលើ ទើបជនរងគ្រោះមកប្តឹងនៅសាលាស្រុកស្វាយលើ ឲ្យជួយអន្តរាគមន៍។
លោកវរសេនីយ៍ត្រី ឈា សាវុធ បន្តថា ភ្លាមៗនោះ លោកអភិបាលស្រុកក៏បានបញ្ជាទៅកម្លាំងចម្រុះ ចុះតាមឃាត់ខ្លួនជនសង្ស័យខាងលើ យកមកសួរនាំនៅទីបញ្ជារការអាវុធហត្ថស្រុកស្វាយលើ។ លោកបន្តថា ដោយមានការសុំចរចាសម្រួលពីជនរងគ្រោះ ទើបលោកអភិបាលស្រុក បញ្ជាឲ្យសមត្ថកិច្ចអប់រំយោធាខាងលើ និងឱ្យធ្វើកិច្ចសន្យាបញ្ឍប់សកម្ម បើកឡានដេញកាក់ជំរិតទារលុយតទៅទៀត។ បន្ទាប់ពីធ្វើកិច្ចសន្យារួច កម្លាំងសមត្ថកិច្ចក៏បានដោះលែង យោធាខាងលើវិញ។
សូមរម្លឹកថា កន្លងទៅអាជ្ញាធរស្រុកស្វាយលើ ធ្លាប់បានហៅ យោធា និងប្រធានអង្គការបរិស្ថាន ដែលមានស្នាក់ការនៅភូមិទឹកលិច ឃុំបឹងមាលា ស្រុកស្វាយលើ នេះមកសួរនាំ និងធ្វើកិច្ចសន្យាម្តងរួចមកហើយ ក្នុងករណីស្រដៀងគ្នានេះដែរ។
យ៉ាងនេះក្តី សមត្ថកិច្ចស្រុកស្វាយលើ បានខ្សឹបប្រាប់ថា បុគ្គលខាងលើពិតជាមិនរាងចាលនោះទេ ព្រោះកន្លងទៅ ពួកគេតែងតែកាក់ឡានដឹកឈើ ឡានដឹកសិប្បកម្ម ទារលុយច្រើនៗធ្វើឲ្យកើតរឿងជម្លោះជាញឹកញាប់៕ (កែសម្រួលដោយ ៖ បុប្ផា)
ចែករំលែកព័តមាននេះ