អូស្ត្រាលី ៖ នាយករដ្ឋមន្ត្រីអូស្ត្រាលី លោក ស្កុត ម៉ូរីសុន (Scott Morrison) បាននិយាយកាលពីថ្ងៃអាទិត្យថា អត្រានៃការរាលដាលនៃមេរោគឆ្លងថ្មីរបស់អូស្ត្រាលី…
អូស្ត្រាលី ៖ នាយករដ្ឋមន្ត្រីអូស្ត្រាលី លោក ស្កុត ម៉ូរីសុន (Scott Morrison) បាននិយាយកាលពីថ្ងៃអាទិត្យថា អត្រានៃការរាលដាលនៃមេរោគឆ្លងថ្មីរបស់អូស្ត្រាលី បានថយចុះពាក់កណ្តាលក្នុងរយៈពេលប៉ុន្មានថ្ងៃចុងក្រោយនេះ ខណៈដែលលោកបានប្រកាសបន្ថែមទឹកប្រាក់ចំនួន ១.១ពាន់លានដុល្លារអូស្ត្រាលី (៦៨០លានដុល្លារ) ដើម្បីពង្រីកបច្ចេកវិទ្យាតេឡេវេជ្ជសាស្ត្រ និងសេវាកម្មសុខភាពផ្សេងទៀត។
លោក ម៉ូរីសុន បាននិយាយថា ការកើនឡើងនូវករណីប្រចាំថ្ងៃក្នុងប៉ុន្មានថ្ងៃថ្មីៗនេះ គឺមានប្រមាណ ១៣% -១៥% ពោលគឺធ្លាក់ចុះពី ២៥% -៣០% ដែលបានឃើញកាលពីមួយសប្តាហ៍មុន។ នេះគឺបង្ហាញថា ការរក្សាគម្លាតសង្គម កំពុងតែមានប្រសិទ្ធភាព។
លោកនាយករដ្ឋមន្ត្រី បាននិយាយនៅក្នុងសុន្ទរកថាតាមទូរទស្សន៍ថា ៖ «ទាំងនេះនៅតែជាអត្រានៃការកើនឡើងខ្លាំងពិតប្រាកដមែន»។
រដ្ឋមន្ត្រីក្រសួងសុខាភិបាលអូស្ត្រាលី លោក គ្រីក ហាន់ (Greg Hunt) បាននិយាយនៅក្នុងសន្និសីទកាសែតតែមួយថា មានសញ្ញាវិជ្ជមានមួយចំនួននៃការកោងនៃខ្សែកោង នៃការរីករាលដាលនៃកូវីដ១៩។
យោងតាមទិន្នន័យផ្លូវការចុងក្រោយពីក្រសួងសុខាភិបាល មានករណីបញ្ជាក់ថា មានជំងឺឆ្លងវីរុសនេះចំនួន ៣៨០៩នាក់នៅក្នុងប្រទេសអូស្ត្រាលី កាលពីព្រឹកថ្ងៃអាទិត្យ ដែលមានចំនួន ៤៣១ករណីច្រើនជាងថ្ងៃមុន។
គួរបញ្ជាក់ផងដែរថា ការបាត់បង់ជីវិតចំនួន ១៤នាក់ អាចបណ្តាលមកពីវីរុសនេះ បើយោងតាមទិន្នន័យរបស់ក្រសួងសុខាភិបាល និងរបាយការណ៍ប្រព័ន្ធផ្សព្វផ្សាយនៃការបាត់បង់ជីវិត ២នាក់ផ្សេងទៀតនៅព្រឹកថ្ងៃអាទិត្យ៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