ខេត្តស្វាយរៀង ៖ គណៈកម្មការអាចារ្យវត្តព្រៃធ្លក រងការចោទប្រកាន់ពីប្រជាពុទ្ធបរិស័ទថា បានឃុបឃិតគ្នាលួចលក់ដើមឈើក្នុងវត្តទៅឲ្យឈ្មួញវៀតណាម ធ្វើឲ្យប្រជាពលរដ្ដខឹងសម្បារ ហើយបានប្តឹងទៅនគបាលប៉ុស្តិ៍រដ្ឋបាលឃុំស្វាយតាយាន ឱ្យជួយអន្តរាគមន៍និងបង្ក្រាប ។ បើតាមប្រជាពលរដ្ឋដែលរស់នៅជិតវត្តធ្លកបានប្រាប់អ្នកសារព័ត៌មានយើងថា…
ខេត្តស្វាយរៀង ៖ គណៈកម្មការអាចារ្យវត្តព្រៃធ្លក រងការចោទប្រកាន់ពីប្រជាពុទ្ធបរិស័ទថា បានឃុបឃិតគ្នាលួចលក់ដើមឈើក្នុងវត្តទៅឲ្យឈ្មួញវៀតណាម ធ្វើឲ្យប្រជាពលរដ្ដខឹងសម្បារ ហើយបានប្តឹងទៅនគបាលប៉ុស្តិ៍រដ្ឋបាលឃុំស្វាយតាយាន ឱ្យជួយអន្តរាគមន៍និងបង្ក្រាប ។
បើតាមប្រជាពលរដ្ឋដែលរស់នៅជិតវត្តធ្លកបានប្រាប់អ្នកសារព័ត៌មានយើងថា កាលពីវេលាម៉ោង៨និង១០នាទីព្រឹកថ្ងៃទី១៣ មិថុនា២០២៥ គេឃើញក្រុមឈ្មួញវៀតណាម១ក្រុម បានបើកត្រាក់ទ័រសំណ្តោងរ៉ឺម៉កចូលទៅក្នុងវត្តព្រៃធ្លក ស្ថិតនៅភូមិព្រៃធ្លក ឃុំស្វាយតាយាន ហើយបានធ្វើសកម្មភាពយករណារ ត្រង់តូន័រ អាររំលំដើមស្វាយព្រៃ ដើមឈើទាលធំៗ នៅក្នងវត្តអស់ជាង១០ដើម រលំរាបដល់ដីរួចកាត់ជាកង់ៗលក់ដាក់លើរ៉ឺម៉កត្រាក់ទ័រ ខណៈនោះប្រជាពុទ្ធបរិស័ទចំណុះជើងវត្តក៏បានចូលទៅថ្វាយបង្គំព្រះគ្រូចៅអធិការវត្តព្រៃធ្លក អំពីបញ្ហានេះ លោកគ្រូចៅអធិការ បានមានថេរដិការជម្រាបប្រជាពុទ្ធបរិស័ទថា ថ្ងៃមុនគណៈកម្មការអាចារ្យវត្តបានមកពិតព្រះអង្គ ថា សុំកាប់ដើមឈើក្នុងវត្តមួយចំនួនចេញដើម្បីយកទីធ្លា សង់ចេតីយ៍ និងសង់របង ។
ព្រះតេជ្ជគុណ មិនទាន់យល់ស្របទេ ដោយយល់ឃើញថា ដើមឈើធំៗទាំងអស់នេះ មិនងាយដាំបានទេ ទំរាំដើមឈើដុះបានដើមធំៗបែបនេះ សូមឲ្យរកកន្លែងផ្សេង ដែលគ្មានដើមឈើ សង់ចេតីយ៍ទៅ មិននិកស្មានថា គណៈកម្មការលោកអាចារ្យឃុបឃិតគ្នា ហៅឈ្មួញមកកាប់ដើមឈើលក់ដូច្នេះទេ ព្រះអង្គសោកស្តាយណាស់។
ប្រភពបន្តថា គ្រាន់តែរយៈពេលជាង២ម៉ោង គឺដល់ម៉ោងជាង១០ព្រឹក ក្រុមឈ្មួញជនជាតិវៀតណាម បានអារដើមឈើជាកង់ជាកង់លើកដាក់លើត្រាក់ទ័រទើបប្រជាពលរដ្ឋប្តឹងទៅសមត្ថកិច្ចនគរបាលប៉ុស្ត៍រដ្ឋបាលឃុំស្វាយតាយាន ជួយអន្តរាគមន៍និងបង្ក្រាប។
ក្រោយពីទទួលពាក្យបណ្តឹងរបស់ប្រជាពលរដ្ឋភ្លាម សមត្ថកិច្ចដាក់កម្លាំងមកអន្តរាគមន៍និងឃាត់ក្រុមឈ្មួញវៀតណាម និងវត្ថុតាង រួមមានត្រាក់ទ័រ និងកំណាត់ឈើ នៅលើត្រាក់ទ័រ រណារ ត្រង់តឺន័រ ទៅប៉ុស្ត៍រដ្ឋបាលឃុំស្វាយតាយានដើម្បីសាកសួរតាមនីតិវិធី។
ទាក់ទិនករណីនេះដែរ ព្រះគ្រូចៅអធិការវត្តធ្លក បានចេញសេចក្តីបំភ្លឺ ក្រោយមានការតវ៉ាដោយព្រះគេជ្ជគុណចេញលិខិតបំភ្លឺថា អាត្មាភាពយើងខ្ញុំជាព្រះគ្រូចៅអធិការគណៈកម្មការអាចារ្យវត្តព្រៃធ្លកបានឯកភាពគ្នា តាមរយៈការប្រំជុំ កាលពីថ្ងៃទី៥ ឧសភ ២០២៥ ដោយឯកភាពគ្នាកាប់ដើមស្វាយមួយចំនួនក្បែររបងខាងកើត គោលបំណងត្រៀមទីតាំងសម្រាប់កសាងផ្សេងៗមានចេតិយជាដើម និងរបងផ្នែកខាងកើតរបស់វត្តនៅពេលខាងមុខ។ ហើយក៏មិនបានកាប់ទាំងអស់ដែរ គឺកាប់តែដើមឈើដែលប៉ះពាល់ប៉ុណ្ណោះ។
ទាក់ទិនករណីនេះដែរ មហាជន និងពុទ្ធបរិស័ទចំណុះជើងវត្តព្រៃធ្លក មិនទាន់អស់ចិត្តចំពោះទង្វើរបស់គណៈកម្មការអាចារ្យវត្តដែរ បើពិតជាមានគម្រោងសង់ចេតិយ និងសង់របងមែន គួរណាស់ប្រកាសប្រាប់ប្រជាពុទ្ធបរិស័ទឲ្យបានដឹង មិនមែនហៅឈ្មួញលក់ឲ្យវៀតណាមមកអាររលំលើកដាក់លើត្រាក់ទ័រ ហើយពេលប្រជាពុទ្ធបរិស័ទតវ៉ា ទើបបំភ្លឺជាក្រោយ គឺគ្រាន់តែលុបកំហុសឲ្យគណៈកម្មការប៉ុណ្ណោះ ៕
ចែករំលែកព័តមាននេះ