រហូតមកទល់ពេលនេះ មិនមានកម្មករកាត់ដេរណាម្នាក់បានឆ្លងមេរោគកូវីដ១៩ទេ ទោះបីជាកម្ពុជា រកឃើញមានអ្នកផ្ទុកមេរោគកូវីដ១៩ ចំនួន១១៤នាក់ក្តី។ នេះបើតាមរបាយការណ៍ប្រចាំថ្ងៃដែលធ្វើឡើងដោយក្រសួងសុខាភិបាលកម្ពុជា។
សូមអោយទាំងពេលនេះ និងពេលទៅមុខទៀត គ្មានកម្មករណាម្នាក់មានជំងឺកូវីដ ១៩ដែលកំពុងតែបំផ្លាញសេចក្តីសុខ និងសេដ្ឋកិច្ចទូទាំងពិភពលោក។
វាចាំបាច់ណាស់ ដែលកម្មករទាំងអស់ត្រូវមានសុវត្ថិភាព និងមិនឆ្លងមេរោគកូវីដ១៩ដែលងាយនឹងឆ្លងពីមនុស្សម្នាក់ទៅមនុស្សម្នាក់ទៀត តាមរយៈតំណក់ទឹកតូចៗដែលត្រូវបានក្អកចេញពីមនុស្សដែលមានផ្ទុកមេរោគកូវីដ១៩ ទោះបីជាជននោះមានរោគសញ្ញា ឬមិនមានរោគសញ្ញាក្តី។
ដោយពិចារណាទៅលើរបៀបរស់នៅប្រមូលផ្តុំ និងការបំពេញការងារប្រមូលផ្តុំគ្នា កម្មករកាត់ដេរ គឺត្រូវតែមានវិធានការខ្ពស់បំផុតដើម្បីកុំអោយមានការឆ្លងមេរោគកូវីដ១៩។ ការឆ្លងមេរោគកុវីដ១៩ ដល់កម្មករណាម្នាក់ វាងាយនឹងធ្វើអោយមានការរាលដាលក្នុងចំណោមកម្មករផ្សេងទៀតដែលធ្វើការជាមួយគ្នា និងរស់នៅក្នុងបន្ទប់ជួលជាមួយគ្នា។
ការទប់ស្កាត់ការឆ្លងមេរោគកូវីដ១៩ នៅក្នុងចំណោមកម្មករមិនត្រឹមតែជួយការពារសុខភាពរបស់កម្មករ និងជីវិតរបស់កម្មករទេ វាក៏ថែមទាំងទាក់ទងដល់អនាគតនៃ ឧស្សាហកម្មនៃវិស័យកាត់ ដេរទាំងមូល និងការងារមួយលាននាក់នៅក្នុងវិស័យនេះដែលកំពុងរងផលប៉ះពាល់ស្រាប់ ដោយសារការប្រែប្រួលសេដ្ឋកិច្ចពិភពលោកដោយសារកូវីដ១៩ និងបញ្ហា EBA ។
ប៉ុន្តែជារៀងរាល់ឆ្នាំ កម្មករកាត់ដេរក៏ដូចជាពលរដ្ឋកម្ពុជាជាច្រើនលាននាក់ទៀត ច្រើននាំគ្នាធ្វើដំណើរ ទៅលេងស្រុកកំណើតដោយសារមានច្បាប់ឈប់សម្រាកច្រើនថ្ងៃ និងដើម្បីជួបជុំសប្បាយជាមួយឪពុកម្តាយ និងក្រុមគ្រួសារ។
សម្រាប់កម្មករកាត់ដេរ នេះជាពេវលាដែលសំខាន់ជាងគេ ដើម្បីជួបជុំគ្រួសារ។
