ខេត្ដបាត់ដំបង ៖ សប្បុរសជនដែល គាំទ្រចំពោះកម្មវិធីរឿងពិតនៃជីវិតរបស់សាខាកាកបាទក្រហមកម្ពុជាខេត្ដ បានចុះចែកអំណោយដោយផ្ទាល់ដល់ប្រជាពលរដ្ឋក្រីក្រចាស់ជរាចំនួន២គ្រួសារ នៅឃុំអន្លង់វិល ស្រុកសង្កែ ។ ប្រតិភូដឹកនាំដោយលោក កង ប៊ន នាយកប្រតិបត្ដិសាខា រួមដំណើរដោយមន្ដ្រីសាខា ព្រមទាំងសប្បុរសជនទាំងអស់ គឺលោកវរសេនីយ៍ឯក ឡៅ ប៊ុនម៉េង តំណាងឱ្យលោកឧត្ដមសេនីយ៍ត្រី អ៊ុក ឃ្នួច មេបញ្ជាការសឹករងខេត្ដ លោកភួង ជាប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ដ លោក ឡុង សុភឿន ប្រធានការិយាល័យអប់រំ យុវជន និងកីឡា ស្រុកសង្កែ និងភរិយា និងលោកកែវ ពិជិត និងភរិយា ។
ដោយអនុវត្ដតាមគោលការណ៍ដឹកនាំរបស់លោកជំទាវ ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នាព្រឹកថ្ងៃទី៣១ ធ្នូ ឆ្នាំ២០០៩ អំណោយជាគ្រឿងឧភោគបរិភោគ ត្រូវបានប្រតិភូនាំយកទៅចែកជូនប្រជាពលរដ្ឋក្រីក្រចាស់ជរាចំនួន២គ្រួសារ គឺលោកតាប៉ិត ឆុំ អាយុ៧៩ឆ្នាំ រស់នៅភូមិបេង ឃុំអន្លង់វិល ដែលមានជម្ងឺងងឹតភ្នែក និងថ្លង់រស់នៅតែម្នាក់ឯង និងលោកយាយ សុខ ម៉ក់ អាយុ៧៣ឆ្នាំ រស់នៅភូមិអូរមុនី១ ឃុំអន្លង់វិល ដែលមានជម្ងឺងងឹតភ្នែក គ្មានបងប្អូនជាទីពឹង រស់ដោយសារញាតិជិតខាងមើលថែទាំ ។
អំណោយដែលនាំយកទៅចែកជូននោះក្នុងម្នាក់ៗទទួលបានអង្ករ៥០គីឡូ ក្រាម កស៊ីអ៊ីវ២ដប ទឹកត្រី២ដប កន្ទេល១ អំបិល១គីឡូក្រាម មី១កេស ខោអាវ១ សំរាប់ ត្រីខ៦កំប៉ុង ភួយ១ មុង១ សារុង១ ក្រមា១ សាប៊ូ៥ដុំ និងម្សៅសាប៊ូ១ថង់ ។ លោកកង ប៊ន បានមានប្រសាសន៍ថា តាមអនុសាសន៍ដ៏ខ្ពង់ខ្ពស់របស់លោកជំទាវ ប៊ុន រ៉ានី ហ៊ុន សែន ក៏ដូចជារាជរដ្ឋភិបាល គឺមិនទុកឱ្យប្រជាពលរដ្ឋណាម្នាក់ដាច់ពោះ ស្លាប់ដោយសារអត់បាយនោះទេ ពោលគឺទីណាមានប្រជាពលរដ្ឋក្រីក្រលំបាក ទីនោះមានកាកបាទក្រហមកម្ពុជា ។
លោកតា និង លោកយាយសុខ ម៉ក់ បានលើកម្រាមដៃដប់សំពះទាំងភ្នែកមើលមិនឃើញជូនពរដល់សប្បុរសជនដែលបានផ្ដល់អំណោយដ៏ថ្លៃថ្លានេះ សូមជួបតែសេចក្ដីសុខ សេចក្ដីចំរើន ប្រកបការងារបានជោគជ័យគ្រប់ពេលវេលាកុំបីឃ្លៀងឃ្លាតឡើយ ។
ចែករំលែកព័តមាននេះ