រាជធានីភ្នំពេញ ៖ មហាសោកនាដកម្មដែលមិនធ្លាប់មានក្នុងប្រវត្តិសាស្ត្រជាតិរយៈពេល ៣១ឆ្នាំកន្លងមកនេះបានធ្វើឱ្យមានការសោកស្តាយ ភ្ញាក់ផ្អើល និងរន្ធត់ញាប់ញ័រក្រៃលែងលាយឡំដោយសេចក្តីក្តុកក្តួលជាទូទៅ ក្នុងព្រឹត្តិការណ៍សប្បាយរីករាយបានក្លាយជាមហាទុក្ខដ៏ធំធេងនា ថ្ងៃបញ្ចប់ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ព្រោះតែកើតមានឧបទ្ទវហេតុនៅបរិវេណស្ពានពេជ្រនៃតំបន់កោះពេជ្រ នាវេលាម៉ោង៩និង៣០នាទីយប់ ថ្ងៃទី២២ វិច្ឆិកា ដែលយ៉ាងហោចណាស់មានមនុស្សប្រុសស្រី ក្មេងចាស់ប្រមាណ៣៤៩នាក់ស្លាប់ និងជាង៧០០នាក់ទៀតបានរងរបួស ។ ក្រោយឧបទ្ទវហេតុប៉ុន្មានម៉ោងតាមកញ្ចក់ទូរទស្សន៍ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះ រាជាណាចក្រកម្ពុជា បានចេញសេចក្តីថ្លែងការណ៍ជាបន្តបន្ទាប់នៅវេលារំលងអធ្រាត្រ និងវេលាទៀបភ្លឺស្តីពីឧបទ្ទវហេតុនេះ និងបានប្រកាសយកថ្ងៃ២៤ វិច្ឆិកា នេះជាថ្ងៃកាន់មហាទុក្ខទូទាំងប្រទេស និងបានដាក់ចេញវិធានការមួយចំនួនដើម្បីឆ្លើយតបទៅនឹងឧបទ្ទវហេតុ គួរឱ្យសោកស្តាយនេះ ដោយបានចេញសេចក្តីសំរេចបង្កើតគណៈកម្មការ និងអនុគណៈកម្មការទទួលបន្ទុកដោះស្រាយករណីធ្ងន់ធ្ងរដែលបានកើត ឡើង ។ ខាងក្រោមនេះ គឺជាសេចក្តីរាយការណ៍របស់អ្នកឆ្លើយឆ្លងព័ត៌មានកោះសន្តិភាពពី គ្រប់បណ្តាញទាំងអស់ជុំវិញឧបទ្ទវហេតុលើស្ពានពេជ្រ ។
- ឧបទ្ទវហេតុផ្អើលរត់ជាន់គ្នាលើស្ពាន
មនុស្ស ក្មេងចាស់ ប្រុសស្រីចំនួន៣៤៩នាក់ បានស្លាប់បាត់បង់ជីវិតជាបន្តបន្ទាប់ ហើយមនុស្សចំនួន៧១៥នាក់បានរងរបួស និងមនុស្សចំនួន៣៦៦នាក់ទៀតត្រូវបានជួយសង្គ្រោះឱ្យរួចផុតពី គ្រោះថ្នាក់សោកនាដកម្មដ៏រន្ធត់មួយដែលបានកើតមាននៅលើ ស្ពានពេជ្រ ស្ថិតនៅក្នុងមជ្ឈមណ្ឌលកំសាន្តកោះពេជ្រ ដែលបង្កឡើងពីហេតុការណ៍ភ្ញាក់ផ្អើលរត់ជាន់គ្នាដ៏ធំមួយនាវេលា ម៉ោង៩និង៣០នាទីយប់ ថ្ងៃទី២២ វិច្ឆិកា ។ ទាក់ទិននឹងសោកនាដកម្មដ៏រន្ធត់ខាងលើនេះ បើតាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុមនុស្សម្នាយា៉ងច្រើនកុះកររាប់ពាន់រាប់មឺុននាក់ បានធ្វើដំណើរត្រសងដោយរីករាយក្អាកក្អាយចូលទៅកំសាន្តការតាំង ពិព័រណ៍ពាណិជ្ជកម្ម ទំនិញផ្សេងៗនៅកោះពេជ្រ នាឱកាសបុណ្យអុំទូក បណ្តែតប្រទីប សំពះព្រះខែ និងអកអំបុកនាថ្ងៃទី៣ ដែលជាថ្ងៃ បង្ហើយព្រះរាជពិធីបុណ្យ ។ ខណៈពេលនោះបងប្អូនប្រជាពលរដ្ឋបាននាំគ្នាធ្វើដំណើរដោយថ្មើរ ជើងឆ្លងស្ពានយោលកោះពេជ្រពីទិសម្ខាងទៅទិសម្ខាងមានអ្នកឆ្លង ទៅ និងមានឆ្លងមកយា៉ងណែនណាន់តាន់តាប់កកខាប់ពេញលើស្ពានពេជ្រ ដែលមានទំហំទទឹង៨,១៧ម៉ែត្រ និងបណ្តោយ១០១ម៉ែត្រ ។
