ប្រទេសកាណាដា និងអូស្ត្រាលី ប្រកាសមិនចូលរួមព្រឹត្តិការណ៍អូឡាំពិក២០២០ នៅទីក្រុងតូក្យូប្រទេសជប៉ុន ប្រសិនបើព្រឹត្តិការណ៍នេះមិនព្រមពន្យារពេល ខណៈដែលការផ្ទុះឡើងនៃវីរុស Covid-19 កំពុងតែបន្តកាន់តែខ្លាំង ។
ប្រទេសកាណាដា បានអំពាវនាវឱ្យគណៈកម្មាធិការអូឡាំពិកអន្តរជាតិ (IOC) ពន្យារពេលព្រឹត្តិការណ៍អូឡាំពិក២០២០ នៅទីក្រុងតូក្យូ ដោយបានបញ្ជាក់ថា ពួកគេនឹងមិនបញ្ជូនអត្តពលិកណាម្នាក់ទៅកាន់ទីក្រុងនេះឡើយ ដោយសារតែហានិភ័យដែលបង្កឡើងដោយវីរុស Covid-19។
សេចក្តីថ្លែងការណ៍របស់ COC បានបញ្ជាក់ថា «យើងទទួលស្គាល់ភាពស្មុគស្មាញដែលកើតមានជុំវិញការពន្យាពេលព្រឹត្តិការណ៍នេះ។ តែវាគ្មានអ្វីដែលសំខាន់ជាងសុខភាព និងសុវត្ថិភាពរបស់អត្តពលិក និងសហគមន៍ពិភពលោកឡើយ» ។
«នេះមិនមែនសំរាប់តែសុខភាពអត្តពលិកនោះទេ គឺនិយាយអំពីសុខភាពសាធារណៈ។ ជាមួយនឹងការគ្របដណ្តប់ដោយវីរុស Covid-19 និងហានិភ័យដែលពាក់ព័ន្ធ។ វាមិនមានសុវត្ថិភាពសម្រាប់អត្តពលិករបស់យើងទេ រួមនិងសុវត្ថិភាពគ្រួសាររបស់ពួកគេ និងសហគមន៍របស់ប្រទេសកាណាដាផងដែរ»។
ដោយឡែកប្រទេសអូស្ត្រាលី ក៏បានប្រកាសដកអត្តពលិករបស់ខ្លួនចេញពីព្រឹត្តិការណ៍អូឡាំពិកឆ្នាំ២០២០ ផងដែរកាលថ្ងៃច័ន្ទ ខណៈការប្រកួតកីឡាក្នុងប្រទេសនេះត្រូវបានផ្អាក និងលុបចោលដែលធ្វើខាតបង់ប្រាក់ជាច្រើន ដែលកើតចេញពីការរីករាលដាលនៃវីរុស Covid-19 ។
គណៈកម្មាធិការអូឡាំពិកអូស្ត្រាលី (AOC) បានលើកឡើងថា ជាមួយនឹងអត្តពលិករបស់ខ្លួនមិនអាចហ្វឹកហាត់ ឬរៀបចំពេលវេលាឱ្យបានត្រឹមត្រូវនោះទេ ហើយខ្លួនមិនអាចធ្វើការប្រមូលផ្តុំក្រុមអត្តពលិក សម្រាប់ការប្រកួតនៅថ្ងៃទី២៤ ខែកក្កដាខាងមុខនេះទេ។
សូមរំលឹកថា IOC បានសម្រេចទុកពេល៤សប្តាហ៍ក្នុងការពិភាក្សា និងសម្រេចចិត្តលើជោគវាសនានៃព្រឹត្តិការណ៍អូឡាំពិក២០២០ នៅទីក្រុងតូក្យូ ៕ (ដកស្រង់ចេញពី Metro, Reuters)
ចែករំលែកព័តមាននេះ