ប៉ុន្តែទោះបីជាយ៉ាងណាក៏ដោយចុះ ការធ្វើដំណើរមិនថានៅកម្ពុជា ឬក៏ប្រទេសផ្សេង ទៀតក្នុងពិភពលោកទេ គឺត្រូវបានចាត់ទុកថា ជាហានិភ័យមួយសម្រាប់ការឆ្លង និងចម្លងមេរោគកូវីដ១៩។ រឿងដែលគ្រោះថ្នាក់នោះ គឺដោយសារសត្រូវគ្មានរូបកូវីដ១៩នេះ អាចសម្ងំខ្លួនក្នុងមនុស្សដែលមានរោគសញ្ញា និងមនុស្សគ្មានរោគសញ្ញា ប៉ុន្តែវាអាចឆ្លងទៅកាន់មនុស្សផ្សេងដូចគ្នា។
ហេតុដូច្នេះហើយបានជាប្រទេសស្ទើរទាំងអស់ក្នុងពិភពលោក ណែនាំអោយប្រជាជនរបស់ខ្លួនចៀសវាងការធ្វើដំណើរ បើគ្មានភាពចាំបាច់ ហើយអោយស្នាក់នៅក្នុងផ្ទះរៀងៗខ្លួនមួយរយៈតាមការណែនាំរបស់រដ្ឋាភិបាលនៃប្រទេសនីមួយ។ ចំណាត់ការបែបនេះ ក៏ព្រោះតែតែគេមិនអាចមើលឃើញដោយភ្នែកទទេថា តើនរណាមានមេរោគ ឬនរណាគ្មានមេរោគ0x017d7
សេណារីយ៉ូ ដ៏អាក្រក់បំផុត គឺថាបើសិនជាមានកម្មករណាម្នាក់ធ្វើដំណើរទៅស្រុកកំណើត ហើយវិលត្រឡប់មកធ្វើការវិញជាមួយនឹងការមានមេរោគកូវីដ១៩ទាំងមិនដឹងខ្លួននោះ បុគ្គលនោះអាចនឹងចម្លងដល់កម្មករផ្សេងទៀតនៅក្នុងរោងចក្រជាមួយគ្នា ឬក៏ស្នាក់នៅផ្ទះជួលជាមួយគ្នា។ ក្នុងករណីនេះ វានឹងអាចមានហានិភ័យខ្ពស់ដល់ការឆ្លងរាលដាលដល់រោងចក្រដែលពួកគេធ្វើការ។ វានឹងនាំអោយមាន ការឆ្លងរាលដាលខ្លាំងងតាមរោងចក្រនិងក្នុងចំណោមកម្មករ។
នេះជាសេណារីយ៉ូ ដែលយើងទាំងអស់គ្នាមិនចង់ឃើញឡើយ ពីព្រោះវានឹងធ្វើអោយប៉ះពាល់ដល់សុខភាព និងជីវិតកម្មករនៅក្នុងឧស្សាហកម្មដែលផ្តល់ការងារដល់មនុស្សជិតមួយលាននាក់។ មិនតែប៉ុណ្ណោះ ការមានការចម្លងមេរោគកូវីដក១៩ ណាមួយក្នុងចំណោមកម្មករក៏អាចនាំអោយឈានដល់ការបិទរោងចក្រផងដែរ ដើម្បីចៀសវាងការរាលដាលនៃមេរោគកូវីដ១៩ កាន់តែខ្លាំង។ នេះជាវិធានការដែលតែងតែប្រកាន់យក ដើម្បីទប់ស្កាត់ការឆ្លងរាលដាលមនុស្សច្រើន។ ក្នុងករណីអាក្រក់បែបនេះ វាមិនត្រឹមតែធ្វើអោយមនុស្សជាច្រើនឈឺទេ ប៉ុន្តែថែមទាំងអាចប៉បះពាល់ការងារផងដែរ។
ដូច្នេះនៅពេលដែលមនុស្សប្រមាណមួយលាននាក់កំពុងពិចារណាការធ្វើដំណើរទៅកាន់ស្រុកកំណើត វាជាការចាំបាច់ដែលត្រូវដឹងថា ការធ្វើដំណើរអាចបង្កើនហានិភ័យនៃការឆ្លងមេរោគកូវីដ១៩ ហើយទាមទារការសម្រេចចិត្តយ៉ាងប្រយ័ត្នប្រយ៉ែង។
កម្មករត្រូវសម្រេចចិត្ដដូចម្តេច?