មូល ហេតុនៃការបង្កើតឱ្យមានការផ្អើលរត់ជាន់គ្នានេះ តាមប្រភពមិនផ្លូវការនៅឡើយបានឱ្យដឹងថា បណ្តាលមកពីក្រុមជនខិលខូចស្រែកតៗគ្នាទាំងស្លន់ស្លោថា «ស្ពានបាក់ សូមរត់ឱ្យលឿនឡើង» ។ ផ្តើមចេញពីព័ត៌មានអកុសលនេះ បានធ្វើឱ្យក្រុមប្រជាពលរដ្ឋនាំគ្នារុញច្រានគ្នាដើម្បី ប្រញាប់ឆ្លងស្ពានឱ្យផុត បណ្តាលឱ្យខ្លះដួលគរលើគ្នាស្រែកទ្រហោឡើង និងបង្កឱ្យមានសោកនាដកម្មស្លាប់រដូករណែលរាប់រយនាក់ដេកគរលើ គ្នាដកខ្លួនមិនរួចនៅក្រាលពេញស្ពានតែម្តង និងដួលដេកត្រួតលើគ្នាពី៣ទៅ៤ត្រួតខ្ពស់ដូចទំនប់ ។ ក្នុងឱកាសជ្រួលខ្លាំងនោះដែរក៏មានព័ត៌មានថា មានអ្នកខ្លះប្រថុយលោតពីលើស្ពានបន្តបន្ទាប់ដែលនៅក្រោមស្ពានក៏ មានសមត្ថកិច្ចជើងទឹកចូលមកអន្តរាគមន៍ជួយស្រង់ផងដែរ។
ប្រភព ព័ត៌មានផ្សេងមួយទៀតបាននិយាយថា ពេលមានហេតុការណ៍ភ្ញាក់ផ្អើលកើតឡើងភ្លាមៗ ស្រាប់តែមានជនខិលខូចយកខ្សែច្រវាក់ដែលក្រុមហ៊ុនដាក់កាត់ ទទឹងស្ពានសំរាប់ហាមឃាត់ម៉ូតូកុំឱ្យជិះឆ្លងកាត់មកចងទាញទទឹង ផ្លូវ ទើបបណ្តាលឱ្យមនុស្សរត់ទាក់ច្រវាក់ដួលបោកខ្លួនជាបន្តបន្ទាប់គរ លើគ្នាងើបមិនរួច បណ្តាលឱ្យកើតមានគ្រោះថ្នាក់ធ្ងន់ធ្ងរក្លាយជាមហាសោកនាដកម្មតែ ម្តង។ តាមប្រភពព័ត៌មានផ្សេងៗទៀតនិយាយថា គ្រោះថ្នាក់បង្កឡើងដោយសារមានការឆក់ចរន្តអគ្គិសនីនៅលើស្ពាន ធ្វើឱ្យមនុស្សទាំងឡាយនាំគ្នាភ្ញាក់ផ្អើលស្លន់ស្លោកើតឡើង ។ ដោយឡែកប្រភពព័ត៌មានផ្លូវការពីលោកឧត្តមសេនីយ៍ត្រី ទូច ណារ៉ុថ ស្នងការនគរបាលរាជធានីភ្នំពេញ បានមានប្រសាសន៍ប្រាប់អ្នកយកព័ត៌មានកោះសន្តិភាពនៅលើស្ពានកើត មានសោកនាដកម្មខាងលើនេះ នាព្រឹកថ្ងៃទី២៣ វិច្ឆិកា ថា ហេតុការណ៍ដែលបានកើតមានឡើងនៅលើស្ពានពេជ្រនោះ គឺផ្តើមចេញពីការភ្ញាក់ផ្អើល ហើយរត់ជាន់គ្នាស្លាប់រដូករណែលតែម្តង ។ លោកស្នងការបានបដិសេធចំពោះពាក្យចចាម អារ៉ាមផ្សេងៗក្រៅពីនេះ ។
- សមត្ថកិច្ចប៉េអឹមសស្រាក់សស្រាំ
តាមប្រភពព័ត៌មាននៅកន្លែងកើតហេតុគេបានសង្កេតឃើញវត្តមានសមត្ថ កិច្ចកងរាជអាវុធហត្ថមានការសស្រាក់សស្រាំជាងកងកំលាំងផ្សេងទៀត ក្នុងហេតុការណ៍ចូលទៅសង្គ្រោះអាយុជីវិតប្រជាពលរដ្ឋ ។ លើសពីនេះទៅទៀតគេបានសង្កេតឃើញក្រុមសមត្ថកិច្ចមានការយឺតយ៉ាវផង ដែរ ក្នុងការចូលទៅអន្តរាគមន៍សង្គ្រោះប្រជាពលរដ្ឋដែលកំពុងនៅគរ លើគ្នានេះ ។ ធ្ងន់ធ្ងរជាងនេះទៅទៀតហាក់ដូចជាខ្វះបច្ចេកទេសក្នុងការបញ្ជា កំលាំងជួយអន្តរាគមន៍សង្គ្រោះពីក្នុងឧបទ្ទវហេតុដែលកើតឡើងភ្លាមៗ។ ក្នុងឧបទ្ទវហេតុខាងលើនេះ គេបានសង្កេតឃើញនៅក្នុងមន្ទីរពេទ្យរដ្ឋធំៗនានារួមមានមន្ទីរ ពេទ្យកាល់ម៉ែត មន្ទីរពេទ្យមិត្តភាពខ្មែរ-សូវៀត មន្ទីពេទ្យព្រះកុសុមៈ មន្ទីរពេទ្យព្រះកេតុមាលា និងមន្ទីរពេទ្យសម្ពពក្រុងត្រូវរថយន្តសង្គ្រោះបន្ទាន់រាប់សិប គ្រឿងដឹកអ្នករងគ្រោះរបួស និងស្លាប់ទៅព្យាបាល និងតំកល់សពទុក ដោយសមរម្យ ។
