រាជធានីភ្នំពេញ ៖ ស្ថិតក្នុងរយៈពេល២ខែដើមឆ្នាំ២០២០នេះការនាំចូលប្រេងឥន្ធនៈឆ្លងកាត់តាមកំពង់ផែស្វយ័តភ្នំពេញមានបរិមាណសរុបជាង៦៦ម៉ឺនតោន កើនឡើងប្រមាណ១១% ធៀបនឹងរយៈពេលដូចគ្នានៃឆ្នាំមុន ។ ទន្ទឹមនឹងតម្រូវការប្រើប្រាស់ប្រេងឥន្ធនៈនៅក្នុងស្រុកមានការកើនឡើងគេសង្កេតឃើញថាតម្លៃប្រេងឥន្ធនៈលក់រាយលើទីផ្សារចាប់ពីថ្ងៃទី១៦ដល់៣១ ខែមីនានេះក៏បានធ្លាក់ថ្លៃបន្តិចផងដែរ បើប្រៀបធៀបទៅនឹងរយៈពេល១៥ថ្ងៃដំបូង (ពីថ្ងៃទី១ ដល់ថ្ងៃទី ១៥ ខែមីនា) ដែលចេញដោយក្រសួងពាណិជ្ជកម្ម ។
ខណៈតម្លៃប្រេងឥន្ទនៈហាក់ធ្លាក់ចុះនៅទីផ្សារកម្ពុជានោះ ប្រជាកសិករដាំដុះម្រេចនិងកសិផលផ្សេងទៀតសំណូមពរឲ្យស្ថាប័នពាក់ព័ន្ធជួយសម្រួលតម្លៃប្រេងឲ្យបានធូរថ្លៃបន្ថែមទៀត ដើម្បីជួយដល់បងប្អូនកាត់បន្ថយថ្លៃដើមនៃការដាំដុះកសិផលនិងផលដំណាំកសិកម្មផ្សេងៗ ព្រោះការចំណាយលើការបូមទឹកស្រោចស្រពផលដំណាំកន្លងមកមានតម្លៃខ្ពស់ ប៉ះពាល់ដល់ថ្លៃដើមរបស់កសិផលផងដែរ ។
យោងតាមរបាយការណ៍អាជីវកម្មរបស់កំពង់ផែស្វយ័តភ្នំពេញចេញផ្សាយថ្មីៗនេះបង្ហាញថា ទំនិញប្រេងឥន្ធនៈនាំចូលឆ្លងកាត់កំពង់ផែស្វយ័តភ្នំពេញនៅក្នុងរយៈពេល២ខែដើមឆ្នាំ២០២០មានប្រមាណ៦៦៣.៧៤០ តោនកើនឡើង១១ %បើប្រៀបធៀបនឹងឆ្នាំ២០១៩ ដែលមានចំនួនត្រឹមតែ ៥៩៩.៩៨៤តោន ។តាមសេចក្តីប្រកាសព័ត៌មានគូសបញ្ជាក់ថា«ទំនិញជាប្រេងឥន្ធនៈឆ្លងកាត់កំពង់ផែស្វយ័តភ្នំពេញកាលពីខែមករាកើនឡើង១៣%ហើយក្នុងខែកុម្ភៈកើនឡើងតែ៨% បើប្រៀបធៀបគ្រាដូចគ្នាឆ្នាំមុន»។
ស្របពេលការនាំចូលក៏ដូចជាតម្រូវការប្រេងឥន្ធនៈនៅលើទីផ្សារក្នុងស្រុកបន្តមានកំណើន បើគេក្រឡេកមើលទៅលើតម្លៃលក់រាយសម្រាប់សាំងធម្មតានិងប្រេងម៉ាស៊ូត ចាប់ពីថ្ងៃទី១៦ ដល់ថ្ងៃទី ៣១ ខែមីនាឆ្នាំ២០២០ ចុងក្រោយនេះបានធ្លាក់ចុះបន្តិចមកវិញ ពោលតម្លៃសាំងធម្មតាក្នុង១លីត្រថ្លៃ៣.០៥០រៀលនិងប្រេងម៉ាស៊ូត២.៨០០រៀលក្នុង១លីត្រ បើធៀបទៅការកំណត់ថ្លៃរយៈពេល១៥ថ្ងៃដំបូងនៃដើមខែមីនាគឺសាំងធម្មតាថ្លៃ៣.៤៥០រៀលនិងប្រេងម៉ាស៊ូតថ្លៃ៣.១៥០រៀល។
