ខេត្តមណ្ឌលគិរី ៖ ខេត្តមណ្ឌលគិរីបាននឹងកំពុងតែមានសក្ដានុពលយ៉ាងខ្លាំងលើវិស័យទេសចរណ៍នាពេលបច្ចុប្បន្ន និងបានទាក់ទាញចំណាប់អារម្មណ៍ភ្ញៀវទេសចរណ៍ជាតិ និងអន្តរជាតិ រាប់ម៉ឺននាក់ក្នុងមួយឆ្នាំៗ ។ ហើយក្នុងឱកាសបុណ្យកាន់ បិណ្ឌ និងភ្ជុំបិណ្ឌនាពេលកន្លងមកនេះ គេសង្កេតឃើញថាមានភ្ញៀវទេសចរណ៍មកលេងកម្សាន្តនៅខេត្តមណ្ឌលគិរី រាប់ពាន់នាក់ ដោយសារតែខេត្តមួយនេះសំបូរទៅដោយភ្នំតូច-ធំ រមណីយដ្ឋានធម្មជាតិជាច្រើនកន្លែង ពិសេសគឺមាន អាកាសធាតុត្រជាក់ជាងបណ្ដាខេត្តដ៏ដៃទៀត ដែលបានធ្វើឲ្យភ្ញៀវទេសចរណ៍ចង់មកគយគន់ទិដ្ឋភាពពិតៗក្នុងខេត្តមណ្ឌលគិរី ។
រមណីយដ្ឋានទឹកជ្រោះប៊ូស្រាគឺជាគោលដៅទីមួយ សម្រាប់ភ្ញៀវដែលមកលេងកម្សាន្តនៅខេត្តមណ្ឌលគិរី ទាំងភ្ញៀវជាតិ និងអន្តរជាតិ ដោយរមណីយដ្ឋានមួយនេះមានភាពស្រស់ស្អាតមិនចាញ់រមណីយដ្ឋានតាមបណ្ដាខេត្តផ្សេងៗឡើយ ពិសេសគឺមានទឹកធ្លាក់ដ៏ទៅ២ដំណាក់កាល ដែលអាចឲ្យបងប្អូនភ្ញៀវទេសចរណ៍ងូតលេងកម្សាន្តយ៉ាងសប្បាយ ។ មិនតែប៉ុណ្ណោះខេត្តមណ្ឌលគិរីនៅមានរមណីយដ្ឋានធម្មជាតិ និងវប្បធម៌ចំនួន១៧កន្លែងផ្សេងទៀត ដែលមានភាពស្រស់ស្អាត ខ្យល់ អាកាសបរិសុទ្ធ ទឹកជ្រោះដ៏ស្រស់ត្រកាល រង់ចាំភ្ញៀវទេសចរណ៍គ្រប់ពេលវេលា ។
លោក ងិន សុវិមាន ប្រធានមន្ទីរទេសចរណ៍ខេត្តបានឲ្យដឹងថា ក្នុងរយៈពេលបីថ្ងៃចុងក្រោយគឺថ្ងៃទី២២ ២៣ និង២៤ នាឱកាសបុណ្យភ្ជុំបិណ្ឌនេះមានភ្ញៀវទេសចរណ៍មកលេងកម្សាន្តនៅខេត្តមណ្ឌលគិរី សរុបចំនួន៨០៤៤នាក់ ក្នុងនោះភ្ញៀវជាតិមានចំនួន៧៩៨៨នាក់ ភ្ញៀវអន្តរជាតិមានចំនួន៥៦នាក់ ហើយតួលេខនេះបើធៀបទៅនឹងរយៈពេល ដូចគ្នាកាលពីឆ្នាំ២០១៣កន្លងទៅ ឃើញថាមានការថយចុះ សម្រាប់ចំនួនភ្ញៀវទេសចរណ៍សរុបគឺថយចុះចំនួន៩៦នាក់ ស្មើនឹង១,១៧ភាគរយ ភ្ញៀវជាតិថយចុះ១,៤៩ភាគរយ ភ្ញៀវអន្តរជាតិកើនឡើង៨០,៦៤ភាគរយ។ លោកប្រធានមន្ទីរបានបញ្ជាក់ឲ្យដឹងថា កត្តាដែលធ្វើឲ្យភ្ញៀវទេសចរណ៍ក្នុងឱកាសភ្ជុំបិណ្ឌនេះថយចុះ គឺអាចមកពីភ្លៀងធ្លាក់ច្រើនពេក ហើយមួយវិញទៀតគឺបង ប្អូនខ្លះគាត់យល់ច្រឡំថា ផ្លូវដែលឆ្ពោះមកខេត្តមណ្ឌលគិរីមានការលំបាក តែតាមការពិតចំពោះស្ថានភាពផ្លូវ គឺមានសភា ពងាយស្រួលណាស់ ។
សូមរំលឹកផងដែរថា ចំពោះបងប្អូនដែលធ្វើដំណើរមកលេងខេត្តមណ្ឌលគិរី ចាប់ពីចំណុចស្រុកអូររាំង ឆ្ពោះមក ក្រុងសែនមនោរម្យ បងប្អូនប្រាកដជាបានប្លែកភ្នែកជាក់ជាមិនខាន ដោយបានឃើញភ្នំតូច-ធំ មើលទៅខៀវស្រងាត់ លាតសន្ធឹងដាច់កន្ទុយភ្នែក ។
ចែករំលែកព័តមាននេះ