ប្រទេសជប៉ុន ៖ ទូរទស្សន៍ TBS រាយការណ៍នាថ្ងៃទី៦ ខែមេសាថា រដ្ឋាភិបាលជប៉ុនគ្រោងប្រកាសភាពអាសន្នសម្រាប់រយៈពេល៦ខែ ដោយសារការឆ្លងរាលដាលនៃវីរុសCOVID-19។
ទូរទស្សន៍នោះបន្តថា វិធានការនោះនឹងទាក់ទិនដល់ក្រុងតូក្យូ និងខេត្ត៣នៅជាប់ជិតខាង រាជធានី ក៏ដូចជានៅក្រុងអូសាកា។ ក្នុងដំណាក់កាលនោះ តំបន់ទាំងនេះអាចសម្រេចលើរយៈពេលនៃការអនុវត្តបណ្ដាវិធានរបស់ពួកគេផ្ទាល់។ ការប្រកាសភាពអាសន្នអាចមានចាប់ពីថ្ងៃទី៧ មេសា ទៅ។
រួចបើតាមកាសែតNIKKEIជប៉ុនថា ក្រុមប្រឹក្សាពិគ្រោះយោបល់ស្ដីការឆ្លង បង្កើតឡើងដោយរដ្ឋាភិបាលបានរួមប្រជុំ ដើម្បីរៀបចំការប្រកាសភាពអាសន្នដោយនាយករដ្ឋមន្ត្រីលោកស៊ីនហ្សូអាបេ។ រដ្ឋាភិបាលជប៉ុនរងសម្ពាធកាន់តែខ្លាំង ដើម្បីឲ្យធ្វើការផ្ដួចផ្ដើមគំនិតនោះ ប្រឈមមុខនឹងការឆ្លងរាលដាលនៃវីរុស។ យោងតាមតុល្យការផ្លូវការចុងក្រោយថា នៅជប៉ុនមានអ្នកឆ្លងវីរុសនេះជាង៤.៥០០នាក់ ក្នុងនោះអ្នកបាត់បង់ជីវិត១០៤នាក់។
ការកែទម្រង់មួយនៃច្បាប់ដែលអនុម័តកាលពីខែមុន ក្នុងក្របខណ្ឌនៃចម្លើយតបរបស់អាជ្ញាធរចំពោះការឆ្លងវីរុស អនុញ្ញាតឲ្យនាយករដ្ឋមន្ត្រីប្រកាសភាពអាសន្ន ប្រសិនបើជំងឺជាគ្រោះថ្នាក់ធ្ងន់ធ្ងរមួយ និងប្រសិនបើការឆ្លងរាលដាលអាចនាំឲ្យមានការប៉ះពាល់ខ្លាំងដល់សេដ្ឋកិច្ច។
ការប្រកាសភាពអាសន្ននឹងអនុញ្ញាតឲ្យបណ្ដាអភិបាលខេត្តក្រុង អំពាវនាវដល់ប្រជាជនឲ្យស្ថិតនៅក្នុងផ្ទះ និងឲ្យបណ្ដាសហគ្រាសបិទទ្វារ តែមិនបញ្ជាឲ្យមានការបង្ខាំងទូទៅ តាមបែបដែលអនុវត្តនៅអ៊ីតាលី អេស្ប៉ាញឬនៅបារាំងឡើយ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