- ប្រជាពលរដ្ឋនិយាយពីអបិយជំនឿ
តាមប្រភព ព័ត៌មាននានាពីក្រុមប្រជាពលរដ្ឋដែលបានឃើញហេតុការណ៍គ្រោះថ្នាក់ ខាងលើ នេះបាននាំគ្នានិយាយតៗគ្នាតាមរបៀបអបិយជំនឿថា មូលហេតុដែលមានមនុស្សស្លាប់ និងរបួសរាប់រយនាក់យ៉ាងច្រើននៅលើស្ពានពេជ្រនោះ គឺបណ្តាលមកពីម្ចាស់ស្ពានសាងសង់ឡើងពុំបានសែនព្រេនរៀប ពិស្ណុការសុំសេចក្តីសុខពីម្ចាស់ទឹកម្ចាស់ដីឱ្យបានត្រឹមត្រូវ ទើបបារមីម្ចាស់ទឹកម្ចាស់ដីមានការខឹងសម្បា ហើយធ្វើបាបបែបនេះ ។ មានការកត់សំគាល់ថា នៅរៀងរាល់រដូវព្រះរាជពិធីបុណ្យអុំទូកម្តងៗ ទាំងមន្ត្រីរាជការ ក៏ដូចជាកូនចៅប្រជាពលរដ្ឋទូទាំងប្រទេសតែងតែទន្ទឹងរង់ចាំចង់ ដឹងនូវលទ្ធផលក្រោយការប្រណាំងទូក។ ប៉ុន្តែដោយឡែកក្រោយលទ្ធផលប្រណាំងទូកនៃឆ្នាំនេះ គឺប្រជាពលរដ្ឋទូទាំងប្រទេសរាប់ទាំងមន្ត្រីរាជការនានាផងដែរ បែរជារង់ចាំចង់ដឹងនូវលទ្ធផលនៃចំនួនអ្នកស្លាប់ក្នុងសោកនាដ កម្មខាងលើទៅវិញ ។ ម្យ៉ាងទៀតមិនត្រឹមតែនៅក្នុងប្រទេសទេដែលចាប់អារម្មណ៍ និងក្តុកក្តួល សូម្បីប្រជាជនខ្មែរយើងដែលរស់នៅពាសពេញពិភពលោកក៏ស្លុតរន្ធត់ ចំពោះឧបទ្ទវហេតុនេះដែរ ព្រមទាំងមានទំនាក់ទំនងហូរហែសួរសុខទុក្ខក្រុមសាច់ញាតិដែលរស់ នៅក្នុងប្រទេស ។
- សេចក្តីរាយការណ៍ពីពេទ្យកាល់ម៉ែត
តួលេខ ជនរងគ្រោះស្លាប់នៅលើស្ពានពេជ្របញ្ជូនមកមន្ទីរពេទ្យកាល់ម៉ែត នៅព្រឹកថ្ងៃទី២៣ វិច្ឆិកា ២០១០ គណៈកម្មការចំរុះប្រចាំមន្ទីរពេទ្យកាល់ម៉ែតចេញរបាយការណ៍ឱ្យដឹងថា មានចំនួនអ្នកស្លាប់១៤០នាក់ (ស្ត្រីចំនួន៩៩នាក់ បុរសចំនួន៤១នាក់) និងរបួសចំនួន១៨២នាក់ (បុរសចំនួន១០១នាក់ ស្ត្រីចំនួន៨១នាក់) បច្ចុប្បន្នកំពុងសំរាកព្យាបាលចំនួន៤៩នាក់ ។ នៅព្រឹកថ្ងៃទី២៣ វិច្ឆិកា ២០១០ រថយន្តយោធាចំនួន១៥គ្រឿង និងរថយន្តពេទ្យជាច្រើនគ្រឿង បានប្រចាំការនៅមន្ទីរពេទ្យត្រៀមដឹកសពបញ្ជូនទៅធ្វើបុណ្យតាម ស្រុកកំណើត ក្រោមការឧបត្ថម្ភពីសាលារាជធានីភ្នំពេញ មឈូសម្នាក់មួយតម្លៃ២៥០ ដុល្លារ ។ គណៈកម្មការចំរុះព្យាយាមបំពេញសំណុំបែបបទយ៉ាងយកចិត្តទុកដាក់ដល់ ក្រុមគ្រួសារសព ហើយសពត្រូវបានដឹកតាមរថយន្តយោធាទៅកាន់ខេត្តស្វាយរៀង តាកែវ កណ្តាល កំពង់ស្ពឺ កំពង់ឆ្នាំង ។ តាមការអះអាងរបស់មន្ត្រីនគរបាលដែលស្ថិតក្នុងគណៈកម្មការចំរុះឱ្យ ដឹងថា នៅមុខមន្ទីរពេទ្យកាល់ម៉ែត ក៏ដូចជាកន្លែងតំកល់សពក្នុងមន្ទីរពេទ្យមានការកកស្ទះដោយសារក្រុម គ្រួសាររបស់ជនរងគ្រោះព្យាយាមប្រជ្រៀតគ្នាចូលទៅលើកសពដែលត្រូវ ខាងមន្ទីរពេទ្យកាល់ម៉ែតរៀបចំដាក់តំរៀបគ្នាទុកឱ្យក្រុម គ្រួសារទៅពិនិត្យមើល ។ នៅរសៀលថ្ងៃដដែល ក្រុមគ្រួសារជនរងគ្រោះបន្តនាំគ្នាទៅដាក់ពាក្យសុំយកសពទៅកាន់ ស្រុកកំណើត។ គណៈកម្មការការចំរុះមិនទាន់បានប្រាប់ព័ត៌មានលំអិតថាក្រុមគ្រួសារ ជនរងគ្រោះដឹកសពបានប៉ុន្មានទេ ក៏ប៉ុន្តែនៅរសៀលថ្ងៃដដែល សពត្រូវគណៈកម្មការចំរុះប្រគល់ទៅឱ្យក្រុមគ្រួសារតាមបណ្តាខេត្ត ចំនួន១៣២នាក់ហើយ និងនៅសល់៨នាក់ទៀតគិតត្រឹមម៉ោង៦ល្ងាច។
