ជំនួយការគ្រូបង្វឹកក្រុមបាល់ទាត់ជម្រើសជាតិឥណ្ឌូនេស៊ីលោក Gong Oh Kyun បានទទួលការធ្វើតេស្តរកឃើញសញ្ញាវិជ្ជមានចំពោះវីរុស Covid-19 នេះបើយោងតាមការប្រកាសនៅលើគេហទំព័រផ្លូវការ របស់សមាគមបាល់ទាត់ឥណ្ឌូណេស៊ី (PSSI) កាលពីថ្ងៃសៅរ៍ម្សិលមិញ ។
បើតាមការប្រកាសរបស់ PSSI បានឱ្យដឹងថា ក្រៅពីលោក Gong Oh Kyun ក្នុងនោះគ្រូបង្វឹកធំក្រុមបាល់ទាត់ជម្រើសជាតិឥណ្ឌូនេស៊ីលោក Shin Tae Yong រួមនិងក្រុមការងារជនជាតិកូរ៉េ ៣នាក់ផ្សេងទៀតគឺលោក Kim Hae Woon, Kim Woo Jae និងលោក Lee Jaehong ក៏បានទទួលការធ្វើតេស្តនៅមន្ទីរពេទ្យផងដែរ ។ ជាលទ្ធផលបុរសជនជាតិកូរ៉េទាំង៤នាក់ ត្រូវបានប្រកាសថាមានសញ្ញាអវិជ្ជមានចំពោះវីរុស Covid-19 ។
វេជ្ជបណ្ឌិតក្រុមជម្រើសជាតិឥណ្ឌូនេស៊ីលោក Syarif Alwi បាននិយាយថាបច្ចុប្បន្នលោក Gong Oh Kyun កំពុងមានសុខភាពល្អ ។ ហើយរូបលោកនឹងឆ្លងកាត់ការតាមដានសុខភាពជាបន្តទៀត ដោយនៅដាច់ដោយឡែកពីគេ ។
តាមការបញ្ជាក់បន្ថែមទៀតបានឱ្យដឹងថា កីឡាករ រួមនិងបុគ្គលិកទាំងអស់របស់ PSSI បានអនុវត្តនីតិវិធីដោយធ្វើការងារពីផ្ទះ ចាប់តាំងពីថ្ងៃទី ១៦ ខែ មីនា មកម្ល៉េះ ៕
ចែករំលែកព័តមាននេះ