ការសម្រេចពន្យារពេលការរៀបចំព្រឹត្តិការណ៍អូឡាំពិកទីក្រុងតូក្យូឆ្នាំ ២០២០ បានធ្វើឱ្យប្រទេសជប៉ុន ត្រូវបន្ថែមការចំណាយយ៉ាងច្រើនសន្ធឹកសន្ធាប់បន្ថែមទៀត ក្នុងនោះអ្នករៀបចំព្រឹត្តិការណ៍នេះ បានកោះហៅក្រុមការងារដើម្បីចាប់ផ្តើមធ្វើការងារ ដែលមានភាពស្មុគស្មាញមិនធ្លាប់មានពីមុនមក ។
ការសម្រេចជាប្រវត្តិសាស្ត្រ ដើម្បីពន្យារពេលព្រឹត្តិការណ៍អូឡាំពិកឆ្នាំ ២០២០ ដោយលើកទៅធ្វើនៅរដូវក្តៅឆ្នាំ ២០២១ ដោយសារតែការរាតត្បាតខ្លាំងនៃវីរុស Covid-19 នៅទូទាំងពិភពលោក កំពុងតែធ្វើឱ្យអ្នករៀបចំព្រឹត្តិការណ៍នេះឈឺក្បាលយ៉ាងខ្លាំង ។
នាយកប្រតិបត្តិកីឡាអូឡាំពិកលោក Toshiro Muto បានថ្លែងនៅក្នុងសុន្ទរកថាបើកកិច្ចប្រជុំលើកដំបូងរបស់ក្រុមការងារថា «ពីមួយជំហានទៅមួយជំហាន យើងត្រូវធានាឱ្យបាននូវបញ្ហាដែលយើងអាចដោះស្រាយបាន ។ ការចំណាយបន្ថែមគឺពិតជាធំធេងណាស់ ក្រោយព្រឹត្តិការណ៍នេះត្រូវបានពន្យារពេល ។ យើងត្រូវខិតខំប្រឹងប្រែងដោះស្រាយបញ្ហានេះ» ។
លោក Toshiro Muto មិនបានធ្វើការប៉ាន់ស្មានថា តើដំណើរការនៃការពន្យារពេលការប្រកួតអូឡាំពិក និងប៉ារ៉ាឡាំពិកអាចចំណាយអស់ប៉ុន្មាននោះទេ។
ប៉ុន្តែបើយោងតាមសារព័ត៌មានក្នុងស្រុក Nikkei daily បានឱ្យដឹងថា អ្នករៀបចំបានប៉ាន់ប្រមាណថា វានឹងត្រូវចំណាយប្រាក់បន្ថែមចំនួន ២,៧ពាន់លានដុល្លារដែលក្នុងនោះរួមមានសម្រាប់ការជួលអាគារ, ការកក់សណ្ឋាគារ និងការបង់ប្រាក់បន្ថែមសម្រាប់បុគ្គលិក និងផ្នែកសន្តិសុខ ។ ប៉ុន្តែការចំណាយទាំងនោះ នៅតែអាចបន្ធូរបន្ថយ អាស្រ័យលើលទ្ធផលនៃការចរចារ ៕ (ដកស្រង់ចេញពី CNA)
ចែករំលែកព័តមាននេះ