- សេចក្តីរាយការណ៍ពីមន្ទីរពេទ្យព្រះកេតុមាលា
លោក ឧត្តមសេនីយ៍លី សុវណ្ណ ប្រធានមន្ទីរពេទ្យព្រះកេតុមាលាបានឱ្យដឹងថា ជនរងគ្រោះដែលបានដឹកចូលមន្ទីរពេទ្យព្រះកេតុមាលាមានចំនួន៥៦នាក់ ហើយស្លាប់១៤នាក់ (ប្រុស៣ ស្រី១១) និងរបួសស្រាល-ធ្ងន់៤២នាក់ (ប្រុស៤នាក់ ស្រី៣៨នាក់) ។ លោកឧត្តមសេនីយ៍បានបន្តថា មន្ទីរពេទ្យព្រះកេតុមាលាទទួលរថយន្តធុនធំពី ក្រសួងការពារជាតិចំនួន១០គ្រឿងសំរាប់ដឹកជញ្ជូនសពទៅកាន់ស្រុក កំណើតរបស់ពួកគេ ។ ដូច្នេះជនរងគ្រោះដល់អាយុជីវិតនៅក្នុងមន្ទីរពេទ្យព្រះកេតុមាលា ត្រូវបានរថយន្តថ្មីទំនើបជារថយន្តជំនួយពីប្រទេសចិនសំរាប់ដឹកសព ជូនបងប្អូនប្រជាពលរដ្ឋដែលក្រសួងការពារជាតិបានផ្តល់ឱ្យមកនេះ ។ ជាមួយគ្នានេះ នាព្រឹកថ្ងៃទី២៣ វិច្ឆិកា នោះដែរ លោកជំទាវជា ខេង ស៊ុយសែម និងក្រុមការងារគណបក្សប្រជាជនស្រុកកណ្តៀង ខេត្តពោធិ៍សាត់ បានជួយជ្រោមជ្រែងនាំយកសពនៅមន្ទីរពេទ្យកាល់ម៉ែត និងមន្ទីរពេទ្យព្រះកេតុមាលាទៅប្រគល់ជូនក្រុមគ្រួសារដល់ស្រុក កំណើត ។ លោកជំទាវជា ខេង ស៊ុយ សែម បានឱ្យដឹងថា លោកជំទាវមានកម្មករ៣នាក់មកពីខេត្តពោធិ៍សាត់ធ្វើការងារនៅផ្ទះលោក ជំទាវ ហើយត្រូវរងគ្រោះរហូតបាត់បង់អាយុជីវិតក្នុងេហតុការណ៍លើស្ពានពេជ្រ នាយប់ថ្ងៃបុណ្យអុំទូក បណ្តែតប្រទីប អកអំបុក និងសំពះព្រះខែនោះ ។ លោកជំទាវបានបញ្ជាក់ទៀតថា សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជាបានប្រកាសឧបត្ថម្ភប្រាក់ដល់អ្នកស្លាប់ ក្នុង១នាក់៥លានរៀល ដើម្បីឱ្យក្រុម គ្រួសារសពយកទៅធ្វើបុណ្យតាមប្រពៃណី ។ ប៉ុន្តែដោយសារសពកម្មកររបស់លោកជំទាវមានស្រុកកំណើតនៅឆ្ងាយពីទីរួម ខេត្តនិងផ្លូវចូលលំបាក លោកជំទាវបានឧបត្ថម្ភប្រាក់ផ្ទាល់ខ្លួនដល់ជនរងគ្រោះបាត់បង់ អាយុជីវិតម្នាក់២លានរៀលទៀត សំរាប់ឱ្យក្រុមការងារពង្រឹងមូលដ្ឋានគណបក្សប្រជាជនស្រុកកណ្តៀង ដឹកសពយកទៅមុន ។
- សេចក្តីរាយការណ៍ពីមន្ទីរពេទ្យព្រះកុសុមៈ
ជន រងគ្រោះចំនួន១៥២នាក់ត្រូវបានរថយន្តសាមុយបញ្ជូនទៅកាន់មន្ទីរ ពេទ្យព្រះកុសុមៈ ដែលក្នុងនោះចំនួន៤៩នាក់បានស្លាប់បាត់បង់ជីវិត ក្នុងនោះបុរសចំនួន១៨នាក់ ស្រីចំនួន៣១នាក់ និងអ្នករបួសមាន១០៣នាក់ ក្នុងនោះស្រី៣៩នាក់ ។ អ្នកស្លាប់ត្រូវបានដាក់តំរៀបគ្នានៅក្នុងមន្ទីរពេទ្យ និងអ្នករងរបួសដេកតំរៀបគ្នាជាបណ្តោះអាសន្នត្រៀបត្រាមុនពេល បញ្ជូនទៅកាន់បន្ទប់សំរាកព្យាបាល ។ តាមព័ត៌មានឱ្យដឹងថា អាជ្ញាធរខណ្ឌទួលគោក រួមទាំងសមត្ថកិច្ចបានទៅដល់មន្ទីរពេទ្យទាំងយប់ និងជួយចាត់ចែងបញ្ជូនសពរក្សាទុកក្នុងមន្ទីរពេទ្យដើម្បីរង់ចាំ បងប្អូន ។ នៅយប់នោះគេឮតែសំលេងទ្រហោយំពីសាច់ញាតិ ។ សពខ្លះត្រូវក្រុមគ្រួសារដើររកឃើញទាំងយប់ និងខ្លះទៀតអត់មានសាច់ញាតិមករកមើលនៅឡើយទេ ។ នៅព្រឹកថ្ងៃទី២៣ ខែវិច្ឆិកា អាជ្ញាធរខណ្ឌទួលគោក រួមទាំងសមត្ថកិច្ចបានថតរូបជាបន្ទាន់ ហើយផ្តិតរូបសពបិទនៅមុខមន្ទីរពេទ្យព្រះកុសុមៈដើម្បីឱ្យបង ប្អូនមើលងាយស្រួលក្នុងការចូលទៅរកមើលក្នុងមន្ទីរពេទ្យ ។ នៅព្រឹកនោះនៅមុខមន្ទីរពេទ្យពោរពេញទៅដោយមនុស្សម្នាស្វែងរកសាច់ ញាតិដែលខ្លះរកឃើញទ្រហោយំអោបសព ប្រពន្ធកូនគួរឱ្យសង្វេគជាទីបំផុត ។ ចំណែកសមត្ថកិច្ចនៅ ព្រឹកនោះបានត្រួតពិនិត្យផ្តិតមេដៃសព និងស្រង់ឈ្មោះរកអត្តសញ្ញាណសពផងដែរ ។ អ្នកស្រីបួន ណៃ ស៊ាង អាយុ៤៨ឆ្នាំ មានទីលំនៅក្នុងស្រុកស្នួល ខេត្តក្រចេះពេលរកសពកូនស្រីឃើញភ្លាមបានទ្រហោយំអោបសពជាមួយបង ប្អូន ។ គាត់ឱ្យដឹងថា កូនស្រីរបស់គាត់ឈ្មោះឈឿន សុខឃី អាយុ២១ឆ្នាំ បានស្លាប់ និងកូនប្រសារងរបួស ។ ចំណែកប្អូនប្រុស កូនប្រសារបស់គាត់ក៏ស្លាប់ដែរ ។ ចំណែកលោកម៉ា សុភាព អាយុ៤៤ឆ្នាំ មានទីលំនៅក្នុងស្រុកដូនកែវ ខេត្តតាកែវ បានយំអោបសពប្រពន្ធគួរឱ្យសង្វេគបំផុត ។ លោកឱ្យដឹងថា ប្រពន្ធរបស់លោកឈ្មោះសេង គន្ធា អាយុ៤៣ឆ្នាំ បានមកភ្នំពេញដើរលេងបុណ្យអុំទូកជាមួយប្អូនស្រីធម៌ចំនួន៣នាក់ ហើយបានស្លាប់ចំនួន២នាក់ ។ តាមប្រភពព័ត៌មានឱ្យដឹងថា ជនរងគ្រោះដែលស្លាប់ភាគច្រើនស្ថិតក្នុងយុវវ័យ ។ មានគ្រួសារខ្លះស្លាប់ទាំងពីរនាក់បងប្អូន រួមទាំងសាច់ញាតិដែលធ្វើដំណើរទៅដើរកំសាន្តរួមគ្នា។ តាមព័ត៌មានត្រឹមម៉ោង៤ និង៣០នាទីរសៀលឱ្យដឹងថា សាកសពទាំងអស់ត្រូវបានស្គាល់អត្តសញ្ញាណ និងបានបញ្ជូនទៅកាន់ស្រុកកំណើតអស់ហើយ។
- ខេត្តមួយចំនួនបានផ្តល់ចំនួនអ្នករងគ្រោះ
សំរាប់ ខេត្តពោធិ៍សាត់មានសេចក្តីរាយការណ៍ថា មានអ្នកស្លាប់ ។ ទោះបីជាបែបណា នៅមានអ្នករបួស និង បាត់ខ្លួនមួយចំនួនទៀតកំពុងបន្តស្រាវជ្រាវដែលមានលោករដ្ឋមន្ត្រី ស៊ុយ សែម និងលោក ជំទាវជាប្រធានក្រុមការងារចុះជួយខេត្តពោធិ៍សាត់ឈរជើងជាប្រចាំ នៅភ្នំពេញ និងលោកខូយ សុខា អភិបាលខេត្ត ឈរជើងប្រចាំ នៅខេត្តពោធិ៍សាត់ ដើម្បីស្វែងរកអ្នកស្លាប់ និងអ្នករបួស ។ ចំពោះខេត្តកណ្តាលវិញ បានឱ្យដឹងថា មានអ្នកស្លាប់សរុបចំនួន៦៩នាក់ (ស្រី៤៣នាក់)របួស១៧៦នាក់ (ស្រី៨២នាក់) និងបាត់ខ្លួន១២៥នាក់ (ស្រី៦៥នាក់) ។ នៅខេត្តបាត់ដំបង៖ យោងតាមរបាយការណ៍ជំហានដំបូងរបស់ស្នងការដ្ឋានខេត្ត បានឱ្យដឹងនៅរសៀលថ្ងៃទី២៣ វិច្ឆិកា ថា មានប្រជាពលរដ្ឋនៅខេត្តបាត់ដំបងចំនួន៤នាក់ដែលជួបគ្រោះថ្នាក់ដោយ ការរត់ជាន់គ្នានៅស្ពានពេជ្រ រាជធានីភ្នំពេញ កាលពីយប់ថ្ងៃទី២២ វិច្ឆិកា ។
