ADផ្ទាំងផ្សព្វផ្សាយពាណិជ្ជកម្ម

Picture

ទីផ្សារ​ផ្លែ​តា​ង៉ែ​ន​ធ្លាក់ចុះ​ខ្លាំង តែ​ឈ្មួញ​ប្រមូល​ផល​ចំ​សែន​ឆេ​ង​ម៉េ​ង​លក់​បាន​ថ្លៃ

3 ឆ្នាំ មុន
  • ប៉ៃលិន

ខេត្ត​ប៉ៃលិន ៖ រហូត​មក​ដល់​ព្រឹក​ថ្ងៃ​ទី​២៩ ខែមីនា ឆ្នាំ​២០២០ គេ​សង្កេត​ឃើញ​មាន​ឈ្មួញ​ម្នាក់ដឹកនាំ កម្មករ​ប្រមាណ​ជាង​៥០​នាក់​នាំ​គ្នា​សម្រុក​បេះ​ផ្លែ​តា​ង៉ែ​ន ហៅ​មៀន​ប៉ៃលិន​ជាង​៣០០​ដើម ដោយ​អ្នកខ្លះ​បេះ​ផ្លែ​បណ្តើរ​ច្រក​កេះ​បណ្តើរ និង​អ្នកខ្លះ​ទៀត…

ខេត្ត​ប៉ៃលិន ៖ រហូត​មក​ដល់​ព្រឹក​ថ្ងៃ​ទី​២៩ ខែមីនា ឆ្នាំ​២០២០ គេ​សង្កេត​ឃើញ​មាន​ឈ្មួញ​ម្នាក់ដឹកនាំ កម្មករ​ប្រមាណ​ជាង​៥០​នាក់​នាំ​គ្នា​សម្រុក​បេះ​ផ្លែ​តា​ង៉ែ​ន ហៅ​មៀន​ប៉ៃលិន​ជាង​៣០០​ដើម ដោយ​អ្នកខ្លះ​បេះ​ផ្លែ​បណ្តើរ​ច្រក​កេះ​បណ្តើរ និង​អ្នកខ្លះ​ទៀត តែង​ដើម​កាត់​មែក​តម្រឹម​ស្លឹក​ជា​បណ្តើរ​ៗ ខណ​:​ឈ្មួញ​ប្រាប់​ថា ផ្លែ​តា​ង៉ែ​ន​ពេល​នេះ​មានការ​ធ្លាក់​ថ្លៃ ខ្លាំង​ជាង​មុន បើ​លក់​ចេញ​ទៅ​ប្រទេស​ថៃ គឺ​អត់​ចំណេញ​អ្វី​នោះ​ទេ គឺ​ខាតចុងខាតដើម​តែ​ម្តង ។ តែ​ពួក​គេ​បព​យក​ទៅ​លក់​ឱ្យ​ប្រជាពលរដ្ឋ​ជាប់​ខ្សែស្រឡាយ​ចិន នៅ​តាម​បណ្តា​ខេត្ត​នានា ដែល​មាន​តម្រូវការ​ទិញ​យក​ទៅ​សែនឆេងម៉េង ទើប​លក់​បាន​ថ្លៃ​ខ្ពស់​ជាង​លក់​ឱ្យ​ខាង​ឈ្មួញ​ថៃ​បន្តិច ។

តាម​ប្រភព​ព័ត៌មាន​ពី​ស្ត្រី​ម្នាក់ ឈ្មោះ ស្រី​ម៉ៅ អាយុ​៣៥​ឆ្នាំ ជា​ឈ្មួញ រស់នៅ​ក្នុង​ក្រុងប៉ៃលិន បាន​រៀបរាប់​ឱ្យ​ដឹង​ថា គាត់​បាន​ម៉ៅ​ចម្ការ​​តាង៉ែន​មួយ​កន្លែង ស្ថិត​នៅ​ក្នុងភូមិ​តា​ង៉ែ​ន​ក្រោម សង្កាត់​ប៉ៃលិន ក្រុងប៉ៃលិន ដោយ​ម្ចាស់​ចម្ការ​លក់​ឱ្យ​គាត់​ក្នុង​១​គីឡូក្រាម តម្លៃ​៣០០០​ពាន់​រៀល ។ បើ​គាត់​បេះ​យក​ទៅ​លក់​បន្ត​នៅ​ប្រទេស​ថៃ គេ​ឱ្យ​ត្រឹមតែ​១​គីឡូក្រាម​តម្លៃ​១៣០០​រៀល​ទៅ​១៥០០​រៀល​ប៉ុណ្ណោះ ខាត​អស់​ពាក់កណ្តាល ។

