រាជធានីភ្នំពេញ ៖ លោកសុខ សំណាង ចាងហ្វាងកាសែតដំណឹងថ្មី ដែលដួលក្នុងបន្ទប់ទឹករហូតដាច់សរសៃឈាមក្នុងខួរក្បាលនៅខេត្តព្រះសីហនុ កាលពីពេលកន្លងទៅ។ ក្រោយពេលបានទទួលប្រាក់ឧបត្ថម្ភពីសប្បុរសជន ដែលបានផ្តល់ជូនរូបលោកដើម្បីព្យាបាលជំងឺបានធូរស្បើយកាន់តែប្រសើរឡើង គឺអាចងើបអង្គុយបាន ហូបបានសុខភាពល្អមាំមួនឡើងវិញមួយកំរិត។ ដោយសេចក្តីអាណិតអាសូរ និងជួយសំរាលដល់ទុក្ខលំបាកលោកកែប ជុតិមា អភិបាលរាជធានីភ្នំពេញ និងលោកជំទាវជុំ សាមីន ជាភរិយា បានផ្តល់អំណោយជាថវិកាចំនួន៤លានរៀលជូនដល់លោកសុខ សំណាង ចាងហ្វាងកាសែតដំណឹងថ្មីដែលកំពុងជួបការលំបាកព្យាបាលជំងឺ។ អំណោយនេះត្រូវបានក្រុមជំនួយការរបស់លោកយកទៅប្រគល់ជូនដល់ដៃលោកសុខ សំណាង នៅក្រុមគ្រួសារលោកនៅក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ នាព្រឹកថ្ងៃទិ១៤ តុលា ២០១០។
បានទទួលអំណោយ និងការសួរសុខទុក្ខពី ក្រុមជំនួយការតំណាងលោកកែប ជុតិមា អភិបាលរាជធានី លោកសុខ សំណាង មានក្តីរំភើបក្តុកក្តួលរហូតដល់យំដែលលោកត្រេកអរពេក ដោយបានការទទួលការអាណិតអាសូរពីថ្នាក់ដឹកនាំ ក៏ដូចសប្បុរសជននានាតាំងពីពេលកន្លងមករហូតដល់ពេលនេះ។ លោក សុខ សំណាង និងក្រុមគ្រួសារបានសំដែងនូវការគោរពដឹងគុណដ៏ខ្ពង់ខ្ពស់ចំពោះសន្តានចិត្តអាណិតអាសូររបស់លោកកែប ជុតិមា អភិបាលរាជធានីភ្នំពេញដែលបានជួយឧបត្ថម្ភដល់រូបលោកកំពុងជួបគ្រោះអាសន្ន។ លោកបានលើកដៃសំពះបួងសួងដល់វត្ថុស័ក្តិសិទ្ធិក្នុងលោកសូមតាមជួយថែរក្សាការពារ និងប្រសិទ្ធពរជ័យសិរីមង្គលវិបុលសុខគ្រប់ប្រការចូលមានដល់សម្តេចតេជោហ៊ុន សែន និងលោកជំទាវបណ្ឌិតប៊ុន រ៉ានី ហ៊ុន សែន ព្រមទាំងបុត្រាបុត្រី និងលោក លោកជំទាវ អស់លោក លោកស្រីដែលបានជួយឧបត្ថម្ភដល់រូបលោក។ លោកក៏សុំក្តីករុណាជួយឧបត្ថម្ភជាបន្តទៀតពីសប្បុរសជនដើម្បីមានឱកាសព្យាបាលបន្តឱ្យជាសះស្បើយ៕
ចែករំលែកព័តមាននេះ