រាជធានីភ្នំពេញ ៖ ក្នុងពេលប្រទេសកម្ពុជាកំពុងប្រយុទ្ធប្រឆាំងនឹងការឆ្លងរាលដាលនៃជំងឺកូវីដ ១៩ ដែលវាមិនត្រឹមតែធ្វើអោយប៉ះពាល់ដល់សុខភាពសាធារណៈប៉ុណ្ណោះទេ តែពេលនេះវីរុសមួយនេះបានធ្វើឲ្យអ្នកដាំស្វាយស្រក់ទឹកភ្នែក ព្រោះគ្មានទីផ្សារទាល់តែសោះ ជាពិសេសការបិទច្រកព្រំដែនរវាងប្រទេសកម្ពុជា និងប្រទេសជិតខាង ធ្វើឲ្យផ្លែស្វាយរបស់កសិករកម្ពុជាមិនអាចនាំចេញ…
រាជធានីភ្នំពេញ ៖ ក្នុងពេលប្រទេសកម្ពុជាកំពុងប្រយុទ្ធប្រឆាំងនឹងការឆ្លងរាលដាលនៃជំងឺកូវីដ ១៩ ដែលវាមិនត្រឹមតែធ្វើអោយប៉ះពាល់ដល់សុខភាពសាធារណៈប៉ុណ្ណោះទេ តែពេលនេះវីរុសមួយនេះបានធ្វើឲ្យអ្នកដាំស្វាយស្រក់ទឹកភ្នែក ព្រោះគ្មានទីផ្សារទាល់តែសោះ ជាពិសេសការបិទច្រកព្រំដែនរវាងប្រទេសកម្ពុជា និងប្រទេសជិតខាង ធ្វើឲ្យផ្លែស្វាយរបស់កសិករកម្ពុជាមិនអាចនាំចេញ និងតម្លៃបានធ្លាក់ចុះយ៉ាងខ្លាំង។
លោកពៅ ស៊ីថេត អ្នកដាំស្វាយកែវរមៀតមួយកន្លែងនៅខេត្តកំពត បាននិយាយថា តម្លៃស្វាយឆ្នាំនេះហៅលែងលឺហើយ ទុកទុំចោល ជ្រុះពេញដី គ្មានអ្នកទិញទេ ហើយបើបេះយកទៅលក់ក៏មិនដឹងលក់នៅទីណា ព្រោះព្រំដែនត្រូវបានបិទដែលកន្លងមកយកទៅប្រទេសវៀតណាមតាមច្រករបៀង តែដល់ពេលបិទអស់ ក៏អត់មានអ្នកទិញដូចឆ្នាំមុន ។
តម្លៃស្វាយកែវរមៀត គឺអាចលក់បានត្រឹមតែ ៣០០ ទៅ ៣៥០ រៀលក្នុងមួយគីឡូក្រាម
ខណៈឆ្នាំមុនលក់បានតម្លៃដល់ទៅ ៨០០ រៀលឯណោះ ។ ដែលការធ្លាក់ចុះនេះក៏បានធ្វើអោយក្រសួងសាម៉ីចេញវិធានការបន្ទាន់ ដើម្បីដោះស្រាយបន្ទាន់ជួយស្រោចស្រង់ដល់ទីផ្សារផ្លែស្វាយ។
យោងតាមសេចក្តីណែនាំរបស់ក្រសួងកសិកម្ម រុក្ខាប្រមាញ់ និងនេសាទ ស្ដីពីវិធានការបន្ទាន់ដើម្បីដោះស្រាយបញ្ហានៃការធ្លាក់ចុះនៃតម្លៃផលិតផលផ្លែស្វាយ បានអោយដឹងថា ពេលនេះគឺជារដូវកាលប្រមូលផលផ្លែស្វាយ ធ្វើអោយផលិតផលនេះ សំបូរនៅគ្រប់ទីកន្លែងក្នុងប្រទេស ។ ហើយក្នុងពេលដែលមានការរីករាលដាលនៃជំងឺកូវីដ ១៩ ទើបធ្វើអោយផ្លែស្វាយធ្លាក់ចុះបែបនេះ ។ ម្យ៉ាងទៀត អ្នកដាំដុះផ្លែស្វាយមួយចំនួនមិនទាន់បានអនុវត្តតាមគោលការណ៍នៃការអនុវត្តន៍កសិកម្មល្អ ហៅកាត់ថា GAP និងធ្វើផែនការដាំដុះអោយបានត្រឹមត្រូវ ។
