រាជធានីភ្នំពេញ ៖ បុរសជាកម្មកររោងចក្រកាត់ដេរម្នាក់ ខណៈទៅធ្វើការបានឆ្លៀតដាក់ថ្នាំញៀនតាមខ្លួនដើម្បីលក់ឲ្យអ្នកទិញយកទៅប្រើប្រាស់បន្ត ហើយត្រូវបានកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលខណ្ឌដង្កោ សហការជាមួយកម្លាំងនគរបាលប៉ុស្តិ៍ស្ពានថ្មធ្វើការស្រាវជ្រាវរហូតឈានដល់ការចាប់ខ្លួននាំទៅសាកសួរនិងចាត់ការតាមច្បាប់។
ការចាប់ខ្លួនជនសង្ស័យម្នាក់ខាងលើនេះបានធ្វើឡើងកាលពីវេលាម៉ោង៩ព្រឹកថ្ងៃទី១ ខែ មេសា ឆ្នាំ២០២០ ត្រង់ចំណុចក្នុងរោងចក្រកាត់ដេរមួយកន្លែង ស្ថិតក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ។
ជនសង្ស័យខាងលើឈ្មោះ កែម វុទ្ធី ភេទប្រុស អាយុ២៧ឆ្នាំ មុខរបរកម្មកររោងចក្រខាងលើ ស្នាក់នៅផ្ទះជួលស្ថិតនៅក្នុងភូមិបាគូ សង្កាត់ដង្កោ ខណ្ឌដង្កោ ។ នគរបាលដកហូតបានគ្រឿងញៀនចំនួន១៣ថង់តូច, ម៉ូតូ១គ្រឿង និងទូរស័ព្ទ១គ្រឿង ។
លោកវរសេនីយ៍ឯកជឹម សុីថា អធិការនគរបាលខណ្ឌដង្កោបានប្រាប់ឲ្យដឹងថា កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌដង្កោ រួមជាមួយកម្លាំងនគរបាលប៉ុស្តិ៍ស្ពានថ្ម បានធ្វើការស្រាវជ្រាវរកមុខសញ្ញាប្រព្រឹត្តបទល្មើសផ្សេងដើម្បីធ្វើការបង្ក្រាបនិងទប់ស្កាត់កុំឲ្យកើតមាននៅក្នុងមូលដ្ឋាន។
លោកអធិការខណ្ឌដង្កោបានបន្តថា ខណៈនោះបានទទួលព័ត៌មានពីមហាជនថា មានកម្មកររោងចក្រម្នាក់ធ្វើសកម្មភាពជួញដូរគ្រឿងញៀននៅក្នុងរោងចក្រកាត់ដេរខាងលើ ទើបកម្លាំងសមត្ថកិច្ចឆ្មក់ចូលទៅធ្វើការបង្ក្រាប និងចាប់ខ្លួនដោយដកហូតវត្ថុតាងខាងលើរួមមានថ្នាំញៀនទាំង១៣កញ្ចប់នោះត្រូវបានជនសង្ស័យទុកនៅក្នុងហោប៉ៅខោមុខខាងស្តាំរបស់ខ្លួន ។ បន្ទាប់មកកម្លាំងរបស់លោកក៏បាននាំជនជនសង្ស័យទៅកាន់អធិការដ្ឋាននគរបាលខណ្ឌដង្កោដើម្បីធ្វើការសាកសួរនិងចាត់ការតាមនីតិវិធី៕ (កែសម្រួលដោយ ៖ ធីតា)
ចែករំលែកព័តមាននេះ