លោកឧត្តមសេនីយ៍ត្រីស ថេត ស្នងការនគរបាលខេត្តបានថ្លែងថា ជនរងគ្រោះទាំង៤នាក់នោះមានម្នាក់រស់នៅសង្កាត់ទួលតាឯក ក្រុងបាត់ដំបង បានស្លាប់ ហើយត្រូវបានបញ្ជូនសពមកដល់លំនៅឋានហើយ រីឯ២នាក់ទៀតរស់នៅស្រុកមោងប្ញស្សី ខេត្តបាត់ដំបង មិនទាន់ដឹងថា ស្លាប់ ឬរស់នោះទេ ព្រោះក្រុមគ្រួសាររកមិនទាន់ឃើញ ហើយទូរស័ព្ទក៏មិនអាចទំនាក់ទំនងបាននៅឡើយ ។ ដោយឡែកជនរងគ្រោះម្នាក់ទៀតរស់នៅឃុំជ្រៃ ស្រុកថ្មគោល ត្រូវបានរាយការណ៍ថា ស្លាប់ ។ ដូច្នេះជាក់ស្តែងមាន ប្រជាពលរដ្ឋ២នាក់បានស្លាប់ ។ លោកឧត្តមសេនីយ៍បានបញ្ជាក់ថា នេះគឺជារបាយការណ៍ជំហានដំបូងតែប៉ុណ្ណោះ ហើយលោកកំពុងបញ្ជាឱ្យសមត្ថកិច្ចតាមមូលដ្ឋានចុះស្រាវជ្រាវ លើ ករណីនេះបន្តទៀត ដើម្បីស្វែងរកប្រជាពលរដ្ឋដែលរងគ្រោះនៅកោះពេជ្រ ។ នៅខេត្តកំពង់ចាមវិញឱ្យដឹងថា គ្រោះអកុសលកើតឡើងនៅលើស្ពានពេជ្រ បើតាមមន្ត្រីនគរបាលនៃស្នងការដ្ឋានខេត្តឱ្យដឹងថា សំរាប់ប្រជាពលរដ្ឋនៅខេត្តកំពង់ចាមមានអ្នកស្លាប់ចំនួន៣៦នាក់ របួសចំនួន៧៦នាក់ និងបាត់ខ្លួនចំនួន២៦នាក់ ។
តាមការស្រាវ ជ្រាវយ៉ាងយកចិត្តទុកដាក់របស់សមត្ថកិច្ចប៉ូលិស និងអាជ្ញាធរមូលដ្ឋានភូមិ-ឃុំ-ស្រុក-ក្រុងនោះ រហូតមកដល់ម៉ោង១២ថ្ងៃត្រង់ ថ្ងៃទី២៣ វិច្ឆិកា បានរកឃើញអ្នកស្លាប់ និងអ្នករបួសគ្រប់ស្រុក-ក្រុងទូទាំងខេត្តតាកែវ នៅក្នុងឧបទ្ទវហេតុលើស្ពានពេជ្រ តំបន់កោះពេជ្រ នារាជធានីភ្នំពេញ កាលពីយប់ថ្ងៃទី២២ វិច្ឆិកា ឆ្នាំ២០១០ កន្លងទៅ ។ តាមការឱ្យដឹងពីលោកអធិការ-អធិការរងប៉ូលិសគ្រប់ស្រុក-ក្រុង បានប្រាប់កោះសន្តិភាពតាមទូរស័ព្ទថា ១-ស្រុកបាទី អ្នកស្លាប់៦នាក់ អ្នករបួស១៣នាក់ ២-ស្រុកសំរោង អ្នកស្លាប់៥នាក់ របួស៧នាក់ ៣-ស្រុកត្រាំកក់ អ្នកស្លាប់៦នាក់ របួស៣នាក់ ៤-ក្រុងដូនកែវ អ្នកស្លាប់៣នាក់ របួស២នាក់ ៥-ស្រុកព្រៃកប្បាស ស្លាប់៣នាក់ របួស៣នាក់ ៦-ស្រុកទ្រាំង អ្នកស្លាប់២នាក់ របួស៣នាក់ ៧-ស្រុកកោះអណ្តែត អ្នកស្លាប់ម្នាក់ ៨-ស្រុកបុរីជលសា អ្នកស្លាប់ម្នាក់ ៩-ស្រុកគិរីវង់ របួសម្នាក់ ១០-ស្រុកអង្គរបុរី បាត់ខ្លួនម្នាក់ អត់ទាន់រកឃើញនៅឡើយ ។ សរុបអ្នកស្លាប់មាន២៧នាក់ និងរបួស៣២នាក់ ។ តាមប្រភពព័ត៌មានពីមន្ត្រីប៉ូលិសខេត្តមួយរូបបាននិយាយថា ចំពោះតួលេខនេះនៅមិនទាន់ជាផ្លូវការនៅឡើយទេ ដោយនៅតាមឃុំនានា ការស្រាវជ្រាវនៅតែបន្តមិនទាន់ចប់ ។
- អាជ្ញាធររាជធានីផ្តល់មឈូស
បន្ទាប់ពី មានឧបទ្ទវហេតុគួរឱ្យសោកស្តាយនេះ អាជ្ញាធររាជធានីភ្នំពេញ បានខ្នះខ្នែងដុតដៃដុតជើងបំផុត ក្នុងការសំរបសំរួលដឹកអ្នករងរបួសយកទៅសង្គ្រោះនៅមន្ទីរពេទ្យ និងសាកសពអ្នកស្លាប់ត្រូវបានទុកដាក់យ៉ាងស្រួលបួល
