ខេត្តកំពង់ឆ្នាំង ៖ ជុំវិញករណីការស្រែកថាចោររបស់ម្ចាស់ផ្ទះដែលមានទីលំនៅរាជធានីភ្នំពេញ និងមានឋានន្តរស័ក្តិថ្នាក់ឧត្តមសេនីយទោម្នាក់ ធ្វើឱ្យប្រជាពលរដ្ឋព្រួតគ្នាវាយទៅលើយុវជនកំព្រាម្នាក់ជាកម្មករ ស្នាក់នៅក្នុងផ្ទះខាងលើនេះ បណ្តាលឱ្យមានរបួសយ៉ាងធ្ងន់ធ្ងរកាលពីពេលកន្លងទៅ ពេលនេះយុវជនកំព្រារូបនោះបានមកដល់ស្រុកកំណើតវិញហើយនៅ ខេត្តកំពង់ឆ្នាំង ទាំងសភាពរវើរវាយ និយាយមិនដឹងមុខក្រោយហើយត្រូវបានអជ្ញាធរខេត្ត យកចិត្តទុកដាក់ស្រាវជ្រាវរក និងនាំមកកាន់មន្ទីពេទ្យនៅព្រឹកថ្ងៃទី២៦ កញ្ញា ដើម្បីជួយព្យាបាល និងជាមួយគ្នានេះមានសាខា កាកបាទក្រហម នាំយក នូវអំណោយមួយចំនួនទៅជួយផងដែរ។
ក្រុមគ្រួសារយុវជនកំព្រាខាងលើនេះបានរៀបរាប់ប្រាប់អ្នកយកព័ត៌មាននៅព្រឹកថ្ងៃទី២៦ កញ្ញា នៅក្នុងមន្ទីរពេទ្យខេត្តកំពង់ឆ្នាំងនេះថា យុវជនរូបនោះមានឈ្មោះ នី វ៉ាន់ឌី អាយុ២៥ឆ្នាំ មានទីលំនៅភូមិប្រស្នឹប ឃុំប្រស្នឹប ស្រុកទឹកផុស ។ យុវជនរូបនោះមានបងប្អូនកំព្រាចំនួន១០នាក់ ដែលពួកគេរស់នៅជាមួយបងបង្អស់ ឈ្មោះ នី គ្រីន អាយុ៤៥ឆ្នាំ ។ ប្រភពដដែលបន្តថា យុវជនរូបនោះបានចេញទៅធ្វើការជាកម្មករនៅរាជធានីភ្នំពេញកាលពីមួយឆ្នាំមុន ដោយពីដំបូងធ្វើជាកម្មករឡនំប៉័ង បន្ទាប់ទៅធ្វើការនៅកន្លែងផ្សេងទៀត តែមិនបានដឹងថា ទៅធ្វើនៅទីណាខ្លះទេ ហើយក៏បាត់ដំណឹងឈឹងតែម្តង ។ ស្រាប់តែនៅមុនភ្ជុំបិណ្ឌមួយថ្ងៃ គឺថ្ងៃទី២២ កញ្ញា ឃើញយុវជនរូបនោះមកដល់ផ្ទះវិញ ក្នុងសភាពរវើរវាយនិយាយមិនដឹងខុសត្រូវ និងមិនចាំអ្វីទាំងអស់ ។ បន្ទាប់មកនៅយប់ថ្ងៃទី២៥ កញ្ញា មានសមត្ថកិច្ចនិងអាជ្ញាមូលដ្ឋានបានទៅស្រាវជ្រាវរក និងព្រឹកឡើងថ្ងៃទី២៦កញ្ញា បានដឹកមកកាន់មន្ទីរពេទ្យដើម្បីឱ្យគ្រូពេទ្យជួយព្យាបាលតែម្តង ។
គួររំលឹកថា យុវជនម្នាក់ឈ្មោះ នី វ៉ាន់ឌី អាយុ២៥ឆ្នាំ មានស្រុកកំណើតនៅនៅភូមិប្រស្នឹប ឃុំប្រស្នឹប ស្រុកទឹកផុស ខេត្តកំពង់ឆ្នាំង ត្រូវបានមនុស្សមួយក្រុមវាយ បណ្តាលឱ្យរងរបួសធ្ងន់ បន្ទាប់ពីលោកឧត្តមសេនីយ៍ទោជាមន្ត្រីនគរបាលនៃក្រសួងមហាផ្ទៃម្នាក់និងភរិយាបានបណ្តេញចេញពីក្នុងផ្ទះ ដោយចោទប្រកាន់ថាបានលួចយកអាវមួយ។ ករណីវាយយុវជនជាក្មេងកំព្រា និងជាអ្នកបំរើក្នុងផ្ទះនេះបានកើតឡើងកាលពីវេលាម៉ោង៨យប់ថ្ងៃទី១៨ កញ្ញា នៅផ្ទះគ្មានលេខ ក្រុម១៧ ភូមិ២ ផ្លូវលេខ១៨៥Z ក្នុងសង្កាត់ទំនប់ទឹក ខណ្ឌចំការមន ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