ខេត្តស្ទឹងត្រែង ៖ យោងតាមសេចក្តីជូនដំណឹងរបស់រាជរដ្ឋាភិបាលតាមរយៈក្រសួងសុខាភិបាលអំពីការរីករាលដាលនៃវីរុសកូវីដ-១៩ នាពេលបច្ចុប្បន្ននៅក្នុងប្រទេសកម្ពុជា អាជ្ញាធរខេត្តស្ទឹងត្រែង បានសម្រេចប្រើប្រាស់អគារមជ្ឈមណ្ឌលគរុកោសល្យភូមិភាគខេត្តស្ទឹងត្រែង ដែលជាអំណោយដ៏ថ្លៃថ្លារបស់ សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើកន្លែងសម្រាប់ពិនិត្យ ថែទាំ និងព្យាបាលអ្នកជំងឺកូវីដ-១៩ នេះបើតាមការលើកឡើងរបស់លោក ម៉ុម សារឿន អភិបាលខេត្ត ក្នុងឱកាសដែរលោកអញ្ជើញចុះត្រួតពិនិត្យជាក់ស្តែងនៅអគារមជ្ឈមណ្ឌលគរុកោសល្យភូមិភាគខេត្តស្ទឹងត្រែង នាព្រឹកថ្ងៃទី២៣ ខែមីនា ឆ្នាំ២០២០ នេះ។
លោក ម៉ុម សារឿន អភិបាលខេត្តបានបញ្ជាក់ថា ការសម្រេចយកអគារមជ្ឈមណ្ឌលគរុកោសល្យនេះមកប្រើប្រាស់ សម្រាប់ធ្វើជាមន្ទីរពេទ្យសម្រាប់ពិនិត្យថែទាំ និងព្យាបាលជំងឺកូវីដ១៩ ដើម្បីបញ្ចៀសនូវការចម្លងក្នុងសហគមន៍ជាយថាហេតុ ។
លោកអភិបាលខេត្តបានបន្ថែមថា ក្នុងនោះ រដ្ឋបាលខេត្តក៏បានបង្កើត នូវការងារប្រយុទ្ធប្រឆាំងជាមួយជំងឺកាចសាហាវមួយនេះ ព្រមទាំងបានជំរុញដល់មន្ទីរអង្គភាព ដែលពាក់ព័ន្ធ ពិសេសមន្ទីរសុខាភិបាលដែលជាសេនាធិការ ឲ្យរដ្ឋបាលខេត្តត្រូវធ្វើយ៉ាងណាដាក់ចេញនូវទិសដៅដោយបន្តលើកកម្ពស់អនុវត្តយ៉ាងសកម្មតាមការណែនាំរបស់រាជរដ្ឋាភិបាល ដើម្បីបង្ការទប់ស្កាត់ប្រឆាំងនឹងការរីករាលដាលនៃវីរុសប្រភេទថ្មីកូរ៉ូណា ឬ កូវីដ-១៩ (covid-19) ដែលកំពុងកើតមានជាសកល ដោយធ្វើការយកចិត្តទុកដាក់ណែនាំអប់រំប្រជាពលរដ្ឋ អំពីវិធានការនានាក្នុងការបង្ការ និងទប់ស្កាត់ការឆ្លងមេរោគcovid-19 ឲ្យទាន់ពេលវេលា ។
គួរបញ្ជាក់ថា គិតមកដល់ពេលនេះ ខេត្តស្ទឹងត្រែងនៅមិនទាន់មានប្រជាពលរដ្ឋណាម្នាក់បានឆ្លងនូវវីរុសកូវីដ-១៩ នៅឡើយទេ ខណៈគិតមកត្រឹមម៉ោង១០ព្រឹកថ្ងៃទី ២៣ មីនា ២០២០ រកឃេីញអ្នកផ្ទុកវីរុសCOVID-19 សរុបទាំងអស់ចំនួន៨៦ករណី ៕ (កែសម្រួលដោយ ៖ ធីតា)
ចែករំលែកព័តមាននេះ