តាមសេចក្តីជូនដំណឹងរបស់ក្រសួងពាណិជ្ជកម្មថ្លៃលក់រាយប្រេងឥន្ធនៈនៅតាមស្ថានីយបង្ហាញថា យោងការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់និងអន្តរជាតិ ផ្នែកតាមតម្លៃមធ្យមប្រេងឥន្ធនៈលើទីផ្សារអន្តរជាតិថ្លៃលក់រាយប្រេងឥន្ធនៈពីថ្ងៃទី១៦ដល់៣១មីនាឆ្នាំ២០២០នឹងត្រូវលក់៣.២១០រៀលក្នុង១លីត្រសម្រាប់សាំងធម្មតានិង២.៩៩៩រៀលសម្រាប់ប្រេងម៉ាស៊ូត។
ដើម្បីជួយសម្រួលដល់ជីវភាពរបស់នៅរបស់ប្រជាជននិងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា សម្តេចអគ្គមហាសេនាបតីតេជោ ហ៊ុនសែននាយករដ្ឋមន្ត្រីកម្ពុជា បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន៤សេនដុល្លារក្នុង១លីត្រ។ដូច្នេះថ្លៃលក់រាយប្រេងឥន្ធនៈសម្រាប់អនុវត្តចាប់ពីថ្ងៃទី១៦ដល់៣១ខែមីនាឆ្នាំ២០២០នឹងចុះមក៣.០៥០រៀលក្នុង១លីត្រសម្រាប់សាំធម្មតានិង២.៨០០រៀលសម្រាប់ប្រេងម៉ាស៊ូត។
ប្រជាកសិករដាំម្រេចម្នាក់នៅខេត្តត្បូងឃ្មុំថាសព្វថ្ងៃនេះប្រជាកសិករបន់ឱ្យតែតម្លៃប្រេងចុះថ្លៃ ព្រោះកសិករចំណាយប្រាក់អស់ច្រើនលើការទិញប្រេងម៉ាស៊ូតបូមទឹកស្រោចស្រពដំណាំម្រេចក្នុងរដូវប្រាំងដោយក្នុងមួយអាទិត្យអស់យ៉ាងតិច៣ម៉ឺនរៀល។
លោកសម្បត្តិ កសិកដាំម្រេចនៅខេត្តខាងលើបានឱ្យដឹងថាក្នុងមួយអាទិត្យលោកចំណាយប្រាក់ទិញប្រេងសម្រាប់បូមទឹកស្រោចស្រពដំណាំម្រេចអស់ប្រមាណ៣ម៉ឺនរៀល ហើយការចំណាយនេះវាមិនទៀតបើរដូវវស្សាចូលមកដល់លឿនក្នុងនាមយើងជាកសិករមានអារម្មណ៍ធូរក្នុងចិត្តបន្តិចព្រោះចំណាយប្រាក់អស់តិច។ ប៉ុន្តែបើរដូវប្រាំអូសបន្លាយ ឬអត់មានភ្លៀងនោះការចំណាយប្រាក់ទិញប្រេងបូមទឹកអស់លុយច្រើន។
បើតាមលោកសម្បត្តិ ការទិញប្រេងបូមទឹកស្រោចស្រពដំណាំប្រេចចាប់ផ្តើមតាំងពីពាក់កណ្តាល់ខែតុលារហូតដល់ខែឧសភាហើយនៅក្នុងខែមេសាឬឧសភានេះត្រូវការចំណាយប្រាក់អស់៣០ម៉ឺរៀន លើម្រេច១.៤០០ជន្លុង៕ កែសម្រួលដោយ ៖ សុឃាក់
ចែករំលែកព័តមាននេះ