វ៉ាស៊ីនតោន ៖ នៅសល់តែ៦ថ្ងៃទៀត នឹងដាច់ខែមីនា នឹងចូលខែមេសា ឫចូលដល់និទាឃរដូវហើយ ខណៈរដូវរងារកំពុងឈានដល់ទីបញ្ចប់ អ្នកខ្លះរពឹងថា ជំងឺកូវីដ១៩ ក៏នឹងសាបរលាបទៅតាមរដូវរងារដែរ ។ នៅពេលនិយាយដល់ចំណុចនេះ គេនឹងឃើញដល់ប្រធានាធិបតីអាមេរិកភ្លាម កាលនោះ(រសៀលថ្ងៃអង្គារ ទី១១ កុម្ភៈ ២០២០) លោកដូណាល់ ត្រាំ (Donald Trump) ធ្លាប់បានព្យាករណ៍ ឫទស្សនទាយទុកមុនថា ការរីករាលដាល នៃវីរុសកូរ៉ូណា (លោកហៅកូរ៉ូណាវីរុស តែពេលនេះគឺ COVID-19) វានឹងបាត់ទៅវិញ នៅខែមេសា នេះបើតាមវេបសាយ sputniknews ។
ពេលនោះ លោកប្រធានាធិបតី ដូណាល់ ត្រាំ បានព្យាករណ៍ថា COVID-19 នឹងលែងជាការគំរាមកំហែងទៀតហើយ នៅពេលអាកាសធាតុក្តៅ បានមកដល់ ដោយសារកម្ដៅ វីរុសនេះនឹងមិនអាចទប់ទល់នឹងកម្តៅពេលដែលចូលដល់និទាឃរដូវ “រដូវក្ដៅ” នោះបានទេ ។
លោក ដូណាល់ ត្រាំ បានព្យាករណ៍បែបនេះ នៅក្នុងជំនួបជាមួយក្រុមអភិបាលរដ្ឋ នៅឯសេតវិមាន ដោយលោកបានលើកឡើងដូច្នេះថា “វីរុស ប្រភេទនេះ ជាទូទៅ នឹងត្រូវរលាយបាត់ទៅវិញ នៅពេលអាកាសធាតុឡើងកម្ដៅ ខណៈមនុស្សជាច្រើន ក៏គិតដែរថា «នៅដើម ឬអំឡុងខែមេសា វីរុសប្រភេទនេះ នឹងបាត់ទៅវិញជាមិនខាន” វាជារឿងល្អ ។
សូមរម្លឹក(ថ្ងៃទី១១ កុម្ភៈ)ថា ការព្យាករណ៍របស់លោក ដូណាល់ ត្រាំ គឺនៅក្នុងសហរដ្ឋអាមេរិក មានអ្នកឆ្លងវីរុស តែ១២ករណីប៉ុណ្ណោះ ខណៈនៅក្នុងប្រទេសចិន នាពេលនោះ មានអ្នកឆ្លងជាង៤២,៧០៨នាក់ ។
ប៉ុន្តែ នាបច្ចុប្បន្ននេះ (ថ្ងៃទី២៥ មីនា) ទូទាំងសហរដ្ឋអាមេរិក សរុបចំនួនអ្នកឆ្លងវីរុស កើនដល់ ៥៤,៩១៦ ករណី និងមានអ្នកស្លាប់ ៧៨៤ នាក់ហើយ ។
សូមរង់ចាំមើលទាំងអស់គ្នា តើការព្យាករណ៍របស់ប្រធានាធិបតីអាមេរិកលោក ដូណាល់ ត្រាំ ថា នៅដើម ឬអំឡុងខែមេសានេះ វីរុសកូវិដ១៩ នឹងបាត់ទៅវិញ ពិតមែនឫ យ៉ាងណា ?
ចែករំលែកព័តមាននេះ