ខេត្តសៀមរាប ៖ ត្រឹមថ្ងៃទី២៣ មីនា នេះ នៅទីប្រជុំជនតាមដងផ្លូវនានាក្នុងក្រុងសៀមរាបមានសភាពស្ងប់ស្ងាត់ណាស់ ។ រយៈពេលប៉ុន្មានខែចុងក្រោយនេះ កំពុងធ្វើឱ្យអាជីវករលក់ដូរតាមផ្សារនានានិងលក់វត្ថុអនុស្សាវរីយ៍ក្នុងផ្សារ ,ម៉ូតូកង់បី…
ខេត្តសៀមរាប ៖ ត្រឹមថ្ងៃទី២៣ មីនា នេះ នៅទីប្រជុំជនតាមដងផ្លូវនានាក្នុងក្រុងសៀមរាបមានសភាពស្ងប់ស្ងាត់ណាស់ ។ រយៈពេលប៉ុន្មានខែចុងក្រោយនេះ កំពុងធ្វើឱ្យអាជីវករលក់ដូរតាមផ្សារនានានិងលក់វត្ថុអនុស្សាវរីយ៍ក្នុងផ្សារ ,ម៉ូតូកង់បី , ម៉ូតូឌុប មានការបារម្ភ និងស្រែកត្អូញត្អែរដោយសារលក់មិនដាច់ គ្មានអ្នកជិះ ក្រោយផ្ទុះវីរុសកូវីដ-១៩េនេះមក ។ ក្រឡេកមើលតាមផ្លូវមួយចំនួនក្នុងក្រុងសៀមរាបដែលតែងតែមានចរាចរណ៍យ៉ាងច្រើនកុះករនោះ ពេលនេះ បានប្រែមកមានសភាពស្ងប់ស្ងាត់ជាងមុនឆ្ងាយណាស់ ។ ក្រោយពីខេត្តសៀមរាប បានរកឃើញមនុស្សចំនួន២នាក់មានផ្ទុកវីរុសកូវីដ-១៩ ក៏ធ្វើឱ្យប្រជាពលរដ្ឋមានការព្រួយបារម្ភទៅថ្ងៃមុខយ៉ាងខ្លាំង ព្រោះតែម្នាក់ៗនៅជាប់បំណុលធនាគារសឹងទាំងអស់គ្នាទៅហើយ ។
ជាមួយបុរសម្នាក់ឈ្មោះផល ជាអ្នករត់ម៉ូតូកង់ (ផាស់ស្អាប់) នៅមុខផ្សារលើធំថ្មី មានទីលំនៅក្នុងសង្កាត់ជ្រាវ ក្រុងសៀមរាប បានឱ្យកោះសន្តិភាពដឹងថា រូបលោកមានការព្រួយបារម្ភជាខ្លាំង បន្ទាប់ពីក្រសួងសុខាភិបាលបានរកឃើញបុរស២នាក់(ខ្មែរអាយុ៣៨ឆ្នាំម្នាក់ និងជនជាតិឥស្លាម អាយុជាង៣០ឆ្នាំម្នាក់) មានផ្ទុកវីរុសកូវីដ-១៩ នៅក្នុងក្រុងសៀមរាប ។ ព្រោះសព្វថ្ងៃ រត់ម៉ូតូអត់សល់លុយកាលពីមុនទេ ក្នុង១ថ្ងៃ ធ្លាប់រកបានពី៦ម៉ឺនរៀល ទៅដល់១៥ម៉ឺនរៀល លុះមកដល់ឥឡូវ រកតែ១ម៉ឺនរៀលសឹងមិនចង់បានផង។
លោកបន្តថា សព្វថ្ងៃនេះ ក្នុងការប្រកបមុខរបររត់ម៉ូតូនេះ គឺពីមុនរូបខ្ញុំជាអ្នករត់ម៉ូតូឌុបទេ ដល់ពេលសន្សំលុយបានល្មមក៏រកទិញ ម៉ូតូកង់បីដោយបង់រំលោះ ក្នុង១ខែបង់ជិត«៣០០ដុល្លារ»ដែរ ណាមួយលុយទិញ អង្ករ,ម្ហូបនិងថ្លៃភ្លើង និងលុយកូនទៅរៀន ។ ដល់ពេលមានកើតជំងឺវីរុសកូវីដ-១៩ទូទាំងពិភពលោក ជាពិសេស ខេត្តសៀមរាបចំនួន២នាក់ផងនោះ ទើបធ្វើឱ្យសាលាត្រូវបិទនិងគ្មានភ្ញៀវជិះ ប៉ុន្តែរករាល់ថ្ងៃបានសម្រាប់ត្រឹមម្ហូប និងអង្ករ ចំពោះថ្លៃបង់អង្គការវិញ គ្មានលុយទេខ្លាចថ្ងៃណាមួយ អត់លុយបង់មកដកហូតយកម៉ូតូទៅវិញទេ។
