ខេត្តកំពត ៖ ក្មេងប្រុសអាយុ៨ឆ្នាំម្នាក់បានស្លាប់ និងម្នាក់ទៀតរងរបួសក្នុងហេតុការណ៍គ្រោះថ្នាក់ចរាចរណ៍មួយដែលកើតឡើងកាលពីវេលាម៉ោង៩ និង២០នាទីព្រឹក ថ្ងៃទី១២ តុលា ២០១៤ នៅតាមផ្លូវបេតុង ស្ថិតក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ។
ក្មេងប្រុសដែលស្លាប់ត្រូវគេស្គាល់ឈ្មោះថាច់ ឆោម ចំណែកក្មេងប្រុសដែលរងរបួសឈ្មោះថាច់ វិឆ័យ អាយុ១៣ឆ្នាំ ។ ប្រភពព័ត៌មានបានឱ្យដឹងថា ក្មេងប្រុសទាំង២នាក់ជាបងប្អូនបង្កើតនឹងគ្នា ជិះម៉ូតូម៉ាកឌ្រីមC100 ពណ៌ខ្មៅ ពាក់ស្លាកលេខយ៨២០៧ឌុបគ្នានៅតាមផ្លូវខាងលើ ពេលមកដល់ចំណុចកើតហេតុក៏ប៉ះគ្នាជាមួយម៉ូតូម៉ាកឌ្រីមមួយគ្រឿងទៀតដែលធ្វើដំណើរបញ្ច្រាសទិសគ្នាបណ្តាលឱ្យដួល ស្របពេលនោះមានរថយន្តមួយគ្រឿងទៀតធ្វើដំណើរមកពីក្រោយចាប់ហ្វ្រាំងមិនទាន់ក៏កិនក្មេងប្រុសរងគ្រោះស្លាប់នៅនឹងកន្លែង ហើយបន្ថែមល្បឿនបើកគេចបាត់។
ក្រោយកើតហេតុសមត្ថកិច្ចបានមកពិនិត្យកន្លែងកើតហេតុរួចរាយការណ៍តាមវិទ្យុទាក់ទងតាមចាប់រថយន្តដែលកិនក្មេងប្រុសរងគ្រោះ។ មួយសន្ទុះក្រោយមកសមត្ថកិច្ចបានឃាត់រថយន្តសង្ស័យមួយគ្រឿងដែលជារថយន្តដឹកប្រជាពលរដ្ឋទៅបុណ្យកឋិន ពាក់ស្លាកលេខ២A1571 និងឃាត់អ្នកបើកបរនាំទៅសាកសួរនៅអធិការដ្ឋាននគរបាលក្រុង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