ជម្រើសទីមួយគឺមិនទាន់ទៅកាន់ស្រុកកំណើត ដោយរង់ចាំអោយដល់ពេលវេលាដ៏សមស្របមួយដែលគ្មានហានិភ័យនៃការឆ្លងមេរោគកូវីដ១៩។
ជម្រើសទីពីរ គឺត្រូវទៅស្រុកកំណើត។ សម្រាប់ជម្រើសទីពីរ កម្មករទាំងអស់ត្រូវសម្រេចចិត្តយ៉ាងប្រុងប្រយ័ត្ន ដើម្បីច្បាស់ថាពួកគេនឹងមិនឆ្លងមេរោគកូវីដ១៩ នៅពេលធ្វើដំណើរ និងនៅតាមភូមិស្រុក។ ដូច្នេះការធ្វើដំណើរត្រូវចៀសវាងការធ្វើដំណើរដែលប្រើមធ្យោបាយមាន មនុស្សច្រើនអង្គុយ ប្រជ្រៀតគ្នា។ ការមានមធ្យោបាយធ្វើដំណើរផ្ទាល់ខ្លួន គឺជារឿងល្អ។ ទីពីរ សាកសួរទៅកាន់ឪពុកម្តាយ ដើម្បីដឹងថា តើមានអ្នកជិតខាង ឬអ្នកភូមិ មានឆ្លងមេរោគកូវីដ១៩ដែរឬទេ? បើសិនជាមាននោះ កម្មករមិន គួរសម្រេចចិត្តធ្វើដំណើរទៅទីនោះឡើយ។ វាជាការអនុវត្តទូទៅដែលថា មនុស្សមិនត្រូវធ្វើដំណើរ ទៅកាន់កន្លែងដែលមានឆ្លងមេរោគកូវីដ១៩ទេ។
តាមពិតទៅនៅក្នុងសម័យបច្ចេកវិទ្យាទំនើបនេះ មនុស្សនៅតែអាចទាក់ទងគ្នា សួរសុខទុក្ខគ្នា ញញឹម ឃើញមុខគ្នា តាមទូរស័ព្ទដៃ បើទោះបីជាមិនបានឃើញមុខផ្ទាល់ក្តី។ ដូច្នេះការទំនាក់ទំនងតាមទូរស័ព្ទអាចជាជម្រើសមួយ ដើម្បីសួរសុខទុក្ខឪពុកម្តាយជំនួសអោយការធ្វើដំណើរទៅស្រុក។
ការសម្រេចចិត្តរបស់កម្មករក៏ត្រូវតែធ្វើតាមការណែនាំរបស់រដ្ឋាភិបាលផងដែរ។ រដ្ឋាភិបាលរហូតមកទល់ពេលនេះបានចាត់វិធានការមួយកម្រិតម្តងៗតាមភាពចាំបាច់ ដើម្បីទប់ស្កាត់ការឆ្លងរាលដាលមេរោគកូវីដ១៩។ រហូតមកទល់ពេលនេះ កម្ពុជាបានបង្ហាញសញ្ញាដំបូងនៃជោគជ័យប្រឆាំងនឹងកូវីដ១៩។ អ្នកជំងឺ ជិតពាក់កណ្តាលក្នុងចំណោម១១៤នាក់បានជាសះស្បើយ ហើយគ្មាននរណាម្នាក់ស្លាប់ដោយមេរោគនេះទេ។
ទន្ទឹមនោះករណីថ្មីក៏មានតិច ឬគ្មានសោះនៅក្នុងរយៈពេលប៉ុន្មានថ្ងៃចុងក្រោយនេះ។ ដើម្បីជោគជ័យទាំងស្រុងក្នុងការប្រយុទ្ធនឹងមេរោគកូវីដ១៩នេះ ទាំងកម្មករមួយលាននាក់ និងប្រជាជនទាំងអស់ ត្រូវតែចូលរួមយ៉ាងសកម្ម និងស្តាប់ការណែនាំរបស់រដ្ឋាភិបាល ដើម្បីទប់ស្កាត់ការរាលដាលមេរោគកូវីដ១៩។ អ្នកជំនាញព្រមានថា ទោះបីជាកូវីដ១៩ ស្ងប់ស្ងាត់ក្នុងប៉ុន្មានថ្ងៃនេះក្តី ការប្រយុទ្ធនឹងកូវីដ១៩ គឺមិនត្រូវបន្ធូរដៃទេ។ គេត្រូវប្រយ័ត្នរលកទីពីរនៃការរាលដាលមេរោគដ៏សាហាវនេះ។
សូមអោយកម្មករទាំងមួយលាននាក់ និងប្រជាជនទាំងអស់ឆ្លងផុតវិបត្តិកូវីដ១៩ទាំងអស់គ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