ដោយឡែក លោកពូ ភីរម្យ ជាអ្នករត់ម៉ូតូ កង់បីនៅម្តុំផប់ស្ទ្រីត បានរៀបរាប់ស្រដៀងគ្នាដែរថា សព្វថ្ងៃ រូបលោកមានស្រុកកំណើតនៅខេត្តព្រៃវែង មកស្នាក់នៅជួលផ្ទះគេនៅម្តុំផ្សារក្រោម ។ បន្ទាប់ពីក្រសួងសុខាភិបាល បានរកឃើញបុរស២នាក់(ខ្មែរអាយុ៣៨ឆ្នាំម្នាក់ និង ជនជាតិឥស្លាម អាយុជាង៣០ឆ្នាំម្នាក់ មានផ្ទុកវីរុសកូវីដ-១៩នៅក្នុងក្រុងសៀមរាប ភ្លាម ធ្វើឱ្យគាត់ក៏ដូចជាពលរដ្ឋ និង អាជីវករ លក់ដូរនៅតាមផ្សារនីមួយៗក្នុងក្រុងសៀមរាប មួយចំនួនមានការភ័យខ្លាច មិនសូវហ៊ានចេញមកខាងក្រៅផ្ទះទេ ម្យ៉ាងវិញទៀត ពួកគាត់នៅតែក្នុងផ្ទះរក្សាអនាម័យជាប្រចាំ។
លោកបន្តថា កាលពីមុន លោកធ្លាប់រកបានយ៉ាងតិច ជាង១០ម៉ឺនរៀល ដែរ ព្រោះ ដឹកភ្ញៀវចម្រុះ ដល់មានកើតជំងឺអាកូវីត នោះមក ធ្វើឱ្យក្រុមគ្រួសារគាត់ សឹងរក១ម៉ឺនរៀល ចូលផ្ទះមិនបានផង ណាមួយជំពាក់ធនាគារផង។ ដូច្នេះ លោកសំណូមពរឱ្យរដ្ឋាភិបាលកម្ពុជា ជួយឱ្យខាងធនាគារទាំងអស់នៅក្នុងកម្ពុជា មេត្តាសុំឈប់យកលុយ២ ទៅ៣ខែនេះទៅ ព្រោះរូបលោកក៏ដូចជាអ្នករត់ម៉ូតូ និងអាជីវករលក់ដូរ ទាំងអស់នៅក្នុងក្រុងសៀមរាប សុទ្ធតែជំពាក់ធនាគារ ។
ចំពោះ អ្នកស្រី ថា វី លក់វត្ថុអនុស្សាវរីយ៍ សម្រាប់ភ្ញៀវបរទេស នៅក្នុងផ្សារចាស់ ទល់មុខមាត់ស្ទឹងសៀមរាប បានរៀបរាប់ថា សព្វថ្ងៃនេះ ក្រុមគ្រួសារ អ្នក ស្រី មិនចង់ឱ្យមកលក់ដូរ នាំគ្នានៅក្នុងផ្ទះ ព្រោះសព្វថ្ងៃនេះ គ្មានភ្ញៀវ ដើរដូចមុនទេ ដោយសារ នាំគ្នា ខ្លាចជម្ងឺ កូវីត១៩នោះ ។ អ្នកស្រី បន្តថា ចំពោះតូប លក់វត្ថុអនុស្សាវរីយ៍ និង តូប លក់សម្លៀកបំពាក់ នៅក្នុងផ្សារចាស់ទាំងអស់ បានបិទបណ្តើរៗហើយ ដោយសារសភាពការណ៍រាល់ថ្ងៃស្ងាត់ដូចសេះ។
នៅក្នុងផ្សារលើធំថ្មី បានប្រាប់យ៉ាងខ្លី ថា លក់ដូរសព្វថ្ងៃនេះ ជិតដាច់បាយហើយ សូមតែ ម្យ៉ាង ឱ្យរដ្ឋាភិបាលកម្ពុជា មេត្តាជួយឱ្យខាងធនាគារ ឈប់ទាលុយពីប្រជាពលរដ្ឋក្នុងខេត្តសៀមរាប ចំនួន៣ខែផង គិតចាប់ពីខែ៣នេះទៅ ។ម្យ៉ាងវិញទៀត បើនិយាយពីអ្នកលក់ត្រី និងលក់មាន់បានត្អូញត្អែរថា សូមឱ្យជំងឺកូវីត១៩នេះ ចៀសចេញឱ្យឆ្ងាយពីខេត្តសៀមរាបទៅ ព្រោះកូនចៅជិតដាច់បាយ ហើយលក់ក្នុងមួយថ្ងៃ បានតែមាន់៣ ឬ ត្រី ២គីឡូប៉ុណ្ណោះ រឿងអីមិនដាច់បាយ បើនិយាយពីអង្ការវិញ ប្រហែលគ្មានលុយទេ ខែ នេះ ព្រោះលក់មិនដាច់ផង។
ទោះជាបែបនេះក្តី ប្រជាពលរដ្ឋក៏ដូចជាអាជីវករទូទាំងខេត្តសៀមរាប សំណូមពរដល់អាជ្ញាធរធ្វើយ៉ាងណា មានវិធានការទប់ស្កាត់នឹងការពារវីរុសនេះ កុំឱ្យមានការឆ្លងរាលដាលជាបន្តទៀត ដើម្បីការពារសុខភាព សុវត្ថិភាព ប្រជាពលរដ្ឋទាំងអស់ ចៀសឱ្យផុតពីជំងឺដ៏កាចសាហាវនេះ ។
ចែករំលែកព័តមាននេះ