បំផុត ។ ជាពិសេសទៅទៀតនោះអាជ្ញាធររាជធានីដែលមានគណៈកម្មការចំរុះចូល រួមបានធ្វើការទំនាក់ទំនងក្រុមគ្រួសារជនរងគ្រោះដើម្បីសំរបសំរួល និងដឹកជញ្ជូនសពអ្នកស្លាប់ទៅកាន់លំនៅឋានវិញ ដើម្បីធ្វើបុណ្យទានតាមប្រពៃណី ។ គណៈកម្មការចំរុះក៏ដូចជាអាជ្ញាធររាជធានីភ្នំពេញ បានប្រមូលទិញមឈូសដែលតាមគំរោងមានចំនួន៤០០ តែជំហានដំបូងប្រមូលទិញពីអ្នកលក់មឈូសនៅភ្នំពេញបានចំនួន ២០០ និងបានដឹកជញ្ជូនទៅដល់មន្ទីរពេទ្យ ហើយនៅសល់ប៉ុន្មាននឹងទិញដឹកជញ្ជូនទៅតាមក្រោយទៀត ដែលមឈូសមួយតំលៃពី១៧០ដុល្លារទៅ២៨០ដុល្លារ តាមប្រភេទមឈូស ។
គណៈ កម្មការដោះស្រាយក្នុងឧបទ្ទវហេតុនៅកោះពេជ្រ ថ្នាក់រាជធានី រហូតមកដល់ពេលនេះបានធ្វើការទំនាក់ទំនងជាមួយក្រុមគ្រួសារជនរងគ្រោះ និងស្រង់ស្ថិតិអ្នករងរបួស និងស្លាប់បានមួយចំនួនធំ ។ គិតត្រឹមវេលាម៉ោង២រសៀល ថ្ងៃទី២៣ វិច្ឆិកា តាមតួលេខបណ្តោះអាសន្នរបស់គណៈកម្មការឱ្យដឹងថា អ្នករងគ្រោះដល់ស្លាប់មានចំនួន៣៤៩នាក់ និងរងរបួសជាង៥០០នាក់ ។ ក្នុងនោះជនរងគ្រោះរស់នៅរាជធានីភ្នំពេញ ស្លាប់១៣៩នាក់ ស្រី៨៥នាក់ បាត់ខ្លួន១២៦នាក់ ស្រី៨នាក់ រងរបួស១០២នាក់ ស្រី៣៨នាក់ ហើយរកឃើញនៅរស់ត្រឡប់មកវិញចំនួន៩នាក់ ។ ការងារជួយសង្គ្រោះបន្ទាន់កាលពីរាត្រីថ្ងៃទី២២ វិច្ឆិកា ក្នុងឧបទ្ទវហេតុគួរឱ្យរន្ធត់ចិត្តនោះមន្ទីរសុខាភិបាល រាជធានីភ្នំពេញ មានរថយន្តពេទ្យចំនួន១០គ្រឿង និងរថយន្តចល័តខាងក្រៅមួយគ្រឿង បុគ្គលិកពេទ្យក្នុងការងារជួយសង្គ្រោះមានចំនួន៣៧៣នាក់ ដោយមិនគិតពីរថយន្តមកពីមន្ទីរពេទ្យផ្សេងៗ និងរថយន្តរបស់សមត្ថកិច្ចផ្សេងៗទៀតនោះទេ ។
- សារសម្តេចតេជោថ្លែងតាមទូរទស្សន៍
សម្តេច អគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាណែនាំឱ្យ ក្រសួងស្ថាប័នពាក់ព័ន្ធ ជាពិសេសក្រសួងមហាផ្ទៃ ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា ចាត់ចែងគ្រប់គ្រងការធ្វើអត្តសញ្ញាណកម្មជនរងគ្រោះដែលបានបាត់បង់ ជីវិតក្នុងឧបទ្ទវហេតុដ៏រន្ធត់នៅកោះពេជ្រ ដើម្បីប្រគល់ជូនក្រុមគ្រួសារធ្វើបុណ្យតាមប្រពៃណី និងសូមឱ្យអាជ្ញាធរថ្នាក់ក្រោមជាតិចូលរួមចាត់ចែងរៀបចំពិធីបុណ្យ សពនេះនៅតាមមូលដ្ឋានរបស់ខ្លួន ។ សម្តេចតេជោនាយករដ្ឋមន្ត្រី ហ៊ុន សែន បានបញ្ជាណែនាំក្រសួងមហាផ្ទៃ ក្រសួងសុខាភិបាល ក្រសួងសង្គមកិច្ចអតីតយុទ្ធជន និងយុវនីតិសម្បទា និងស្ថាប័នពាក់ព័ន្ធបែបនេះ កាលពីព្រឹកថ្ងៃទី២២ វិច្ឆិកា ឆ្នាំ២០១០ តាមទូរទស្សន៍បាយ័ន ក្នុងពេលកើតមានឧបទ្ទវហេតុដ៏រន្ធត់មួយដែលពុំធ្លាប់មាននៅលើស្ពាន នៃមណ្ឌលកំសាន្តកោះពេជ្រ ដែលធ្វើឱ្យប្រជាពលរដ្ឋបាត់បង់ជីវិតនិងរងរបួសយ៉ាងច្រើនដែលតាម ការប៉ាន់ស្មានមានប្រមាណ៣៤៥នាក់ស្លាប់ និង៣៩១នាក់ទៀតរបួស ។
