រាជធានីភ្នំពេញ ៖ ប្រធានសម្ព័ន្ធសហជីពជាតិលោក ហ្វា សាលី បានស្នើដល់រាជរដ្ឋាភិបាកក៏ដូចជា ក្រសួងការងារ និងបណ្តុះបណ្តាលវីជ្ជាជីវៈលើកពេលការឈប់សម្រាកចំពោះថ្ងៃបុណ្យចូលឆ្នាំខ្មែរទៅពេលណាមួយ ដើម្បីចៀសរាងការរីករាលដាលជំងឺកូវីដ១៩ ។
លោកបញ្ជាក់ថា«ខ្ញុំយល់ឃើញថា បើសិនក្រសួងការងារមិនឆ្លើយតបទាន់ពេលវេលា ហើយនៅតែអនុវត្តអនុញ្ញាតឲ្យបងប្អូនកម្មករនិយោជិតខ្មែរឈប់សម្រាកនៅបុណ្យចូលឆ្នាំនៅពេលខាងមុខនេះ ខ្ញុំគិតថា ជារឿងមួយសូវល្អដោយសារតែការចូលឆ្នាំនេះមានការជួបជុំគ្នាដើរលេងផឹកស៊ី ចំពោះបងប្អូនមួយចំនួនបានផ្គើននឹងបំរាមពីការមិនឲ្យជួបជុំផ្សេងៗ» ។ លោកថាចំណុចនេះអាចនឹងឆ្លើយតបមិនទាន់នៅពេលគាត់ត្រឡប់ពីចូលឆ្នាំវិញ ហើយធ្វើការងារតាមរោងចក្រសហគ្រាសនានាអាចពាំនាំជំងឺនឹងមកជាមួយ ។ ហើយឃើញថា មានកម្មករមួយចំនួនបានធ្វើចំណាកស្រុកផ្សេងៗនៅតាមតំបន់មានផ្ទុកជំងឺ នោះ គឺយើងមានការព្រួយបារម្ភណាស់ដល់ពេលគាត់មកវិញ ។
ចំណុចនេះ មេសហជីពរូបនេះបានលើកឡើងថា ក្នុងករណីក្រសួងនៅតែអនុវត្តប្រកាសនេះសុំឲ្យអំពាវនាវដល់បងប្អូនកម្មករកុំឲ្យមានការជួបជុំគ្នាកុំដើលេង លេងគប់ទឹក បាតម្សៅ ឬជួបជុំគ្នាច្រើន គឺពេលសែនទេវត្តារួចនាំគ្នានៅផ្ទះតែម្តង ។ លោកបន្តថា នៅពេលកម្មករត្រឡប់ទៅវិញ ក្រសួងការងារ និងក្រសួងសុខាភិបាលត្រូវតែចុះពិនិត្យតាមគោលដៅរោងចក្រហសគ្រាសនីមួយៗតែម្តង ដូចជា ការណែនាំបន្តបន្ទាប់នៅពេលចូលធ្វើការ ដើម្បីចៀសវាងការឆ្លងណាមួយ ។
លោកគូសបញ្ជាក់ថា៖«ប៉ុន្តែបើអាចខ្ញុំស្នើដល់សម្តេចតេជោ ហ៊ុន សែន ក៏ដូចជា រដ្ឋមន្ត្រីក្រសួងការងារ និងបណ្តុះបណ្តាលពិចារណាម្តងទៀត ហើយស្នើសុំផ្អាកការឈប់សម្រាកថ្ងៃចូលឆ្នាំប្រពៃណីជាតិខ្មែរទុកថ្ងៃឈប់នេះលើកទៅខែណាមួយ បន្ទាប់ជំងឺកូវីដ១៩នេះ អវត្តមានពីកម្ពុជា ។ យើងមានតែធ្វើវិធីនេះទេ ដើម្បីចៀសឲ្យឆ្ងាយព្រោះយើងកំពុងធ្ងន់ធ្ងរលើបញ្ហា EBA ផង និងជំងឺនេះផងដែលពិបាកដល់កម្មករនោះយើងពិបាកទទួលយក» ។ លោកបានបន្តថា ចំពោះសំណើរនេះ ក្រសួងការងារមិនទាន់បានឆ្លើយតបយ៉ាងណានោះទេ ប៉ុន្តែលោកនឹងត្រៀមដាក់លិខិតទៅក្រសួងការងាររោងដែរ ៕
ចែករំលែកព័តមាននេះ