លោក នេត សាវឿន បញ្ជាឲ្យស៊ើបករណី«ម៉ាស៊ីនសម្លា.ប់មេរោគ Covid-19 ផលិតដោយកូនខ្មែរ»
រាជធានីភ្នំពេញ ៖ នៅថ្ងៃទី៣១ មីនា ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន…
រាជធានីភ្នំពេញ ៖ នៅថ្ងៃទី៣១ មីនា ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានចេញបញ្ជាទៅនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ឲ្យស៊ើបអង្កេត លើគណនីហ្វេសប៊ុកមួយចំនួន ដែលបានបង្ហាញនៅឧបករណ៍ថ្មីមួយ ដែលបានបង្កើតឡើង ដោយអះអាងថា ដើម្បីសម្លាប់មេរោគ Covid-19 ។
បើតាមគណនីហ្វេសប៊ុកមួយបានបង្ហោះយ៉ាងដូច្នេះថា “ម៉ាស៊ីនសម្លាប់មេរោគ covid-19 ស្វ័យប្រវត្តិ ដែលខ្ញុំផលិតផ្ទាល់ដៃ ឥឡូវនេះ បានជោគជ័យ 100% ហើយ ហើយក៏បានបំពាក់នៅស្ថាបន័មួយចំនួនផងដែរ ។ ក៏សុំអរគុណដល់ លោកឆាយ ផងដែរ ដែលខិតខំជួយផលិតទាំងយប់ទាំងថ្ងៃជាមួយខ្ញុំ” ហើយបញ្ជាក់ថា Made In Cambodia ។
ដោយមានបញ្ជាផ្ទាល់ពី ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យាធ្វើការស្រាវជ្រាវទៅលើផេក Yana Shanko ដែលបានធ្វើការបង្ហោះផ្សព្វផ្សាយទាក់ទងទៅនឹងការផលិត និងដាក់ឱ្យប្រើប្រាស់ឧបករណ៍ បាញ់សម្លាប់ មេរោគកូវីត-១៩ ដោយស្វ័យប្រវត្តិខាងលើនេះ ។
នាយកដ្ឋានប្រឆាំងបទល្មើសបច្ចេកវិទ្យា បានអោយដឹងថា កម្លាំងជំនាញបានទាក់ទងទៅអ្នកផលិតឧបករណ៍នោះ ដើម្បីធ្វើការសាកសួរយកព័ត៌មានលម្អិត ហើយអ្នកផលិតឧបករណ៍នោះ ក៏បានបញ្ជាក់ថា តាមការពិតឧបករណ៍នោះ ប្រើសម្រាប់បាញ់អាល់កុលដោយស្វ័យប្រវត្តិ រាល់ពេលមានមនុស្សឆ្លងកាត់ប៉ុណ្ណោះ ប៉ុន្តែមិនមានន័យថា វាអាចសម្លាប់មេរោគកូវីត-១៩ បានទេ ។
នាយកដ្ឋានប្រឆាំងបទល្មើសបច្ចេកវិទ្យា បញ្ជាក់ដែរថា ហេតុដូច្នេះហើយសូមបងប្អូនប្រជាពរដ្ឋទាំងអស់ កុំមានការយល់ច្រឡំ ព្រោះនេះមិនមែនជាការពិតទេ ដែលថា ឧបករណ៍នេះអាចសម្លាប់មេរោគកូវីត-១៩ បាន១០០% ដោយស្វ័យប្រវត្តិដូចដែលបានផ្សព្វផ្សាយបំផ្លើសក្នុងផេកមួយចំនួននោះ ។
គួរបញ្ជាក់ ផងដែរថា បច្ចុប្បន្ននេះ ពុំទាន់មានឧបករណ៍មួយណា ដែលអាចព្យាបាលឬសម្លាប់មេរោគកូវីត-១៩ បាន ដែលទទួលស្គាល់ពីអង្គការសុខភាពពិភពលោក ឬក្រសួងសុខាភិបាល នៅឡើយទេ ចំពោះការផ្សព្វផ្សាយខាងលើជាការផ្សព្វផ្សាយបំភ្លើស និងជាព័ត៌មានមិនពិតពេលនេះនាយកដ្ឋានប្រឆាំងបទល្មើសបច្ចេកវិទ្យាកំពុងធ្វើការស៊ើបរកជនបំពុលសង្គមទាំងនោះ មកចាត់វិធានការតាមផ្លូវច្បាប់ ៕
ចែករំលែកព័តមាននេះ