សម្តេច តេជោនាយករដ្ឋមន្ត្រីមានប្រសាសន៍បន្តថា កងកំលាំងសមត្ថកិច្ចគ្រប់ជាន់ថ្នាក់ ជា ពិសេសសាលារាជធានីភ្នំពេញ ត្រូវសហការជាមួយស្ថាប័នពាក់ព័ន្ធធ្វើអន្តរាគមន៍ជាបន្ទាន់ និងសកម្មបំផុត ដើម្បីចុះជួយប្រជាពលរដ្ឋនៅទីនោះ ។ ក៏ប៉ុន្តែកិច្ចខិតខំទាំងនោះពុំអាចទប់ស្កាត់ការបាត់បង់ជីវិត និងការរងរបួសដ៏ច្រើនសន្ធឹកសន្ធាប់នេះបានឡើយ ។ ដើម្បីរកឱ្យឃើញនូវមូលហេតុនៃគ្រោះថ្នាក់ដ៏រន្ធត់នេះ សម្តេចតេជោនាយករដ្ឋមន្ត្រីបានសំរេចចាត់តាំងគណៈកម្មការពិសេសមួយ ដើម្បីធ្វើការអង្កេតស្រាវជ្រាវ និងចាត់ចែងបញ្ហានេះឱ្យបានសមរម្យ ។ រាជរដ្ឋាភិបាលកម្ពុជាក៏បានចេញសារាចរមួយដល់គ្រប់ក្រសួង ស្ថាប័ន សហគ្រាសសាធារណៈ និងឯកជនប្រកាសយកថ្ងៃទី២៥ វិច្ឆិកា ឆ្នាំ២០១០ ជាថ្ងៃកាន់ទុក្ខនៅទូទាំងប្រទេស ។ ព្រមជាមួយគ្នានេះ មន្ទីរពេទ្យនានានឹងផ្តល់ការព្យាបាលឱ្យបានដិតដល់ជូនអ្នករង របួសក្នុងឧបទ្ទវហេតុដ៏អាក្រក់មួយនេះ ដោយចាត់ចែងឱ្យមានគោលនយោបាយសមស្របជូនដល់អ្នកទាំងនេះ ។ មកដល់ពេលនេះពុំមានសញ្ញាណាមួយបង្ហាញឱ្យឃើញថា ឧបទ្ទវហេតុនេះផ្តើមចេញពីភេរវកម្មនោះឡើយ ។ ទោះបីជាយ៉ាងនេះក្តី សម្តេចតេជោនាយករដ្ឋមន្ត្រីបានដាក់បទបញ្ជាឱ្យក្រសួងស្ថាប័នមាន សមត្ថកិច្ចគ្រប់ជាន់ថ្នាក់ធ្វើការប្រឹងប្រែងឱ្យអស់ពីសមត្ថភាព ដើម្បីស្រាវជ្រាវរកមូលហេតុនៃ សោកនាដកម្មនេះ ។
រាជរដ្ឋា ភិបាលកម្ពុជា សូមអំពាវនាវឱ្យបងប្អូនប្រជាពលរដ្ឋក៏ដូចជាធុរជនទាំងឡាយ រក្សាភាពស្ងាត់ស្ងៀម បំពេញការងារ និងប្រកបរបរតាមធម្មតាបន្តទៀត ។ ក្នុងឱកាសដ៏ក្រៀមក្រំនេះសម្តេចតេជោបានចូលរួមរំលែកទុក្ខជាមួយ បងប្អូនក្រុមគ្រួសារ ញាតិមិត្តជិតឆ្ងាយនៃជនរងគ្រោះទាំងអស់ និងសូមឱ្យវិញ្ញាណក្ខន្ធនៃអ្នកដែលបានស្លាប់បាត់បង់ជីវិត សូមទៅកាន់សុគតិភពកុំបីឃ្លៀងឃ្លាតឡើយ ។ សូមបងប្អូនជនរួមជាតិទាំងអស់ មេត្តាយោគយល់ ខន្តី អភ័យទោសចំពោះសភាពការណ៍ដ៏អាក្រក់នេះ និងសូមចូលរួមកាន់ទុក្ខនៅទូទាំងប្រទេសនាថ្ងៃព្រហស្បតិ៍ ទី២៥ វិច្ឆិកា ឆ្នាំ២០១០ ខាងមុខនេះ ។
តាមព័ត៌មានចុង ក្រោយបានឱ្យដឹងថា ប្រជាពលរដ្ឋនៅក្នុងរាជធានីភ្នំពេញបាននាំគ្នាទិញចេកនិង ទឹកបរិសុទ្ធទៅដាក់សែននៅតាមផ្លូវកែងនានា ពិសេសតំបន់ដែលនៅមិនឆ្ងាយពីកោះពេជ្រ ដើម្បីជាការឧទ្ទិសកុសលដល់ព្រលឹងអ្នកដែលស្លាប់បាត់បង់ជីវិត ឱ្យស្ងប់ទៅកាន់សុគតិភព ។ ការផ្អើលនាំគ្នាសែនចេកនេះ បានធ្វើឱ្យអ្នកលក់ចេករកចេកលក់មិនបានទៀតផង ។ មិនមានប្រភពព័ត៌មានឱ្យដឹងលំអិតជុំវិញការផ្អើលសែនចេកនេះទេ ៕
(អ្នករាយការណ៌កោះសន្តិភាព)
ចែករំលែកព័តមាននេះ