FIFA ដែលជាស្ថាប័នគ្រប់គ្រងបាល់ទាត់អន្តរជាតិ និងអង្គការសុខភាពពិភពលោក (WHO) បានសហការគ្នាដើម្បីប្រយុទ្ធប្រឆាំងនឹងវីរុសឆ្លង COVID-19 ដោយបើកយុទ្ធនាការផ្សព្វផ្សាយថ្មីមួយ ដែលដឹកនាំដោយកីឡាករបាល់ទាត់ល្បីៗនៅលើពិភពលោក ដែលកំពុងអំពាវនាវឱ្យប្រជាជនទាំងអស់នៅជុំវិញ ពិភពលោក អនុវត្តតាមជំហានសំខាន់ចំនួន៥ ដើម្បីបញ្ឈប់ការរីករាលដាលនៃវីរុសនេះ។
យុទ្ធនាការ «ផ្សព្វផ្សាយសារដើម្បីកម្ចាត់វីរុសឆ្លង» លើកកម្ពស់ជំហានចំនួន៥យ៉ាងសម្រាប់ប្រជាជនអនុវត្តដើម្បីការពារសុខភាពរបស់ពួកគេ ស្របតាមការណែនាំរបស់អង្គការសុខភាពពិភពលោក ដោយផ្តោតលើការលាងដៃ, អាការៈនៃការក្អក, ការមិនប៉ះពាល់មុខ, ចម្ងាយនៃការនៅជិតគ្នា និងស្នាក់នៅផ្ទះប្រសិនបើមានអារម្មណ៍មិនស្រួលខ្លួន ។
លោកវេជ្ជបណ្ឌិត Tedros Adhanom Ghebreyesus អគ្គនាយកនៃអង្គការសុខភាពពិភពលោកបានមានប្រសាសន៍ថា « FIFA និងប្រធានលោក Gianni Infantino បានចូលរួមយ៉ាងសកម្មក្នុងការផ្ញើសារប្រឆាំងនឹងរោគរាតត្បាតនៃវីរុសនេះតាំងពីដំបូងមក ។ តាមរយៈយុទ្ធនាការ ឬការផ្តល់មូលនិធិ ក្នុងនោះ FIFA បានក្រោកឈរឡើងតទល់ទៅនឹងវីរុសនេះ ហើយខ្ញុំពិតជារីករាយដែលបាល់ទាត់ពិភពលោកកំពុងគាំទ្រដល់អង្គការសុខភាពពិភពលោក ដើម្បីកម្ចាត់វីរុសនេះ។ ខ្ញុំគ្មានការសង្ស័យទេជាមួយនឹងការគាំទ្រប្រភេទនេះ ដែលយើងនឹងឈ្នះជាមួយគ្នា»។
ដោយឡែកលោក Gianni Infantino ប្រធាន FIFA ក៏បានមានប្រសាសន៍ថា «យើងត្រូវការ ការធ្វើការងារជាក្រុមដើម្បីប្រយុទ្ធប្រឆាំងនឹងវីរុសនេះ។ FIFA បានចាប់ដៃគូជាមួយអង្គការសុខភាពពិភពលោក ពីព្រោះសុខភាពគឺជាអាទិភាពចម្បងបំផុត។ ខ្ញុំសូមអំពាវនាវដល់សហគមន៍កីឡាបាល់ទាត់នៅទូទាំងពិភពលោក ចូលរួមជាមួយពួកយើងក្នុងការគាំទ្រដល់យុទ្ធនាការនេះ ដើម្បីបញ្ជូនសារអប់រំបន្ថែមទៀត ដល់ប្រជាជនទូទាំងពិភពលោក។ កីឡាករឆ្នើម ៗ មួយចំនួនដែលបានចូលរួមរាល់សកម្មភាពរបស់ពួកគេទៅក្នុងយុទ្ធនាការនេះ ហើយត្រូវបានរួបរួមគ្នានៅក្នុងបំណង ដើម្បីផ្ញើសារអប់រំពីការប្រយុទ្ធប្រឆាំងទៅនឹងវីរុស COVID-19» ។
គិតមកទល់ពេលនេះមានកីឡាករឆ្នើម និងគ្រូបង្វឹកល្បីចំនួន ២៨នាក់រួចមកហើយ បានចូលរួមនៅក្នុងវីដេអូដែលត្រូវបានផ្សព្វផ្សាយជា១៣ភាសា ៕ (ដកស្រង់ចេញពី WHO)
ចែករំលែកព័តមាននេះ