ជាទូទៅម៉ាស៊ីនលក់នំចំណី និងភេសជ្ជៈមិនមែនជាម្ចាស់កម្មសិទ្ធិរបស់ក្រុមហ៊ុនណាមួយទេ តែវាជាកម្មសិទ្ធិរបស់មនុស្សទូទៅដូចជាលោក ជេមី អីបាននេស៍ (Jaime Ibanez) ដែលមានអាយុ ១៩ឆ្នាំជាដើម ។ លោកមានម៉ាស៊ីនទាំងអស់ ២៥គ្រឿងនៅ ៨កន្លែងក្នុងតំបន់ Dallas-Fort Worth ក្នុងសហរដ្ឋអាមេរិក ក្រោមឈ្មោះរបស់ក្រុមហ៊ុនលោកគឺ Vending Bites ។
យុវជនខាងលើបានចែករំលែកក្នុងបទសម្ភាសន៍មួយជាមួយ Vox ថា លោកតែងតែក្រោកពីដំណេកពីព្រឹក និងបើកកម្មវិធីមួយលើទូរស័ព្ទឈ្មោះថា MoMa ។ កម្មវិធីនេះផ្តល់ជារូបភាពនូវអ្វីដែលត្រូវបានទិញពីម៉ាស៊ីនទាំងអស់របស់លោក ។ បន្ទាប់មកលោក និងមិត្តស្រីដើរទៅទិញទំនិញដើម្បីយកវាទៅដាក់លក់ក្នុងម៉ាស៊ីនរបស់លោកវិញ ។ ជាទូទៅលោកត្រលប់មកផ្ទះវិញនៅម៉ោង ៤ល្ងាច ។ ប៉ុន្តែប្រពភចំណូលរបស់លោកភាគច្រើន គឺមកពីគណនី YouTube របស់លោក ដែលលោកតែងតែបង្ហោះវីដេអូចែករំលែកអ្នកគាំទ្រចំនួន ២៧៣,០០០នាក់ពីការងារប្រចាំថ្ងៃរបស់លោក ដែលអនុញ្ញាតឲ្យលោករកបានប្រមាណ ១ម៉ឺនដុល្លារក្នុងមួយខែ ដែលស្មើនឹងចំណូលពីម៉ាស៊ីនលក់ទំនិញរបស់លោកគុណនឹងបី ។
កាលពីឆ្នាំ ២០១៨ បន្ទាប់ពីបញ្ចប់ការសិក្សានៅវិទ្យាល័យ លោកមានគម្រោងទៅរៀនបន្តផ្នែកអចលនទ្រព្យ ។ ប៉ុន្តែមួយសប្តាហ៍ក្រោយមក លោកបានឃើញវីដេអូមួយដែលបង្ហាញពីបុរសម្នាក់ធ្វើអ្វីដែលលោកកំពុងតែធ្វើនាពេលបច្ចុប្បន្ននេះ ។ នៅសហរដ្ឋអាមេរិក មនុស្សម្នាក់ត្រូវតែមានបណ្ណបញ្ជាក់ច្បាសលាស់ទើបអាចធ្វើដូចលោកបាន ។
លោកបានបន្ថែមទៀតថា ជាទូទៅលោកអាចរកចំណូលបានប្រមាណពី ៦ពាន់ ទៅ ៧ពាន់ដុល្លារក្នុងមួយខែពីម៉ាស៊ីនទាំង ២៥គ្រឿងរបស់លោក ប៉ុន្តែប្រាក់ចំណេញមានតែ ៣ពាន់ដុល្លារទេ ។ លោកបានបន្តថា អ្វីដែលពិបាកជាងគេក្នុងអាជីវកម្មផ្ទាល់ខ្លួនមួយនេះ គឺនៅពេលដែលមានមនុស្សហៅលោកឲ្យទៅមើលម៉ាស៊ីនដែលខូចខណៈដែលលោកកំពុងតែសម្រាកនៅផ្ទះ ៕ កែសម្រួលដោយ ៖ សុឃាក់
ចែករំលែកព័តមាននេះ