ក្រសួង​ស្នើ​ឲ្យ​សមត្ថកិច្ច​ចាប់​អ្នក​ផ្សាយ​លក់ ទូ​បាញ់​សម្លាប់​មេរោគ Covid-19


រាជធានី​ភ្នំពេញ ៖ ក្រសួងសុខាភិបាល​នៃ​ព្រះរាជាណាចក្រ​កម្ពុជា បាន​ស្នើ​សុំ​ដល់​ប្រជាពលរដ្ឋ ប្រសិនបើ​ជួប​ប្រទះ ឬ​ឃើញ​ជន​ណា​កំពុង​លក់​ទូ​បាញ់ កម្ចាត់​វីរុស និង​មេរោគ និង​ធុងអាគុយ​សម្លាប់​មេរោគ សូម​បងប្អូន​ប្រញាប់​ផ្ល​ល់​ព័ត៌មាន​ឲ្យ​អាជ្ញា​ធរមាន​សមត្ថកិច្ច ដើម្បី​មាន​វិធានការ​តាម​ផ្លូវច្បាប់ ។

ក្រសួងសុខាភិបាល បាន​ប្រកាស​កាលពី​ថ្ងៃ​ទី​៣១ មីនា ម្សិលមិញ​នេះ បន្ទាប់​ពី​មាន​បណ្ដាញ​សង្គម​ហ្វេ​ស​ប៊ុ​កមួយ​ចំនួន បាន​ធ្វើការ​ផ្សព្វផ្សាយ នៅ​ទូ​បាញ់ថ្នាំ​កម្ចាត់​មេរោគ​កូ​រ៉ូ​ណា ហើយ​ថា ការ​ផ្សព្វផ្សាយ​របស់​បណ្ដាញ​សង្គម​ហ្វេ​ស​ប៊ុ​ក ជា​ការ​ភូត​កុហក​បោកប្រាស់ និង​បំផ្លើស​ហួស​ពី​ការ​ពិត​គ្មាន​មូលដ្ឋាន​វេជ្ជសាស្ត្រ​ត្រឹមត្រូវ ។

យ៉ាងណា​ការ​ផ្សព្វផ្សាយ​បំ​ភ្លើ​ស លក់​ទូ​បាញ់​កម្ចាត់​មេរោគ ធុងអាគុយ​សម្រាប់​មេរោគ​មិន​មានច្បាប់​ត្រឹមត្រូវ​នោះ​ក្រសួងសុខាភិបាល បាន​ស្នើ​សុំ​ឲ្យ​ម្ចាស់​គណនី​ហ្វេ​ស​ប៊ុ​ក​ទាំងនោះ បញ្ឈប់​ការ​ផ្សព្វផ្សាយ​ព័ត៌មាន ហើយ​ស្នើ​ឱ្យ​អាជ្ញា​ធរមាន​សមត្ថកិច្ច​ចាត់វិធានការ​តឹងរ៉ឹង​តាម​ផ្លូវច្បាប់ ចំពោះ​ម្ចាស់​គណនី​ហ្វេ​ស​ប៊ុ​ក ដើម្បី​កុំ​ឲ្យ​ជន​ឱកាសនិយម​ទាំងនោះ​បន្ត​បោកប្រាស់​ប្រជាពលរដ្ឋ​បន្ត​ទៀត ។

ដោយ​មាន​បញ្ជា​ផ្ទាល់​ពី ឯកឧត្តម នាយ​ឧត្តមសេនីយ៍ សន្តិ​បណ្ឌិត នេ​ត សា​វឿ​ន អគ្គស្នងការ​នគរបាល​ជាតិ នាយកដ្ឋាន​ប្រឆាំង​បទល្មើស​បច្ចេកវិទ្យា​ធ្វើការ​ស្រាវជ្រាវ​ទៅ​លើ​ផេ​ក Yana Shanko ដែល​បាន​ធ្វើការ​បង្ហោះ​ផ្សព្វផ្សាយ​ទាក់ទង​ទៅ​នឹង​ការ​ផលិត និង​ដាក់​ឱ្យ​ប្រើប្រាស់​ឧបករណ៍ បាញ់​សម្លាប់ មេរោគ​កូ​វីត​-១៩ ដោយ​ស្វ័យប្រវត្តិ​ខាងលើ​នេះ ។

នាយកដ្ឋាន​ប្រឆាំង​បទល្មើស​បច្ចេកវិទ្យា បានអោយ​ដឹង​ថា កម្លាំង​ជំនាញ​បាន​ទាក់ទង​ទៅ​អ្នក​ផលិត​ឧបករណ៍​នោះ ដើម្បី​ធ្វើការ​សាកសួរ​យក​ព័ត៌មាន​លម្អិត ហើយ​អ្នក​ផលិត​ឧបករណ៍​នោះ ក៏​បាន​បញ្ជាក់​ថា តាម​ការ​ពិត​ឧបករណ៍​នោះ ប្រើ​សម្រាប់​បាញ់​អាល់កុល​ដោយ​ស្វ័យប្រវត្តិ រាល់ពេល​មាន​មនុស្ស​ឆ្លងកាត់​ប៉ុណ្ណោះ ប៉ុន្តែ​មិន​មាន​ន័យ​ថា វា​អាច​សម្លាប់​មេរោគ​កូ​វីត​-១៩ បាន​ទេ ។

នាយកដ្ឋាន​ប្រឆាំង​បទល្មើស​បច្ចេកវិទ្យា បញ្ជាក់​ដែរ​ថា ហេតុ​ដូច្នេះ​ហើយ​សូម​បងប្អូន​ប្រជា​ព​រដ្ឋ​ទាំងអស់ កុំ​មានការ​យល់​ច្រឡំ ព្រោះ​នេះ​មិនមែន​ជា​ការ​ពិត​ទេ ដែល​ថា ឧបករណ៍​នេះ​អាច​សម្លាប់​មេរោគ​កូ​វីត​-១៩ បាន​១០០% ដោយ​ស្វ័យប្រវត្តិ​ដូចដែល​បាន​ផ្សព្វផ្សាយ​បំផ្លើស​ក្នុង​ផេ​កមួយ​ចំនួន​នោះ ។

គួរ​បញ្ជាក់ ផង​ដែរ​ថា បច្ចុប្បន្ន​នេះ ពុំ​ទាន់​មាន​ឧបករណ៍​មួយ​ណា ដែល​អាច​ព្យាបាល​ឬ​សម្លាប់​មេរោគ​កូ​វីត​-១៩ បាន ដែល​ទទួលស្គាល់​ពី​អង្គការ​សុខភាព​ពិភពលោក ឬ​ក្រសួងសុខាភិបាល នៅឡើយ​ទេ ចំពោះ​ការ​ផ្សព្វផ្សាយ​ខាងលើ​ជា​ការ​ផ្សព្វផ្សាយ​បំ​ភ្លើ​ស និង​ជា​ព័ត៌មាន​មិន​ពិត​ពេល​នេះ​នាយកដ្ឋាន​ប្រឆាំង​បទល្មើស​បច្ចេកវិទ្យា​កំពុងធ្វើការ​ស៊ើបរក​ជន​បំពុលសង្គម​ទាំងនោះ មក​ចាត់វិធានការ​តាម​ផ្លូវច្បាប់ ៕

ព័ត៌មាន​ជាតិ

Sponsored News

ការស្ទង់មតិគេហទំព័រថ្មី




សូម​អរគុណ