លោក Roberto Mancini គ្រូបង្វឹកក្រុមបាល់ទាត់ជម្រើសជាតិអុីតាលីជឿជាក់ថា ការពន្យារពេលព្រឹត្តិការណ៍ Euro 2020 ទៅធ្វើនៅឆ្នាំក្រោយ អាចនឹងជួយដល់ក្រុមរបស់លោកក្នុងការត្រៀមខ្លួនកាន់តែច្រើន សម្រាប់ការប្រជែងជើងឯក ។
បុរសជនជាតិអុីតាលី វ័យ៥៥ឆ្នាំរូបនេះបានស្តារមុខមាត់ឡើងវិញសម្រាប់ក្រុមជម្រើសជាតិអុីតាលី បន្ទាប់ពីត្រូវបានតែងតាំងកាលពីឆ្នាំ ២០១៨ ក្រោយពួកគេបានខកខានមិនបានចូលរួមការប្រកួត World Cup 2018 ដែលរុស្ស៊ីធ្វើជាម្ចាស់ផ្ទះ ។
ក្រោមការដឹកនាំរបស់លោក Roberto Mancini អុីតាលីបានបញ្ចប់ការប្រកួតវគ្គជម្រុះក្នុងពូល (UEFA Euro 2020 qualifying) របស់ពួកគេជាមួយនឹងកំណត់ត្រាឈ្នះ ១០០% និងបន្តឈ្នះជាបន្តបន្ទាប់ចំនួន ១១លើកពីការប្រកួតផ្សេងទៀត។
ឆ្លងឆ្លើយជាមួយ Sky Sport Italia លោក Roberto Mancini បានឱ្យដឹងថា «ប្រសិនយើងបានប្រកួត Euro 2020 នៅខែមិថុនាឆ្នាំនេះវាពិតជារឿងដ៏ល្អ ប៉ុន្តែប្រហែលជាយើងនឹងត្រូវប្រឈមមុខ ជាមួយក្រុមជម្រើសជាតិដទៃទៀត ដែលបានត្រៀមខ្លួនល្អជាងយើង» ។
«ប៉ុន្តែជាមួយនឹងរយៈពេលមួយឆ្នាំទៀត វានឹងជាឱកាសកាន់តែល្អប្រសើរសម្រាប់ពួកយើង នឹងទទួលបានបទពិសោធន៍កាន់តែច្រើន ដើម្បីឱ្យយើងអាចប្រកួតប្រជែងបានល្អបំផុត។ ខ្ញុំសង្ឃឹមថានឹងក្លាយជាគ្រូបង្វឹកនៃក្រុម (អុីតាលី) ដែលនឹងឈ្នះជើងឯកអឺរ៉ុប ជាលើកដំបូងចាប់តាំងពីឆ្នាំ ១៩៦៨» ។
សូមបញ្ជាក់ថា ដោយសារតែការរីករាលដាលកាន់តែខ្លាំងនៃវីរុស COVID-19 បានធ្វើឱ្យព្រឹត្តិការណ៍ Euro 2020 ត្រូវសម្រេចលើកទៅធ្វើនៅឆ្នាំក្រោយ ពោលគឺនៅថ្ងៃទី ១១ ខែ មិថុនា ដល់ថ្ងៃទី ១១ ខែ កក្កដា ឆ្នាំ ២០២១ ៕ (ដកស្រង់ចេញពី CNA)
ចែករំលែកព័តមាននេះ