នៅក្នុងសេចក្តីប្រកាសព័ត៌មានរបស់ក្រសួងកសិកម្មរុក្ខាប្រមាញ់ និងនេសាទ ក៏បានអោយដឹងថា «រោងចក្រ និងសិប្បកម្មកែច្នៃផលិតផលស្វាយនៅក្នុងស្រុកនៅមានចំនួនតិច បច្ចេកទេសកែច្នៃ នៅមានកម្រិត ។ នៅក្នុងអំឡុងពេលឆ្លងរាលដាលជំងឺកូវីដ ១៩នេះ រោងចក្រ និងសិប្បកម្មកែច្នៃដំណាប់ស្វាយមួយចំនួន បានផ្អាកដំណើរការបណ្ដោះអាសន្ន ដោយសារតែការបញ្ជាទិញផលិតផលដែលកែច្នៃរួចនាំចេញបានតិចតួច និងខ្វះកម្មករ ហើយរោងចក្រ និងសិប្បកម្មកែច្នៃដំណាប់ស្វាយដែលនៅដំណើរការ បាននិងកំពុងប្រមូលទិញផ្លែស្វាយស្រស់សម្រាប់ធ្វើការកែច្នៃត្រឹមតែ២០ទៅ៣០តោនក្នុងមួយថ្ងៃ ក្នុងតម្លៃតែ៣២០រៀលក្នុងមួយគីឡូក្រាមប៉ុណ្ណោះ ខុសពីឆ្នាំមុន ដែលមានតម្លៃរហូតដល់៨០០រៀលក្នុងមួយគីឡូក្រាម» ។
នៅក្នុងសេចក្តីប្រកាសនោះបានអោយដឹងទៀតថា ដើម្បីដោះស្រាយបញ្ហានេះ ក្រសួងបានណែនាំទៅដល់អគ្គនាយកដ្ឋានកសិកម្ម នាយកដ្ឋានកសិ-ឧស្សាហកម្ម និងមន្ទីរកសិកម្ម រុក្ខាប្រមាញ់និងនេសាទខេត្តមួយចំនួន ដូចជា ត្រូវសហការជាមួយនាយកដ្ឋានកសិ-ឧស្សាហកម្មដើម្បីជំរុញកសិករអោយចងក្រងជាក្រុមផលិត និងសហគមន៍ ដោយត្រូវចុះបញ្ជីអោយបានត្រឹមត្រូវ ដើម្បីងាយស្រួលរៀបចំផែនការផលិតកម្មស្វាយជាលក្ខណៈប្រមូលផ្ដុំ បណ្ដុះបណ្ដាលបច្ចេកទេសស្របតាមស្តង់ដា និងការផ្សាភ្ជាប់ទីផ្សារតាមរយៈការចុះកិច្ចសន្យាទិញលក់ ។
ក្នុងនោះផងដែរ ក្រសួងបានបញ្ជាក់ថា «ត្រូវជំរុញផ្សព្វផ្សាយការប្រើប្រាស់បណ្ដាញព័ត៌មានទីផ្សារផលិតផលកសិកម្ម តាមបច្ចេកទេសទំនើប ដល់កសិករ រួមទាំងការដាំដុះ បច្ចេកទេសក្រោយប្រមូលផល និងការស្តុកទុករយៈពេលវែង ត្រូវជំរុញលើកទឹកចិត្តដល់ការកែច្នៃផលិតផលស្រស់ជាលក្ខណៈគ្រួសារអោយទៅជាដំណាប់ និងទឹកស៊ីរ៉ូស្វាយដើម្បីលក់ក្នុងស្រុក» ៕ (កែសម្រួលដោយ ៖ បុប្ផា)
ចែករំលែកព័តមាននេះ