​ស្ត្រីជា​ឈ្មួញខាងលើ​បាន​បន្ត​​ថា ការ​ទិញ​ផ្លែ​តា​ង៉ែ​ន​ពេល​នេះ ពិតជា​មានការ​ធ្លាក់​ចុះ​ខ្លាំង តែ​គាត់​ក៏​មានសំណាង​ដែរ ដោយសារ​ជួល​កម្មករ​បេះ​តា​ង៉ែ​ន​ប៉ះ​ចំ​រដូវ ដែល​ប្រជាពលរដ្ឋ​ខ្មែរ​ជាប់​ខ្សែស្រឡាយ​ចិន​មួយ​ចំនួន​នៅ​តាម​បណ្តា​ខេត្ត​នានា គេ​មាន​តម្រូវការ​ទិញ​យក​ទៅ​សែន​ឆេងម៉េង​ ទើប​គាត់​បេះ​លក់​បាន​ខ្ពស់​បន្តិច គឺ​១​គីឡូក្រាម​អាច​លក់​បាន​ចាប់ពី​៤០០០​រៀល ទៅ​៥០០០​រៀល​ដែរ ។ ​គាត់​ក៏​ជួល​កម្មករ​ជា​ច្រើន​នាក់ ឱ្យ​ចូល​បេះ​ផ្លែ​តា​ង៉ែ​ន​នេះ ដោយ​១​កញ្ឆេ ទម្ងន់​២៥​គីឡូក្រាម ឱ្យ​ថ្លៃ​ឈ្នួល​៥០០០​រៀល បើ​កាលពីមុន​១​កញ្ឆេ​ឱ្យ​ថ្លៃ​ឈ្នួល​៨០០០​រៀល ។ ប៉ុន្តែ​ដោយសារ​តែ​តម្លៃ​ទីផ្សារ​តា​ង៉ែ​ន​មានការ​ធ្លាក់​ចុះ​ខ្លាំង ការ​ជួល​កម្មករ ក៏​កាត់​បន្ថយ​ទៅ​តាម​នោះ​ដែរ ។

​ស្ត្រីជា​ឈ្មួញខាងលើ​បញ្ជាក់​ថា ការ​បេះ​ផ្លែ​តា​ង៉ែ​ន​នេះ មាន​រយ​:​ពេល​ជាង​១០​ថ្ងៃ​មក​ហើយ ដោយ​ចម្ការ​ខ្លះ​បេះ​បាន​៥​តោន តែ​ការ​បេះ​នៅ​ចម្ការ​នេះ​បាន​ប្រហែល​ជាង​១០​តោន ហើយ​ដឹក​យក​ទៅ​លក់ដូរ​នៅ​តាម​បណ្តា​ខេត្ត​នានា ក្នុង​ប្រទេស​កម្ពុជា ជា​បណ្តើរ​ៗ​ដែរ ខណ​:​បេះ​ចម្ការ​មួយ​អស់​ចូល​ទៅ​បេះ​នៅ​ចម្ការ​មួយទៀត​ជា​ហូរហែ​ដែរ​។

ចំណែក​ម្មករ​ដែល​បេះ​ផ្លែ​តា​ង៉ែ​ន​បាន​រៀបរាប់​ឱ្យ​ដឹង​ដែរ​ថា ពួក​គាត់​ម្នាក់​ៗ ខ្លះ​មាន​កូ​ច​ចៅ​តូច​ៗ មក​ពី​ស្រុក​កំ​រៀង ខេត្តបាត់ដំបង ខ្លះមក​ពី​ក្រុងប៉ៃលិន និង​មក​ពី​ខេត្ត​ផ្សេង​ៗ​ទៀត​ដែរ ដោយ​ស៊ីឈ្នួល​បេះ​ផ្លែ​តា​ង៉ែ​ន​ហៅ​មៀន​ប៉ៃលិន ក្នុង​១​ថ្ងៃ ​រក​កម្រៃបាន​ជួនកាល​៣០០០០​រៀល ទៅ​៥០០០០​រៀល ។ ពួក​គាត់​​បាន​បន្ត​ទៀត​ថា យប់​នៅ​ត្រង់​កន្លែង​ណា នាំ​គ្នា​បោះ​តង់​ស្នាក់​នៅ​កន្លែង​នោះ ហើយ​ដាំបាយ​ធ្វើ​ម្ហូប​ហូប​ជាមួយ​គ្នា ។ ចំណែក​អ្នក​រស់នៅ​ជិត​ៗ​ក្នុង​ក្រុង ក៏​ត្រឡប់​ទៅ​ស្នាក់​នៅផ្ទះ​របស់​ខ្លួន​វិញ លុះ​ព្រឹក​ឡើង​នាំ​គ្នា​បន្ត​ដើរ​បេះ​ផ្លែ​តា​ង៉ែ​ន ឱ្យ​ថៅកែ​នៅ​តាម​ចម្ការ​នីមួយ​ៗ រហូត​ដល់​អស់ ទើប​ឈប់​ទៅ​រក​ការងារ​ផ្សេង​ទៀត ៕ (កែ​សម្រួលដោយ ​៖ ធីតា​)

អត្ថបទសរសេរ ដោយ

កែសម្រួលដោយ